CALFOSCH: da plu de 150 agn (1668- 1827) a le dependânze de la ploanìa da La Plié. L'Auta Badia (Corvèra e Calfosch) i é trés stade trop damprò con Fodom

CIAURÌ: plu de 500 agn, fin a Napoleon, sot a La Plié. La jent la se spostâva dan luoch al auter de devozion plu de câl che se penson ncuoi

Stòria 1454

Del 1454 la gliejia la la ven refata sù e refata fòra da nuof. L é agn stentousc. L é agn de vièra ntra Sigsmund, cont del Tirol, e i doji de Venezia. No ven sparagnada gnânca la gliejia. Da plu generazion, a one, rua le sfuriade de la muorìa neigra. La popolazion la se njenegleia davânt ai Sânc' de la Peste, la fèsc ògni sòrt de sacrifizio speran ntel aiut e nel perdon del Signour, la se scrif ite nte confraternite: câla dei Batus, dei Flagelânc'..., la nventa nuove prozescion e novene; dut sòrt de devozion che toma jù nte chisc ultimi agn. Del 1603, cânche l é vâsco l prinzipe dei conc' de Spaur, ven tignù l Sinodo Diozejân de Persenon. Ven dezedù n gran Decanat "cis et ultra montes" che l tòl ite la ploania da La Plié, de Marebe e de Fascia. Deventa degân ncan un e ncan l auter dei trei plevâns. Tocarà a câl da La Plié ester trope oute degân.