62. A medicina (n'atru viagra) - 63. L'anniversariu mio - Vernacolo Calabrese - UNREGISTERED VERSION

Vai ai contenuti

Menu principale:

62. A medicina (n'atru viagra) - 63. L'anniversariu mio

Poesie terza Parte

A medicina (n’atru Viagra)

Sentitimi cummari, mo vu cunt’io:
no canusciu cchjù u maritedu mio.
Paria nu focaredu, sempri ncaluratu
sulu cu penzeri m’è accuntentatu.
All’ura c’arrivava, i jornu oppuru i sira
non penzava atru e mi pigghjava i mira.
……………………………………….
Fa beni u riposu, nu pocu d’astineza
ma pe tri misi e ccjù, no si pò stari senza.
Dicitimillu vui chi tantu lu sapiti
vui chi a d’ogn’ura aviti li mariti!
Pe troppu amuri, io cercu mu rivigghju,
na sula cosa i fari, na dicisioni pigghju;
e problemi soi, no pozzu stari appressu,
si mo nci servi sulamenti pe lu cessu!
Dui cumpettedi azzurri nci squagghjavi
e pocu cchjù i menz’ura aspettavi
mu u viju carricatu cchjù i nu toru
di vasati e carezzi pemmu moru!
E mi preparu bona pe la guerra
nto lettu, nto divanu oppure nterra.
Passaru ormai tri uri e no si movi,
si senti mali assai, pari ca mi mori,
da vucca sua nesci puru pocu jatu
è fermu, friddu, tuttu stracojatu.
Pe sta vota nci iju bona e no moriu
bonu u curaru du mpartu chi piggjau.
E no mi veni cchjù a fantasia
u nci dugnu medicini i testa mia.
Nu maritu fedeli è assai raru
puru accussì mu tegnu caru caru.
S’è bonu, m’accuntenta comu poti,
si no m’accunt’io i pochi voti.

L’anniversariu mio

Si di curiosità vui vi pigghjati
nu giornali aviti u v’accattati.
A notizia pò nteressari a tutti;
ncunu po diri: a mia chi m’indi futti!
Paulu e Delia ndi jamu a maritari
pa seconda vota, di novu all’artari.
Fu u 18 aprili di 25 anni arredi
e comu nenti u facimu addopedi.
Chist’unioni i Dio fu beneditta
ca a strata chi trovammu fu diritta.
Doppu novi misi d’intenzu amuri,
nesciu Peppi, u primu bellu juri.
Tri anni e menzu appena, n’atru figghju
eppimu a Davidi, u secundu gigghju.
U terzu ancora ndi mancava all’appello
n’atri anni e menzu, eccu Claudiu Iannello.
Na vita tribulata, ma i figghji a ogni costu,
nudu di li tri, nesciu o stessu postu.
Mo su grandi, belli, bravi e allitterati,
tantu meritu nci aspetta a loru matri,
cu pacenzia e sagrificiu a tutti l’uri
boni li crisciu, affidanduli o Signuri|.
Mamma e fimmana i grandi valori
di fidi profunda e puru di gran cori.
Si capita pe casu u ci veni nzognu
ca ncorchidunu avi di bisognu,
comu appena u veni a sapiri
dassa tuttu e vidi chi po fari!
N’aguriu fazzu ijo, finu a chi ijè mbita
a sta beda famigghjeda sempri unita,
pemmu avi benistari, e chjna di saluti
dassandu stari sordi e cosi mai avuti.
Pe tagghjari curtu, chijudu ccà stu siminariu
speriamo u ndi vidimu a n’atru anniversariu!!!

 
Torna ai contenuti | Torna al menu