Si consiglia una risoluzione video 800 x 600
Terremoto 1968
versi di Bernardo Scalisi
poeta dialettale vitese
1ª
Lu quattordici di innaru nni resta a menti
stu terribili precipiziu chi successi
nta li provinci di Trapani e Girgenti
lu tirrimotti fici gran prugressi.
Lu corpu fu di notti e cchiù putenti
e ognunu nun guardannu cchiù nteressi
picchi di Muntivagu finu a Vita
cu fici ntcmpu si salvau la vita.
2ª
Vi parlu di S. Margherita
di Poggiureali e di Salaparuta
quanta povira genti persiru la vita
in rnezzu a li macerii seppelluta.
A S. Ninfa c'è nna gran ferita
e Gibellina è tutta scumparuta
e li paisi vicini veramenti
semu tirrurizzati di spaventi.
3ª
Trimau la terra e cchiù trimavanu la genti
e lassamu li nostri casi tutti quanti
li scossi si sintianu cuntinuamenti
e nui priavamu a tutti li Santi
ognunu nun pinzava proprio nenti
pinzava sulu di tirari avanti
cci foru tanti poviri nuccenti
chi persiru li matri a ddi mumenti.
4ª
Tutti partemu pi l'accampamenti
di lu paisi vicini o distanti
tutti partemu a fari barraccamenti
cu tili da tenna o tiluna pisanti
e nta li macchini quantu povira genti
ca di lu friddu eranu trimanti
e si facia ogni notti focu ardenti
pi riscaldari a nui povira genti.
5ª
Ringraziamu a lu nostru Prisidenti
di la nostra Riggioni Siciliana
chi ccu li so palori cummuventi
la firita di lu cori nni la sana
lanciau lu sò prugramma a tanti genti
chi partiri vulia in terra luntana
lu dissi puru nta lu gazzittinu
picciotti nun lassati stu iardinu.
6ª
Stu iardinu ringrazia li Nazioni
chi nni mannaru robba, sordi e pani,
e nni livaru tanta cunfusioni
a li terrimutati Siciliani
nta li strati c'era tanta cunfusioni
di carri furisteri e Taliani
vinianu tutti quanti priparati
cu ruspi e trattura carricati.
7ª
Ringraziamu puru li forzi armati
chi li primi di tutti hannu vinutu
di viviri e indumenti priparati
e miricinali pi darini aiutu
vinniru puru cu li so surdati
cu lu curaggiu tantu risulutu
purtaru puru li so carri armati
pi abbattiri ogni muru demulutu.
8ª
E tu o sommo Dio onnipotenti
capu supremu di tutti li Santi
pirduna li nostri lingui assai taghienti
chi ti hannu offisu cu modi mpurtanti
nni miritassimu nta lu focu ardenti
pi essiri abruciati tutti quanti
nni tirasti l'aricchi leggermenti
cu la to manu santa e pisanti.
9ª
Vi chiedu scusi signuri e Presidenti
si li me versi nun sunnu cunsunanti
nun sugnu nne pueta e nne studenti
sugnu di qualche cosa dilettanti
ddocu potti arrivari la me menti
e tirari nun potti cchiù avanti
fazzu la fini e nun pighiu chini mprisi
e iu mi chiamu Binnardu Scalisi.
