Sporti Shqiptar, 21 dhjetor

"Dëbora" bardheblu mbulon Dinamon

Kampionët shkërmoqin 5-1 blutë në një ndeshje me shumë episode

Aurel CELIBASHI

Tirana - Dinamo 5-1

Tirana: Egbo 6.5, Dede 7, Dabulla 7.5, Hajdari 7, Lici 7.5, Patushi (Tafaj 57') 7, E.Bulku 7.5, Sina 7.5, Muka (Prenga 75') 7.5, Fortuzi 7.5, Halili (F.Xhafa 65') 7.5. Trajner: M.Josa.
Dinamo: Lika 6, Pisha 6, Gallo 6, E.Xhafa 6, Ahmataj 6.5, Bakalli 6.5, Qosa (Ishka 46')(Xhihani 53') 6, Dhëmbi 6.5, Ziambo 6.5, Tiko 6, Qorri (Poçi 30') 6. Trajner: S.Demollari.

Shënues: Fortuzi 12' (11-m), Muka 25' (11-m), Dabulla 27', F. Xhafa 68', 72'/Bakalli 60'.
Gjyqtarë: B.Pashaj, L.Çuko, G.Maloku (Tiranë).
Kartonë të verdhë: Dhëmbi, Tiko, E.Xhafa, Ziambo, Sina, Dede.
Karton i kuq: Pisha

Minutat e lojës

1'- Sinjalin e parë në drejtim të portës e jep Qose me një gjuajte nga jashtë zone, e cila gjen Egbon në gatishmëri.
3'- E.Bulku ekzekuton një goditje dënimi nga jashtë zone, por topi përfundon jashtë.
7'- Muka kroson nga goditje këndi, por largon topin me kokë Tiko, kroson sërish Patushi dhe sfera përfundon jashtë.
12'- Muka shpërthen në kundërsulm, pason për Sinën në të djathtë, i cili kroson për në zonë, por Pisha prek topin me dorë. Për vijërojtësin ishte penallti ndërkohë për gjyqtarin kryesor goditje dënimi. Pas konsultimit të dy gjyqtarët bien dakord për 11-metërsh në favor të Tiranës. Gjuan Fortuzi dhe gol. 1-0 për kampionët.
15'- Qosa kroson nga goditje këndi dhe Ahmataj për pak nuk barazon kur godet fort dhe topi përfundon ngjitur me shtyllën.
20'- Muka shmang bukur Bakallin dhe Gallon, pason për Halilin, i cili shpërdoron një rast të pastër për gol kur gjuan keq me kokë.
25'- Muka pason për Fortuzin brenda zonës, i cili gjuan dhe topi përplaset sërish në dorën e Pishës. Gjyqtari Pashaj nuk heziton të japë penalltinë e dytë, ndërkohë që largon me kartonë të kuq Pishën e irrituar. Këtë herë penalltinë e ekzekuton më i miri në fushë, Devi Muka dhe gol. Në pak minuta bardheblutë kryesojnë 2-0.
27'- Goditje dënimi në afërsi të zonës. Pas një skeme me tre pasime Dabulla i ndodhur brenda zonës nuk e ka të vështirë të shënojë golin e tretë dhe të shpërfytyrimit të dinamovitëve.
33'- Ahmataj kroson nga e majta për në zonë, por Dede largon topin në çastin final.
41'- Shpërthim tjetër i Mukës nga mbrojtja në sulm, nxjerr të lirë Halilin brenda zonës, ku dibrani me një top parabël çon topin drejt rrjetës, ndërkohë që Poçi e largon atë dhe për të gjithë u dha pamja e një goli më se të rregullt, ndërkohë për gjyqtarin nuk ishte. Topi mbetet në zonë, Lici gjuan me kokë, sfera përplaset në tranversë, në rrëmujë e sipër gjuan Fortuzi dhe largon mbrojtja dinamovite e çoroditur.
45'- Fortuzi pengohet me faull jashtë zone dhe goditje dënimi. Gjuan vet protagonisti dhe topi përplaset në murin mbrojtës.
47'- Halili kroson nga e djathta, ndërsa Xhafa largon topin në momentin final. Halili rimerr sërish topin, depërton vet në zonë, pengohet dhe gjyqtari nuk jep një penallti të pastër, ndoshta i ndikuar nga dy të parat që kishte dhënë.
55'- Lici shpërthen nga e majta, nxjerr Sinën të lirë në zonë, i cili gjuan fuqishëm jashtë.
60'- Bakalli nga jashtë zone gjuan fort dhe topi përfundon në trekëndëshin e Egbos. Dinamovitët shkurtojnë diferencën në 3-1 dhe kanë shpresa për më shumë.
62'- Sina kroson nga e djathta për Halilin në zonë. Sulmuesi gjuan me kokë dhe Lika bën mrekullinë duke e pritur topin në dy kohë.
65'- Lici pason për Tafajn në të majtë, i cili menjëherë kroson për Fortuzin brenda zonës. "Zogu" gjuan keq dhe humbet rastin më të pastër për të shënuar golin e katërt dhe të dytin personal.
67'- Kundërsulm i kampionëve me protagonist Mukën, del i lirë në afërsi të zonës, gjuan në formë parabël, por fati nuk është me të, sepse topi përfundon ngjitur me shtyllën.
68'- Sërish sulm i Tiranës me Mukën, pason për Fortuzin, i cili pas disa tentativa nxjerr të lirë Fjodor Xhafën të porsafutur në lojë dhe vlonjati nuk fal, duke shënuar golin e katërt.
72'- Sërish Fjodor Xhafa tregon klasin e tij kur me një top parabël gjen të papërgatitur portierin Lika dhe gol. Bardheblutë thellojnë golavarazhin në 5-1.
80'- Tafaj gjuan keq nga jashtë zone, pas krosimit të Bulkut nga e djathta dhe topi përfundon jashtë.
85'- Tiko nuk përfiton për të shënuar gol pas një rrëmuje në zonë dhe pret i sigurt Egbo.
88'- Kundërsulm i Tiranës me Fortuzin që konkretizohet me një goditje të bukur të Sinës, e cila kalon gjithë pasqyrën e portës.
90'- Lici pason për Tafajn jashtë zone, 32-vjeçari gjuan dhe Lika grushton bukur topin.
92'- Prenga kroson saktë nga goditja e dënimit, por sulmuesit bardhelbu nuk përfitojnë për ta shtyrë topin drejt rrjetës dhe Lika sërish largon topin me grushte.

