Menu principale:
U Medaru
Ammucciatu dintra arrami di n’adavaru
si sentia u cip cip di nu medaru.
A tilaja nci tenia a fimmaneda
da gula nci nescia na canzuneda.
Di tanti jorna idu nci a cantava
di tanti jorna ida no cacava!
Ca crista azata pe la su bellizza,
non’abbasciava mancu la capizza!
Nci ndi poi diri e fari quantu voi,
no n’è certu chistu u pasculedu toi.
No oru, no dinari hai mu nci duni
ca teni sulamenti nu cistuni,
vacanti di tutti beni materiali,
strachjnu di chidu chi cchjù vali!
Tantu tempu ormai chi nci stai appressu
ti sta trattandu peju di nu cessu!
Fatti na vota omu e mò dassala stari
n’atra fimmaneda vàttila a cercari.
Quando cull’anni, si vidi arripicchjata,
chi no risisti mancu a crista azata
avi chi mu si penti e mu si pista
pe qundu orba fu e perdiu a vista!
A doccia (di cui?)
Aspettami o mbiatu patri Pio
aspettami ca vegnu puru io.
Nte vrazza grandi toi a mu ndi pigghj
ca vemimu cu tutti li famigghj.
A santu no vutari,
a figghjolu no promentiri
si no sì sicuru ca poi manteniri.
Cu pani, salami e suppressati
cu i machini partimmu carricati.
Finuti li doviri religiosi
tentammu u facimu atri cosi
penzandu ca mpini no n’è mali
si na visita nci facimu all’animali!
Senza cumpundiri u sacru cu profanu
nci ndi jmmu o zoosafari di Fasanu.
Nommu nc’unu animali u ndi mangia
ndi chiusaru nta na grandi caggia.
Simenti di cucuzzi, luppini e banani,
ranu, ndianu e nucidi americani,
a pugni nci ndi jettavamu a tutti quanti
quando si finiru jimmu sempri avanti.
Paràti u figghju ca si vagna tuttu,
certu nci saravi ncunu tubu ruttu.
Subba a testa mentinci u cappedu
armenu u riparamu, povaredu!
Na vuci di luntanu gridau: stati attenti
acqua ccà non davi, nd dissi l’assistenti!
Gurdandu boni i latu si vitti nu scimmiuni,
cu violenza rotiava nu grandi pistoluni ,
ncazzatu ca no eppi cchjù di chi mangiari
peju i nu fgghjolu si la volia pagari!
Tenìa chidu cosu, comu u tubu nu pomperi
schicciandu subba o focu, u si caccia lu penzeri.
Jundiandu a pisciazza stu grandissimu cornutu
s’arridia sutta e baffi, ca u so scopu avìa vinciutu,
e cu l’atri animali facìa puru grandi festa
e nui tutti vagnati chi fetemu comu a pesta!