Menu principale:
Cu cerca (trova?)
Ognunu di la sua vita è patruni
e di i penzeri soi fa na scasuni.
Cu penza a lu lavuru e cui a tutt'atru
unu di chisti, strani, è mpari Natu.
U soi penzeri è fissu e a tutti l'uri,
passa jornu senza u faci 'amuri.
chida chi diventa n'ossessioni
è cangiari ogni vota posizzioni.
Chi faci, di sapiri no n'è datu,
tuttu cunta, basta m'è mbriacu.
comu vi lu cunta pari ch'è normali,
cuntandu comu fici na matrimoniali;
no perdi tempu, mancu pe nto lettu
ogni postu è bonu, basta pemm'è nettu!
Si ricorda poi qual'era a preferita:
cruci a nuci , a modu i calamita.
Pe no fari scrusciu, c'è u mattunatu,
curcati a nuda subba a lu tappetu.
Ogni mumentu è bonu pemmmu cogni,
cu l'acqua cadda d'intra a vasca i bagnu.
Di sira na manera, diversa la matina,
cangia puru modu e faci a novantina.
S'attisanu l'aricchj quandu però dici
a megghju certamente fu subba a lavatrici.
Cu chidu movimentu cuntinuu a rotiari
si la scialava tuttu, senza fatigari;
u satu era forti e i latu s'indija
pe no cadiri nterra di minni si tenia.
Ma la finali mpini, li vitti cchjù mpocati
e nterra si trovaru, tutti sdarrupati.
U vrazzu mpasciatu e a gamba rutta avia,
no n'era certu chida, a posizzioni chi volia.
A veduva!
Na fimmana di niru era vestuta
avanti a mia tutta scunzulata!l
U uttu nci tenia no sacciu a cui
ma sacciu ca li morti eranu dui.
Pe dittu da cummari sua vicina
pari restau veduva da sira a la matina
U primu maritu u trovaru tostu o lettu,
doppu sei misi si maritau pe dispettu!
I cuminciari ancora, avia cu vecchju ritu,
prima i novi misi s'astutau l'atru maritu!
Sicuri ca a veduva era chjna di caluri
si penzava a tutt'atru, no certu a lu doluri!
No n'è meravigghja si penzari si potia:
pecchì sta condanna no capitau a mia?
I penzeri eranu tanti, e puru a fantasia
ma no mi rendia cuntu di ciò chi succedia.
menu i nu minutu tutti scumpariru
chjudendusi lu nasu, pe fora si ndi jru.
Tutta a stanza s'inchja di certu adduri
ma, a nascari boni, si sentia nu gran feturi!
A vesta i ncodu, tosta nci stavìa
tantu chi jera china di lordìa,
di quantu tempu poi no si lavava,
da testa e pedi tutta chi puzzava.
Vinni nu dubbiu e fu subitu certizza:
i mariti i tterrau pa grandi puzza!?!