Rèba e Còl, consorele co La Plié

Còl e Rèba, consorele co La Plié

Stòria 1940

Con jenè del 1940 i Benefiziac' de Larcionei, Andrac', Ornela e S. Jan i deventa Curazie col muot, da pert dei curac', de maridé, batié e dé fòra autri Sacramenc'. Resta a scior Plevân l'autorité de mâte via i mòrc'. Muda direzion l Decanat cânche, de setembre del 1964, Sua Santité Paul II°, l muda sù troc' tièrmegn nte le Diòzeji d'Italia. Nterescèi al fat l é ence i Decanac' de Ampâz e La Plié, che, senza damané l parer de la jent, i ven destachei da Persenon per passé sot a Belum. Davò centenèi e centenèi, con prevesc da lafòraite, con jovegn che jiva a studié ntel semenare de Persenon, co na vita de gliejia outada duta nfòra, co na caraterisazion de vita trop a la todâscia, se muda del dut direzion: i prevesc i ven da sotnsù nten ambient trop nautramente e i jovegn i va njù a studié da preve. Ncuoi come ncuoi mância troc' prevesc. No n à plu suo curat Ornela, S. Jan, Andrac', Larcionei; no n à plu suo Capelân scior Plevân da la Plié; resta demè trei prevesc soi: un a Rèba, un a La Plié e un a Còl. I mudamenc' nte la vita da vignidì i é gragn assè. N ressent la Gliejia e l domân l no ciala fòra per nia ciaro...