S. Ana

La Madòna de Rosare

Le statue
Mân mân che se se muof amez gliejia ju, se nconta le statue de S. Antòne da Padoa, de S. Ana e de S. Ijep su la dârta e de S. Luigi, del pièrgol e de la Madòna de Rosare su la ciâmpa.
Câle nò soura i autèi i é mpoiade su na bela corona ntaiada ite co nen ciel autertânt da zìzore. L medemo I vèl per el pièrgol. No n é plu muot da savei polito se i é dute del medemo artist badiòt Franz Tavella vignù fòra da le bèrcstòt da zuplé de Ortijei, ulache l â rafiné suo talent. No s'â degun document che disc de chi che i é. Segur l é che la scòla l'é très la medema. Chi che ncapisc ite de zuplé i po n tò fòra senza falé le linie artistiche del autor: musc e deic' mègri, nfossèi, duc' pel e òsc, de tropa esprescion. Per fè n ejemple, sui pareis del pièrgol doi vangelisc', refac' ite davò la vièra, i ciala fòra del dut ndiferente. S. Antòne da Padoa, frate francescân del XII° centenè, l sta a recordé la predicazion, 1'orazion, i suoi troc' miracoi n inom de Signoredio. L é l unico che no ven mèi porté n prozescion ncuoi. S. Luigi Gonzaga, joen de fameia nòbile de la seconda mesa del XVI° centenè, nsegné via nte la court de Filipo II°, l é mostré a deit da tò come ejemple per sua vita dada ai autri. L â lascé pièrde n comedo vive da scior per jì n convent e per core n aiut dei malèi de peste a Roma. Nânter lori l muor che l â demè 20 agn. Da la Festa del Signour i lo pòrta n prozescion chi che i â trat la coscrizion. S. Ana, Mère de la Madòna, l'é da ejemple a dute le mère. Franz Tavella, con câsta statua, l ava vânt l prum premio de scultura de la zité de Inspruch l ann 1893; l lo disc la scrita ntaiada ite sul zòcol. L pièrgol, a vòt fazade, I é mpoié su per na losena del parei. L â ntaièi ite i 4 Vangelisti, le Taule de la Lege de Mosé e Gejù bel nta mez. L é n bel laour, nia da mânco de le autre statue de sânc'. Dilongia la sciala del pièrgol, decâ del auté de la Madòna, pro l batistero, l é na plòta de mèrmol n ricòrdo de la mòrt e sepoltura nte la gliejia del nobile Georg Felix Mayrhofer de Koburg, che l eva sté capitân ntel ciastel d'Andrac', e de sua fâmena Ana Maria Wenzlin de Kirchegg.A chi temp se usâva mâte via le persone de inom (prevesc, vichèresc, capitagn,...) nte gliejia. L é demè del 1679 che scior Tita De Sisti l ciapa da la comiscion (vâscovil) l permesco de splané fòra le buje dei mòrc' a na mòda da no mossei vedei chi gòlbri che sta mèl soura ògni monument, mascima nte gliejia, e l pò nsalejé ite l fonz bel zevil. Le 14 piture a òio de la Via Crucis i é del pitor Alessandro Dejaco da La Val. Daite de le mâscole n mèrmol de Vicenza sul maron se rua prò câl gran auté.