![]() ![]() |
Omaggio ai poeti bellunesi. Senza nessun scopo di lucro. |
I sogni mei d Amor Dov eli mai finidi i sogni mei d’amor, ke dentro i me stéa streti inpienindome sto kor? An dì ke li vivée, par tèra i ò katadi, kome tokét de viero in giro semenadi. O' zerkà de ciorli su, postando kuei tokét, ma.. i oci avée nebiadi e .. te l kor, avée sol fret. E dès ... pì no rikorde, dès ke no te sé pi al me fianko, se mai te avese dit ke sognée de basar mi l to primo kavél bianko. |
Al pare de Cencio Al pare de Cencio Rikorde... na festa de Alpini pok dopo la guera. Na zornada de sol, bandiere, medaie e tanti kapèi. Piume pì longhe e pì kurte, parole dite e skrite te la piera par rikordàr kuei ke no era tornà. Saludi, basi, kanzon, gòti de vin, an bocéta ko l kapél d Alpìn e... no so desmentegàr kuel Pare gnenst da lontàn, in bicikleta, na braga fermada da na moléta, an barét te la testa bisa, in man na fotografia, konsumada... al giréa da tuti a domandar: "Avéo vist al me Cencio? Parké... l deve tornàr" |
Kredéme Al tenp l é gramo piove e fa fret, pur, te la strada, i à bandonà n kagnet. Kol vede ke riva na feména, an òn, al kore a snasarli, al zerka n paron. Ko kapita n bocia l é tut na matana, al kor vanti indrio po, al zerka na tana. L é tant picnin! l à i dent da lat, al kareze, l é kontent ke l soméia fin mat. Al me varda, l me studia, al me leka le man... kredéme! No s é pì soli...se, par amigo, se à n kan. |
Dal Monte Serva Sentada in zima l Serva, varde l me Belùn. Na strisa, fata kome par kaso, l inpienìs de bonbaso la val. La Piave la slusa, la par an nastro d argento, la fa doi svoltade po dentro l bonbaso la va. Me par de sentir, de la Piave, al parlàr. La parla de guera... Ge gnen al magon... no la pol desmentegàr Guera... Vitoria... parole e numeri pa i libri de storia! Ela, la rikorda kuei Bòce Taliani ... Todeski... ke te le grave i é restadi e ela, par ultima, li à basadi. |
Na kotola de gramolon O' katà, dentro n kaseton, na kotola, vela, de gramolon, no la sa da romàtiko la sa... da bòn, I à I odor de tante staion. La sa... da tera svangada, semenada, da erba pena taiada, da fien, da fior, la sa d amor. La sa da lisia reséntada te l boion, da setce de akua portade ko l zenpedon, da skiz de polenta misiada sora l larin, da brustolìn, da pan, da lat, da koàde de tosàt. la sa anka da skei sudadi in tere foreste, da sogni sofegadi, da lagreme skondeste, da guere... da feste, da mese e funzion, da storie e kanzon, la sa... da bòn! Da radis, la sa, na kotola kosita, da radis nostre, kuele, ke ne à dat la vita. |
Bressan -
Bridda -
Cela -
Comiotto -
Crespan -
Dal Molin -
Dal Pont -
Dal Poz -
De Bona -
Neri Noro - Pellegrini - Perera - Prest - Sacchet - Secco - Tavi - Tissi - Tramontin - Al Zenpedon |
website by nònobèpi 1998-2007 - Tutto fai da me o quasi :-)