Menu principale:
L’emigranti
S’indiju di lu paisi, s’indiju mu fa dinari
salutandu tutti quanti, di l’amici a li cumpari.
No si epparu notizzii, no si seppi chi facìu
mancu a mammasa e a paisa na littara mandau.
Poi nu jornu cumpariu ammenzu di la chjazza
ncumpagnia di atri tipi di no certu i bona arrazza
e accantu na smorfiusa, cu nu grandi machinuni,
era tuttu ntichettatu e facìa tantu u spaccuni.
Annacandu culu e testa, no sapìa chi ha di fari
pemmu faci meravigghja tirau fora u cellulari!
E i figghjoli tutt’attornu chi dicenu “o maramia”,
rispundia: no po chjamari; si finìu a batteria.
Certu è c’all’apparenza pari vera sta ricchizza!
O è sulu focu i pagghja, e finisci nta mundizza?
Ma s’è beru o è nu mbrogghju, pe mo no si capisci
ncuna vota certamenti u sapiti comu finisci.
Poi nu jornu nto gionali nc’era scrittu c’orrestaru,
u piscaru nta na banca cu i cumpari c’arrobbaru.
Chista fu a fini sua, chi volìa pemmu avi tantu,
passa i jorna nta galera agghjuttendu amaru chjantu!
Era megghju a casa sua e mangiari pani e cipuda
ca na fini tantu storta, nta na cella stritta e nuda!
U dubbiu
Ah, ca vinni finarmenti u jornu disiatu
accquantavi chi volìa u ti viju maritatu.
Fusti sempri nu penzeri, pe sti povari anziani,
ca la forza e lu coraggiu oramai ndi su luntani.
Quantu beni chi ti vogghju, o cori miu aduratu,
è na vita chi aspettu u ti viju sistematu!
Ma sta grandi cuntentizza e nu pocu amareggiata,
nu dubbiu mi turmenta pe tutta la nottata.
Comu mai sta dicisioni accussì tantu di fretta,
no potivu aspettari e a nui u ndi duni retta?
No n’è , ca nzamaddio, ti fici gabbu l’intellettu,
o potti essari magari nu sgarru di nto lettu?
Vorria, io mu mi sbagliu, ma u cori di na matri
mi dici ca purtroppu scasuni no ndav’atri!
Ma su dannu lu facisti, ti tocca riparari,
di iancu o di culuri, all’ortatru l’hai i portari!
E a genti chi dumanda e si faci meravigghjia:
po' sempri capitari; cui no boli mu nci pigghja.
Pe quantu faci mali e ndi pigghjamu tantu i scornu,
a fini di li cunti, dura sulu ncunu jornu,
ch’è megghju mu lu crisci, ca pemmu u vidi mortu
ammazzandu n’innocenti pe mezzu di l’abortu!