Menu principale:
Mali i panza
Scusatimi vi pregu, scusati tutti quanti,
no n'è pe dirittizza si vogghju u passu avanti.
U doluri mi cunzuma, no saccju chi haiu i fari,
nu medicu mi servi u mi poti visitari.
Cusì tantu pe diri, ma sulu cu crianza,
d'ajeri mi ritrovu cu chistu mali i panza.
Nu creatura mbrazza, na mamma giuvaneda
guarda cu nu ngrignu na povera vecchjareda,
pari da nci dici: e chistu mo chi voli,
chi ndindifutti a nui si a panza mo nci doli!
Doppu tri uri i fila, nudu ha di passari,
ognunu, catinazzu, u turnu ha d'aspettari.
Intantu l'ura passa e io staju cchiù mali,
sti bravi perzuni a penzano tutti oguali.
Na gnura forastera si pigghja i cumpassioni:
facimulu passari, puru pe bona azzioni.
Io gnura vi ringrazziu , ringrazziu tutti quanti
ma no mi servi u passu, ..... ma fici nte mutanti!
I 60 anni i Mimmu
Si na tassa o ncuna murta hai di pagari,
a Mimmu Ruffa nci poi dumandari,
na risposta chiara ta duna di sicuru,
puru si a ttia ti pari tuttu scuru!
A nudu mai nega nu cunsigghju
puru ca si trova a cchjú i nu migghju.
Anpena nci dumandi ncuna cosa
a lingua parti sula, e no riposa;
Cu na pinna, na carta e ncunu appoggiu
di la sapenza sua ndi faci sfoggiu.
E accussi duna tanti spegazzioni
ca pari sta facendu na lezzioni.
Ogni scusa è bona pe girari,
ogni scasuni è bona pe accattari;
come è disponibili n'amicu,
si finisci sempri nta nu bricu.
Adduvi arriva porta l'allegria
e fa felici tutta a cumpagnia.
Sippuru l'avi tutti i soi sessanta,
quantu a mu ndi scrivi ancora, 740!