Menu principale:
U ricordu
No penzari o tempu chi passau, no po' tornari,
guarda sempri avanti e cuntinua a cuntari
i guerri chi facisti mu ti poi accaparrari
na fetta di paisi mu ti duna i chi mangiari.
Viatu ti facisti na bona nominata;
non avivi tortu, era giusta a trovata.
Duvi passavi tu a terra tremava,
no nc’era omu chi no si votava.
Certu ca cu lu pettu accussì grandi
desti cunzulazioni a tutti quanti;
puru u scemu du paisi ti perciau
ca la grandizza sua ti mbacilau.
E nta li gambi cusì tundi e tosti
no poi cuntari li vastuni chi stringisti.
E chi diri di ssa vucca russa, grandi e duci
chi s’incollava i ncodu peju di la pici.
Certu, mo chi si vecchja e arripicchjata,
penzandu a com’eri, no ti passa la jornata;
cunzolati o penzeri di quantu ndi facisti,
ca pali ammenza a strata mancu ndi dassasti.
I cummari
Assettàti davanti a lu postedu,
no senti chi diavulu i ribbedu!
Possibili ca non hannu nenti i fari
sti quattru petteguli di cummari?
U primu penzeri chi hannu da matina
è mu vidinu cu fuji e cu camina.
‘Ndannu pe tutti, cumpari e parenti,
peccui avi tantu e cui non avi nenti.
Si ti pigghjanu ‘ncaccia non hai riparu
ca ti tessinu comu a tila a lu tilaru.
‘Nzoll’urtimu a cù pigghjanu di mira
a mpari nToni, a chidu chi non ci tira.
Va cercandu sulu affettu, u povaredu,
ma havi la gurza grandi, quantu nu cistedu.
Nc’è sempri ncunu prontu u s’appofitta,
mu ti riduci comu la malanova chi ti jetta.
Vidistivu passari cummari Catarina
a niputi da canata i Cuncettina?
A cumpari nToni vaci u trova, chi vi pari,
ca cu quattru gnocculi nci futti li dinari.
Ma quandu l’amaru s’accorgi e si ripenti
è troppu tardu ormai, resta sulu e senza nenti.
Ogni fattu chi succedi è sulu nu pretestu
mu ndi fannu na cummedia ad ogni costu.
U tempu ntantu passa e veni l’ura du mangiari
tornanu a casa pecchì hannu i preparari.
Ma mancanu pe pocu, no v’ammariati,
prestu a lu postedu si ritrovanu assettati,
mu ponnu seguitari, ca pari na jestima,
tutti li discursi chi no pòttaru fari prima.