68. U bisognu - 69. U ciucciu cu porcu - Vernacolo Calabrese - UNREGISTERED VERSION

Vai ai contenuti

Menu principale:

68. U bisognu - 69. U ciucciu cu porcu

Poesie terza Parte

U bisognu

A tempu chi nta casa nenti nc’era
no acqua, no cessu, ma culera,
si pe casu ti scappava nu bisognu
fujendu, ijvi u cerchi ncunu bagnu.
Ma dintra no ndavia e mancu fora;
cusì è pe tutti, e u cori si rincora.
Ognunu a mu si trova u postu soi
adduvi vannu i ciucci e puri i voi.
Nto scuru potia puru capitari
n’umbra lesta chi si vidia arrivari;
ti sposti pe nommu s’abbicina
mpaticandu na merda di voina.
Ma tu, sempri signuri e gentilomu
nommu ti fai vidiri penzi comu,
ca nud’atru riesci mu t’agguala,
t’abbasci sbertu arredi a na sipala.
A du metri nc’era libaru u violu
chi nci passava puru nu figghjolu.
Cummari Rosa però chi no n’è mala
vozi mu passa arredi a la sipala.
Saluti ti dissi, cumpari chi facimu?
Nenti, nci rispundisti, nui cacamu!
Passatu u momentu du bisognu,
chi savi sempri i fari cu ritegnu,
a ntrasatta si ntisi na gridata
chi risonau pe tutta a vadunata
fatta di rina, cocina o parrera…..
Nu pilu si ncastrau nta la cernera!

U ciucciu cu porcu

Nci dissi u porcu o ciucciu i nto zzimbedu
cchjù ti guardu e cchjù ti ciangiu:”povaredu”.
Pe quantu grandi e grossu comu sì
pecchì ti fai trattari addaccussì?
Da sira a la matina avanti e arredi
finisci nu viaggiu e poi addopedi,
subba o mbastu cu i sporti carricatu
nta la nchjanata arranchi trapilatu!
Cui ti misi stu nomi ha nduvinau
di fattu a tia Ciucciu ti chiamau!
È beru, io su ciucciu ca capizza
ma sta vita, a tia nenti ti mbizza!
M’ammazzu di fatiga, su pelli e ossa,
u patruni,a mia, no ma scavau a fossa!
Di n’annu a n’atru fazzu stu stratuni
ma nto zzimbedi c’è n’atru turduni.
Goditilli comu poi sti quattru jorna
ca a tia n’atra stagiuni no ti torna.
Guardalu bonu u pedi da luvara,
guardalu bonu u tripodu ca coddara,
ca da intra vai a finiri pezziatu
e prima ancora di l’urtimu rijatu!
Chidi cumu a tia, appena su ngrassati
servinu pe inchiri sotizzi e soppressati.

 
Torna ai contenuti | Torna al menu