57. Carnalavari - Vernacolo Calabrese - UNREGISTERED VERSION

Vai ai contenuti

Menu principale:

57. Carnalavari

Poesie Parte Seconda

Carnalavari

Viatu, vogghjiu nu previti o capizzu.
Nci dissi: a mu m’assorvi, catinazzu!
O mpernu io no vogghju pemmu vaju
peccati tantu grossi io no nd’aju.
Adduvi vai a finiri, no tu dicidu io
o mpernu o paradisu u sapi sulu Dio.
Jettatu nta stu lettu pari nu carnalavari
m’assettu accanto i tia e mi cunti pari pari.
Apri u cori toi e dimmi tuttu quantu,
doppu vidimu, si si cchjù diavulu o santu!
Fu nta nchjanata pe Muntalauni,
chi ncuntravi a Cicciunazzu, lu cazzuni,
cusì chjamatu no pa sua ngnoranza
ma canusciutu pe tutta l’abbundanza
Mi dissi: duvi vai cu u ciucciaredu?
nu pocu di pietà pe chistu povaredu!
Dimmi chi ti mbattiu, e no temiri
chidu chi pozzu fari u poi sentiri.
Sentu nu gran fastidiu e parti i vasciu
staju all’impedi, no pozzu mu mabasciu
Su chidi deci chili i lardu crudu
chi ti ntasau la panza comu u pudu.
Su già tri jorna boni chi no mangiu
ma chista sufferenza no la cangiu.
No di gudeda e no di panza mi lamentu
pocu cchjù sutta è tuttu u mio turmentu!
Mo si, ca capiscivi chi ti potti capitari
veni cu mia e dassami penzari.
Nu juntu arredi n’atru e arrivammu
nta casa i Peppineda ndi mbutammu,
era ida na gran fimmana i piaciri
e Ciucciunazzu no lu pò cridiri!
Dieci minuti accuntu no passaru
chi fora si ndi vinni, l’amicu caru.
O chi goduria, non haju cchjù lu pisu,
vitti li stidi cu tuttu u paradisu!
Si u paradisu u vitti l'amicu mio
no mi lu meritu nu pocu puru io?
Su sulu chisti li grandi meriti toi?
mi dici nzollurtimu chi catinazzu voi?
A mia mi pari mbeci ca sugnu tantu pocu
e si no ndai di megghju no ti meriti lu locu.
Ancora no finivi, ndaju tanti di cuntari
no ti moviri i docu e stammi ad ascortari.
Ricordati di Micu, lu porcedu
cusì fu ngiuriatu, u povaredu
di festa e lavoranti ija mu u pasci
ca nu quintali e menzu avia mu nesci.
Avia penzatu bonu comu u faci:
frittuli e lardu armenu nu rivaci
sotizzi, suppressati e capicodu
affommicati e poi curati a modu,
puru scorci, cuda, ficatu e rugnuna
nenti avia u si perdi e a nudu mu nci nduna.
Menu i na simana nci abbastau
e chidu beni i dio si cunzumau.
Penza nu pocu, comu u distino si diverti:
dassa stari i fissa e pigghja i cchiù sberti.
Nto cori di li notti chi seguiru
pe chiamari u medicu fuijru.
Si nitisi mali Micu, chi ija pe moriri,
cusì dicenu i fimmani videndulu suffriri.
Sentenzia lu medicu: o caru Micu mio
no na mu mangi nenti e fai comu dich’io!
Sentendu sti paroli, i fimmani accorati
si pistanu lu pettu tutti addolorati,
si sciuppanu i capidi, si tiranu li trizzi
penzandu e soppressati e prosciutti cu i sotizzi.

Nci tessinu li lodi, u dannu già pe mortu
m’utterranu su pronti, ma idi hannu tortu.
Miraculu da scenza, bravura du dottori
Non nbnni l’ura sua, pe mò no n’ha mu mori!
Nu litru e menzu i purga e cincu di cristeri
a novu lu rimisi, po mastru custureri.
Tu ti dumandi e dici: “chi nc’intri nta stu menzu
si u meritu è du medicu, armenu comu penzu,
chi jè chi voi u m’appicchj, passandulu po toi,
si meriti non hai, chi catinazzu voi?”
O previtedu caru, mi pari ca si nchjorru
no capiscisti ancora, a notizia mo ta sperru.
Si nu pocu sbertu jeri, u capiscivi i tia
si Micu stavi bonu è pa bravura mia.
Tant’atri io ndi fici, ma non staju mu ti cuntu.
Cu certi perzuni no vogghju m’aju accuntu
nci cridi, si cuntentu e poi vai puru avanti
zenza u t’indaccorgi ti futtinu i mutanti
No succediu a mia ca sugnu figghju i troia
ma quanti sbenturati vannu sutta o boia!
Ti ricordi poi, chida vota nto pagghjaru
mi dissi accorata a figghja du massaru
quando pe pocu pàtruma dà no mi piscava,
cu lu sbertignu mio chi mi intrizzava.
E tu, cu la tua grandi fantasia
a curpa ti pignasti pemmu accuppi a mia
ca si pocu pocu, ncuna cosa capiscia
fringuli, fringuli idu ndi facìa.
Ma na cosa ta cumpessu, cacciami stu gruppu,
fu tirchju a non finiri e quantu fici è troppu.
Io misi su famigghja cu bona ‘ntenzioni
volia u nci dugnu tuttu comu si cumbeni;
a paura mia futtuta nommu i viju poi ngrassari
portau u mi ritegnu, non nci dezi di mangiari.
Nu pezzu i pani tostu, ammogghjatu dintra all’ogghju
era quantu nci toccava e dicendu: accussì vogghju,
manteniviti siccagni, belli asciutti e netti
i grassi no su boni mancu nte cugnetti.
Volia mu li viju felici e maritati
mi li ritrovu suli, grandi e scunzulati
Pe quantu bedi sugnu no trovaru i maritari
na bella dota ancora a cuntinuanu a disiari.
Nto cirivedu si ficcau na cazza i fisima
chida brutta scornacchjata i coraisima
che per sportuna mia m’è mugghjeri
ma scigghjvi, e no pozzu tornari arredi.
Volia u si vesti cu arrobba bona i lussu
no sapendo ca chistu ruppi u mussu.
A fazzu u vaci vestuta cu panni vecchj
cusì na guerda nudu e no mi prudi aricchj.
Dicitimi pecchì io sugnu i mali di lu mundu
tantu lavuraturi, ma sempri vacabundu.
Si sapi ca la genti a ncunu a mu nci ancurpa
cu mia si la pigghjaru e mi misaru subba a furca.
Ncorcunu va dicendu ca aju di moriri
pe dari a l’atra genti modu di godiri.
No n’ammucciativi però arredi o crivu
si sbagliatu poi trovati u vostru cridu.
Nzollurrtimu ti dicu, cumportati cu prudenza
assorvimi o cundannami ma sulu cu cuscenza.
Tu no mi stai a sentiri? Ma tantu no fa nenti
ccà, attornu a mia mentitivi tutti quanti,
mammi, figghj, niputi e puri i patri;
ca io no su certu peju di tant’atri!
Tiratila sta corda, mo chi vinni l’ura,
cumbinti comu siti ca di cchjù a vostra dura!
Si accussì stavi scrittu, vi fazzu cchjù contenti,
curcatimi subba o luci e vrusciatimi nta nenti.
Cu nudu mi la pigghju e menu ca cu ttia,
s’è chistu è mio distinu, sia fattu, e cusì sia.

 
Torna ai contenuti | Torna al menu