Menu principale:
Leli
Quantu lejiti è nu pocu stranu
ma a tutti nci poti capitari
ma pecchì tuttu non sia vanu
vi l'aju paru paru di cuntari.
E'idu perzuna 'ntelligenti
e puru bonu patri di famigghja,
teni allegri amici e parenti
di tutti e nudu s'indipigghja.
Jornu dopo jornu vaci a Riggiu
e sulu u trenu usa po lavuru.
A jornata passa puru megghju,
e u viaggiu pari menu duru.
Corpu minutu e nu poco scapidatu
u guardi e ti pari figghjoledu
mai chilu di cchjù avi pigghjatu
puru ca s'ha futtutu nu vitedu!
Cui lu canusci sulu i nominata
cui si lu trova comu passeggeru
allegramenti ti passa la jornata,
di quantu cunta, tuttu pari veru.
.................................................
Oh, grandi sbentura ndi mbattiu
gridava na vuci addolurata
u caru Leli, senza pecchì, morìu;
fu trovatu ca testa ripiegata.
Sta vuci dilagau comu lu mari
i fimmani i capidi si sciupparu
puru l'omani imitaru li cummari,
passaru jorna e no si lu scordaru!
....................................................
Cui nci tocca li mani e cui li pedi
cui nci tira u bavaru da giacchetta
cui vaci avanti e doppu torna arredi
c'armenu nu miraculu s'aspetta.
E idu restau cusì meravigghjatu,
fimmani, omani, grandi e figghjoli
cu la speranza m'è miraculatu
cui stavi bonu e puru cui si doli.
'Nzollurtimu arrivau a conclusioni
di stu fattu stranu capitatu,
capisciu accusì a lezzioni:
pe n'atra perzuna fu scangiatu!
I Paisani
Oh, chi bravi cristiani
nta stu picculu paisi
si ricogghjnu puru i cani
cu l'amuri e cu l'arrisi.
Si è veru, è piccirudu,
cu li Santi nta lu cori
ma ognunu avi nu cridu,
e su tutti festalori.
Cu u Signuri e San Giuvanni
e a Madonna Addolurata
cambiandu puru i panni
fannu a Pasca l'affruntata.
E' però nto misi i maju
festa grandi i San Nicola
ca si chjovi e faci taju
idu a tutti faci scola.
No cu menu devozzioni
n'atra festa idi fannu
è nta giugnu i sant'Antoni,
si ripeti tuttu l'annu.
Si nu furgulu poi senti
e ti schjanta puru u cori
a ntrasatta veni a menti
ch'è di Cristu Redentori!
Veni poi a settembrata
tanta genti in adunanza
da Madonna Addolurata
faci festa a Fratellanza.
No parramu du Natali
ch'è l'urtima di l'annu
pe ognunu è tali e quali
tant'aguri idi si fannu.
Nu difettu però cogghju,
si si pò chjamari tali
si nci tocchi u porafogghju
poi su peju d'animali!