Menu principale:
U medicu
Ma che stranu stu paisi
tutti i jorna i tutti i misi,
puru i notti e a tutti l'uri
vonnu sempri lu dotturi.
Chistu medicu è Gustinu
ed è ccà a San Costantinu.
Già e setti da matina
sona a porta Cuncettina:
fati prestu, dai, veniti,
nc'è a nanna ca bronchiti.
Fuj e dassa di mangiari
ca i malati avi i curari.
U lavuru a cori pigghja
chi trascura la famigghja,
e lu faci cu passioni
ca la sua è na missioni.
Chjama forti Peppinedu
chi si porta u figghju arredu,
a lu pedi pigghjau na botta
di sicuru avi na storta.
Nc'è cu vaci, nc'è cu veni
nudu scornu ncori teni
ma di festi e lavoranti
idu assisti tutti quanti.
U poi vidari ncazzatu
si abbandunanu u malatu,
quando dici: “prestu jati
pemmu lu ricoverati”
Dui dumandi chi ti faci,
già ti menti u cori in paci
ti canusci a malatia,
prestu data a terapia.
Idu è bravu, pe daveru,
vu cunfermu, su sinceru,
pocu nadavi i sta maniata
ma c'è puru la canata.
A sua casa è nu viavai,
chi no si riposa mai.
Ntoni arriva trapilatu
tuttu stranu e scuncertatu
a mugghjeri è mbarazzata
cu tri litri e na cannata,
no lu trova e u va a cercari
puru subba u cellulari.
Comu u vidi nci dumanda:
nci facimu na lavanda?
Mi cercasti o no, perdio?
Cu è u medicu, tu o io?
A Maria
Nu grandi fattu abbinni a Cessaniti
curriti paisani co viditi.
Franciscu e Zarafina no ficiaru ribedu,
doppu du fimmanedi volenu u masculedu.
Eranu cuntenti c'avenu Laura e Tita
mbeci di Franciscu, Maria Grazzia vinni mbita
Già di la nascita, strana cosa si notava,
ncunu jornu i menu di l'anni si cacciava.
No pozzu diri l'annu pe onuri e pe rispettu
ca l'anni di la fimmana si teninu nto pettu.
Si ncunu di parenti o ida no mi mina
vi pozzu diri sulu, ca faci a cinquantina.
Di figghjola si vidia ca avia temperamentu;
di chistu, puru paisa no n'era cchjù cuntentu,
ca la vidìa jocari ammezzu e masculuni
e mbeci di li bambuli jocava cu palluni.
paisa subba a lapa sempri si ndija
a cunsignari bumbuli pe strata e ogni via.
Si poi mu si la scorda ogni tantu capitava
pe na bumbula di gas idu la scangiava,
no certu pe la stazza e mancu pa fattura
ma la pigghjava scanciu sulu pa statura|
U soi destinu mbeci lu fici poi a Messina
pigghjandusi a laurea specie in medicina.
sempri jiu e no guardandu mpacci
nto spitali lavurau, o repartu di li pacci.
Poi Peppi e Selenia l'inchiru i sacrifici
ma tantu è contenta pe quantu ida fici!
Eccu i soi tesori, du figghj, du gioielli.
Veninu appressu d'idi e certu menu belli
tutti l'animali compresi gatti e cani
Batuffulu, Remì, e mpini Raja e Svani.
Pe nenti mai sa pigghja, è sempri surridenti
no faci differenza, è oguali tutta a genti.
Na vota l'annu chjudi lu studiu cu la stanza,
dassa tuttu arredu e si ndi va mbacanza.
Da ida ncunu vaci a modu i peccaturi,
ti parra e ti cunzula comu nu cunfessuri.
Maria Grazzia è unica, ida non ha pari
ca si no nci saria, l'avarenu di mpentari.