Menu principale:
A palumbeda
Na palumbeda ianca jiu u si posa
di lu mignanu miu subba na rosa
chi di li juri tutti è riggineda
ma a palumbeda mia è la cchjù beda.
Cogghjvi chidu juri in primavera,
tantu duci chi no mi parìa vera.
Cu la presenza sua inchju na casa
ognunu volia ma vidi cu na scusa.
Tutta la vita mia cangiau tenuri
tuttu era gioia, puru cu i doluri.
A casa intera era chjna di sorrisi
cusì restau pe n’annu e quattro misi.
A la ntrasatta tuttu mi mancau
di quando nu balordu l’ammazzau
cu n’incidenti ida mi periu
serena subba u celu s’indiju.
Comu sempri, na sira mi curcai
e cchjù cuntentu poi mi rivigghjai,
nta nu cchjù bellu postu mi trovai
cu a palumbeda mia io m’abbrazzai.
U ciucciu
U ciucciaredu mio sempri ragghjava,
nci sparava a fatiga ma mangiava;
s’abbicinava sempri a mangiatura
puru c’avia ntrupatu di na ura.
Mi lu tenia pe commidu e pe aiutu
spisi tanti sordi ma restai futtutu
ca pe lavurari mai nci ndi dicìa
e i servizza io sulu mi facìa.
Caminava sulamenti s‘era vacanti,
cu u mbastu no si movia pe nenti.
Si ncuna vota u riuscia a carricari
nta la nchjanata l’avia di spingiri.
Cui nci misi stu nomi no sbagliau
unu cchjù adattu no nci lu trovau
forsi tutt’atri ciucci canusciu
e nudu nci ncappau comu o miu.
Vistu ca no si sporza cchjù di tantu,
u mangiari nci razzionu giustu quantu
u campa appena appena e nommu mori;
s’avaria u mi peri, mi tagghjaria lu cori.
Passanu li jorna e mangia sempri menu
campa lu stessu e fuji cchjù i nu trenu
ca no nci pisa tantu a carni i ncodu,
no ngrassa cu lu frenu e tantu grodu.
Na matina comu sempri nta la stada
nci portavi a grodata cu la biada;
avanti i mia nu spettaculu tremendu:
ca lu trovai mortu, ma arridendu,
parìa ca mi cercava u mangia ancora
ca a testa nterra e li dentazzi i fora.
Iju u mori propriu mo, stu disgrazziatu,
giustu appuntu quandu s’avia mparatu
mu campa u stessu e cu pocu di spisatu!