Menu principale:
U misteru
Na matina prestu vinni,
'nta lu lettu li trovai,
ma l'arraggia, tinni tinni,
cu curtedu li pigghjai.
Era tantu cu penzava,
era tantu cu sapia;
ca 'nto megghju li trovava
botta e sangu, no cridia.
'Nta lu cori di la notti
grida e grida si sentenu;
'nta lu sangu e tanti botti
chidi amanti chi fujenu.
O spitali l'haju i portari,
pensava u gran fetenti:
i feriti hannu i curari
di la mia povera amanti.
Pari poi addirittura,
ca si tratta d'ammucchjata;
sarà beru, o è jattura?
Genti mia, chi nottata!
'Nc'era poi u dubbiu amaru
nommu u sapi tanta genti,
ma lu scornu è fattu raru,
non su certu cosi i nenti.
Ma la grandi meravigghja,
c'a distanza i tanti jorna,
malanova mu li pigghja,
non si sapi cu avi i corna.
U povaru arriccutu
Pecchì, aviri tanti sordi
è a ruvina di la genti ?
Si diventa tantu ngordi
cchjù di cui non avi nenti.
Ti facisti tantu grandi
ma di sacca e no di cori,
e no penzi comu tanti,
comu tutti ca hai mu mori.
Penzi sulu a li dinari,
pemmu acquisti tanti beni
tuttu chidu chi ti pari
casi, machini e terreni.
Ti scordasti ca i figghjolu
non avivi chi mu mangi;
cu l'adduri du pagghjolu
mancu i cazi mu ti cangi.
Vali a pena mu t'affanni
mu ti pigghj tantu i pena ?
Poi campari finu a cent'anni
ma nc'è puru cu ti frena.
Simu nenti subba a terra
comu n'alitu di ventu,
dassa futtari la guerra
fatti chjnu i sentimentu.