Menu principale:
A Pettegula
O fimmana assettata a lu postedu
camina, va, pulizza nu zimbedu.
Armenu na cosa di utili tu fai
e ncunu peccatu i menu certu hai!
Subba a vucca tua zuccheru e meli
oppure acitu crudu e tantu feli.
Tutto stavi di chi ti fici sulu a tia
si l’hai in odiu oppuru a simpatia!
Guai a cui ti veni sutta tiru,
cadi mpurruta e sicca comu u piru.
Si pe casu nci voi nu pocu mali
i lacrimi ci fai scindari a cannali!
Si ncunu tortu hannu di pagari
atterri a ida e tutti li soi cari.
E mpini vai dicendu pesti e corna
cu voli mali a tia prestu mu torna
a chudu locu dà, luntanu assai
chi nudu subba a terra vitti mai!
Frutta e atri cosi
Juri i cucuzza e juri i cucuzzaru,
fammi cuntentu, parami u panaru!
Aju a mentiri du ova e nu citrolu,
fallu ti pregu, su peju i nu fugghjolu!
Docu c’è postu puru pe du bruna
ca di banana ndavi sulu una!
Pigghja, e menti puru sti du ficu
a mia mi tocca ancora pala e picu!
Si quattru cosi ìnchinu u cistedu
mu ndi pigghj n’atru torni arredu.
Stipamu doch’ intra cosi dilicati
quattru ficundiani gìà mundati,
nu pocu d’amura e puru du cerasi,
quattru juri di garompula pe vasi.
Si brava pemmu i conzi dintra a pagghja
catinazzu, comu a tia nud’atra angagghja.
I pigghj e poi l‘acconzi intra e fora
su tanti, ma nci ndi stannu ancora.
Quanta arrobba chi si perdaria
senza di una brava comu a tia!
Grandi meritu a tia ti veni datu,
u nomi toi pe sempri è ricordatu!