Menu principale:
No n’è com’era
Pedi cu lu pedi nci stricava,
pe comu mi ricordu sempri stava,
ca anzi, si l’omu nci piacìa
a chi tu cuntu, sutta su mentìa
e finu a quando tuttu no spruppava
mancu chi cannunati lu dassava.
Peppineda mia, dammi li chiavi
na cosa mportanti mi scordavi.
Cu sta scusa a machina nci futtìu
e comu nu dannatu sa fujiu.
Cu “na beda mia” e n’arrisata
si fici dari i chjavi natra vota.
A sira Peppineda jiu u si curca,
na rivigghjavi mancu cu na furca,
stisa menza nuda subba o lettu
na mami nci nchjanava fina o pettu,
na vuci cadda cadda nci dicìa
su Micu u sbertu, Peppineda mia.
Su di fimmani dijunu e arrapatu
di tia armenu vorria cunzulatu.
Di corpu si lizau ammenzu o lettu
a gridati pigghjau a Micu u sbertu.
Pe cumu jru i fatti fu na fortuna
si no nci ruppiu l’ossa cu i vastuna.
Coci coci si ricogghju addopedi
cu na mami davanti e natra arredi,
e na dia strana chi no ci parìa vera,
ca Peppineda sua no n’è com’era.
Passijata
U cielu stidiatu è bellu assai
comu stavota no l’haju vistu mai.
Milioni su vicini, milioni su lontani
a migghjara pari che pigghj cu li mani.
Subba a una i chisti, forsi a cchjù lucenti
a spassu mi ndijvi, ncuntrandu tanta genti.
Vidia facci bedi, vidia facci brutti
i perzuni bravi nc’eranu propriu tutti.
Pe duvi mi girava, amici e canuscenti
cu arrisi subbe e labbra, eranu contenti.
Cercava d’ogni parti, cu meravigghja mia,
però di mala genti nudu si vidìa.
Ca forsi oltri a chistu esisti n’atru locu
duvi a genti è dintra e fora nesci pocu?
Sta dumanda nci fici veloci a nu passanti,
nc’è certu chistu locu, ma no pe i viandanti.
Ca testa chi girava e a mente annebbiata
di nu puntuni a n’atru, facia n’atra girata.
Ammenzu a tutti chisti no nc’eranu potenti
no politici, no re, no pezzi di fetenti,
ma eranu perzuni chi suba a terra avìa
dassatu ogni beni pe strata e ogni via.
Sempri cchjù cumpusu e prima u mi rivigghju,
n’atra dumanda fazzu e na risposta vogghju.
A chidu chi paria, però u cchjù mpormatu,
dimmi nu pocu: ma è veru o è mbentatu?
Troppu ndi voi, e risposta io no n’aju
nto dubbiu ti dassu e prestu mi ndivaju,
però ti pozzu diri chi capitau a mia:
a risposta giusta è sulu dintra i tia!