Menu principale:
Vint'anni
Passau lu tempu di li mei vint'anni
vinni lu tempu di li grandi affanni.
Quando juntava comu nu puditru,
e ija satandu di nu fossu a n'atru.
No nc'era ruga o strata di paisi
chi pocu o assai pedi io no misi.
Sentìa nu tamburru chi sonava,
duv'era era a festa, io scappava.
A modu i cani i cacia ija rastiandu
e fimmaneda giusta ija cercadu.
E si no n'era giustu lu mumentu
restava armenu lu divertimentu.
Comu i giuvani, a fatiga nci sparava
dormia di jornu e a notti passiava.
Tantu tempu passau e mo nci penzu
si tuttu chidu chi fici ebbi nu senzu.
Si dici c'a vecchiaja è na carogna,
a mu si campa, e non è virgogna.
Povaru corpu mio straziatu,
comu nu cani zoppu, vastuniatu,
mancanu li forzi e puru nu scaluni
l'aju di nchjanari sulu a pecuraruni!
U zitu
Cori di canna e cori di cannitu
a Rosineda ci trovammu u zitu.
Nu giuvanedu atu e di presenza
n'omu di puzu e puru di prestanza!
Tantu tempu chi ida u ija cercandu
pe munti e valli sempri ija scappandu.
Mo l'avi sutta mani e d'è cuntenta
trovau l'amuri soi, e certu abbenta!
Appena seppi di li sentimenti
abbisau prestu tutti li parenti.
E comu si facìa e tempi di na vota
nci preparamu na bran bella dota!
30 para di lanzola e di cuscina
cu na duppia batteria di cucina.
36 para di mutandi e riggipettu
12 cuverti ricamati, pe lu lettu!
Dui casciuni chjni puru di tuvagghj
e na cascia di cistedi pe li cagghj!
Po esseri ca di jornu oppure i notti
ti veni a vogghja pemmu fai ricotti.
Tutto ti damu, i nui non'ha a mancari
pe na cazza i dota non t'hai i maritari?
Rosineda si lu nzonna notti e jornu
su vanta puru a nuda, senza scornu!
U giuvani, in berità, è pulitu
ogni fimmana u vorria pe zitu!
Sta fortuna a Rosineda capitau
è l'omu chi ida sempri disiau.
Non è tuttu perfettu, rosa e juri:
pocu cirivedu ma gran lavuraturi!
Ma si di testa non è tantu dotato,
bonu però è l'organu ammucciatu!
Penza Rosineda: a fini non è mali
vistu ca chida è a parti principali!