Menu principale:
U postu
Ncuntravi mpari Ntoni o cimiteru,
u salutavi, ca no mi paría veru.
Chi fati vui cumpari nta stu locu?
A meravigghja mia vi pari pocu?
Mi dissi cu nu modu pocu stranu,
stu viaggio mio speru nommu é vanu.
Nu loculu pe mmia haju m'affittu,
maju i cacciari cchjù di nu spitittu.
Scigghjtivi lu megghjiu chi vi pari,
ndavi tanti chi no si po cuntari.
Ndi vogghjiu unu vicinu a don Franciscu,
amenzu a tanti chidu giustu u piscu.
Fui curiusu e nci vozi spiari,
qual'era u spitittu di cacciari.
E mi parrau cusí cu tanta vogghja,
cu i denti scritti cchjù di na tinagghja.
Non eppi nu momentu mio di paci,
pe tutta arraggia u pigghjaria a caci.
Mi fici dannari tutti i jorna,
chimmu nci spuntarenu i corna!
Vidimu si armenu ccá abbascia a crista,
stu figghju i bona mamma fattu apposta.
Maria di juri
Ammenzu a tanti juri tu nescisti,
e sempre ammenzu a chidi ti criscisti.
Figghjola prima e signurina poi,
lavurasti sempre assemi e toi.
Da vita no cercavi cosi strani,
a saluti, nu piattu e nu pocu i pani,
di spartiri cu li figghj e nu maritu,
comu cusì sempre avivi speratu.
No jiu però proprio comu tu volivi,
ma tantu mali, mancu no cridivi.
Cu sacrifici dui figghj ti criscisti,
no cumpagnu e no maritu tu avisti,
unu morìu e n'atru s'alluntanau,
a fortuna tua ncun'atru sa pigghjau.
Cu forza e cu coraggiu jsti avanti,
i problemi superati sugnu tanti.
Ma sta forza chi tu hai non è terrena,
su l'angiali chi ta dannu i bona lena;
a idi ogni mumentu tu t'affidi,
nta tuttu u loru amuri tu confidi.