Menu principale:
Prima a poi
Gran fimmana i bellizzi e grandi portamentu
pe Vicenzedu (a gridu) era sulu nu turmentu!
Jendu cu lu ciucciu oppuru alla pedona
speravava ogni jornu pemm’è a vota bona.
Cumpari Vicenzedu, prestìti cu li mani
sinnò ccà no finimu mancu pe domani!
Cummari mia, viditi, u lavuru è propriu assai
ammazzari no mi pozzu, ca poi no si sa mai.
E mo cumpari mio vu dicu chjaru chjaru
si finiti pe stasera ndi vidimu nto pagghjaru.
Comu bumba nta la testa sti paroli scoppiaru
e nta tuttu lu soi corpu na gran forza nci dassaru.
Vrazza e gambi si movenu cchjù veloci i na zannetta
pensandu a chida scena chi natru pocu u spetta.
Pocu prima u faci sira ossia tra lustru e scuru
verzu lu pagghjaru si diriggìu sicuru.
Arrivaru finarmenti i momenti disiati!
O pagghjaru si trovau cu quattro strancalati.
Apriu lu portedu, spalancau lu portuni
ma dintra era sulu comu nu cazzuni!
Gran fimmana i bellizzi e chjna di prestanza
pe Vicenzedu (a gridu) restau sulu l’astinenza!
U tempurali
Trona e lampi, chi tremava a terra
tanti e forti chi parìa na guerra.
U mi riparu trovai nu casalinu
ch’era nzuppatu cchjù i nu puricinu.
Na vuci dilicata mi dissi: veni avanti,
prima u ti vagni puru li mutanti.
In berità, scornusu e di rispettu
chidu nbitu io no volìa m’accettu.
Ma a fimmana cu premura nsistiu ancora
chi no ma ntisi pemmu restu fora.
Mi dici: coddijati o focu, sì hai vogghja
ca pe lu friddu, tremi cchjù i na fogghja.
Veni ca ti coddiju a modu mio,
mi disssi a gnura, prima mu penzu io!
Comu fai u resisti a tali tentazioni,
adduvi a trovi cchjù n’atra occasioni?
L’acqua chi sbattia subba i vitri,
cocci di cucuda pisanti comu petri,
ammucciavanu i ngusci e i suspiri….
fina a lu stremu, prima di dormiri.
Nu lampu cchjù vicinu scoppiu
di nto sonnu profundu mi rivigghjau,
Io era trasudatu e stancu mortu
pari c’avia lottatu corpu a corpu.
Nta chidu lettuni grandi io era sulu,
accanto i mia non c’era propiru nudu.
Ma fa ca di grandi fantasia mi pigghjai,
e tuttu quantu abbinni mu nzonnai?