Menu principale:
U rinali
Cui ti chiama u pitali
pe tant’atri si u rinali
cu ti nomina vasinu
picciridu e carinu.
Cu ti chiama vasu i notti
testimoni i tanti lotti.
Tuttu iancu o culuratu
sia di crita ca smartatu
servi sempri a tutti l’uri
si pe tutti u pisciaturi.
A matina di bon’ura
a figghjola oppuru a gnura
ti jundija da finestra
cu a sinistra o cu la destra.
Ma a paura cchjù costanti
nommu ncappi nu passanti,
ca nzamai u pigghj in pienu
no po fari certu a menu
pemmu mpreca e u ti jestima
ca u potivi jettari prima;
scappa a casa mu si cangia
ca la puzza si lu mangia.
Ma sti fatti, tutti veri
no su d’oj ma d’ajeri.
No si teni cchjù u rinali,
nc’è u commidu chi bali
cchjù i nu vasu sutta o lettu
e u mbrigghju sempri nettu.
Mo i bagni su nte casi
docci, vaschi, e belli vasi;
u periculu nc’è u stessu,
ca si po mbudari u cessu.
Sora Laura
Vidistivu sicuru nu grossu topu
ma pe quantu grandi è sicuru pocu
a cumpruntu di surici di fogna
chi nescinu pe fora alla bisogna,
mu mangianu ncarcosa appena appena
ca lu mangiari i fogna li mbelena.
Sora Laura porta du mbusti e mani
una è da mundizza e una pe li cani.
A cuda no mbolendu nci mpatica cu pedi
a bestia ndiavulata si vota pe arredi;
chista, arraggiata peju i na parigghja
i soi dentazzi affunda nta cavigghja.
Junta e rijunta zoppichiandu a Sora
cerca mu l’alluntana pe daffora,
ca lu doluri intanto si la mangia
ma u suriciazzu u postu no lu cangia!
Grunda lu sangu, s’allorda puru a strata
ma nudu s’abbicina. Genti ngrata!
Sulu nu giuvanottu, facendosi coraggiu
vaci m’ aiuta e mu nci guarda u tagghju.
Nci sciuppa lu surici a nu corpu
ma l’orrendu animali è già mortu.
Nci arrizzanu li pili a tutta a genti,
nci trema u gongalaru e tutti i denti
a lu penzeri stranu e dissennato
ca u surici moriu mbelenatu.
Ma poi, si pijjanu i coraggiu li fetenti
quandu si capisci la scusanti
ca no moriu po sangu di la Sora
ma pe li caci chi raghau e ragha ancora.