Komenti

Tirana dërrmon Dinamon 5-1 dhe Josa fiton derbin e dytë në pak kohë në krye të skuadrës. Kampionët në fuqi marrin fitoren e 7-të në këtë kampionat dhe udhëheqin të sigurt klasifikimin, me ndryshimin që këtë javë është afruar Partizani tri pikë pas fitores në Kavajë. Ashtu siç pritej ka ndodhur dhe të dyja tifozeritë kanë mbushur shkallët e stadiumit kombëtar "Qemal Stafa". Të dy trajnerët në këtë deri të radhës kishin hedhur në fushë formacionet e tyre më të mira, ku Josa i kishte bashkangjitur Fortuzit dhe Mukës në sulm Halilin. Gjithashtu, në këtë takim riktheheshin në ekip dy të skualifikuarit Dabulla dhe Sina, të cilët janë pedana kryesore në sukseset e bardhebluve. Për sa u takon dinamovitëve, tekniku Demollari me skemën e tij klasike 3-4-1-2 pretendonte që ta zinte në befasi Tiranën. Nuk ka ndodhur kështu dhe janë kampionët në fuqi që marrin njëri pas tjerit iniciativën për gol. Momente delikate që vendosën fatin e takimit kanë qenë dy penalltitë që janë dhënë në favor të Tiranës pas prekjeve me dorë të topit nga mbrojtësi Pisha, i cili më pas ka dalë me karton të kuq. Kaq u ka mjaftuar djemve të Josës për të kontrolluar situatën dhe për ta mbylkur pjesën e parë 3-0, ku Dabulla konkretizon me gol një skemë të bukur nga goditje dënimi. Pjesa e dytë ka nisur sërish e vrullshme, ku dinamovitët hidhen në sulm sepse nuk kishin çfarë të humbisnin dhe gjejnë golin e ngushëllimit me anë të Bakallit. Ndërsa i sapofuturi në fushë, ish-dinamoviti Fjodor Xhafa ka bërë plur e hi shpresat e bluve për një rezultat pozitiv falë dy golave të mrekullueshëm. Duhet përmendur se ndeshja u përshkua nga shumë episode të dyshimta dhe gjyqtarit Bardhyl Pashaj pothuajse i doli nga kontrolli takimi në pjesën më të madhe të lojës. Lojtari më i mirë në fushë si gjithmonë ishte vlonjati Devi Muka. Mesfushori i kombëtares gëzon një formë të jashtëzakonshme fizike, duke qenë "mushkëria" për Tiranën në të gjitha veprimet sulmuese. Kur ka mbetur edhe një ndeshje nga mbyllja e fazës së parë, bardheblutë e shohin veten më të sigurt drejt luftës për titullin kampion pas dy fitorve radhazi në derbi me të kuqtë dhe blutë.

Deklaruan pas ndeshjes...

Mirel Josa, trajneri i Tiranës:"Si në ndeshjen me Partizanin, ashtu dhe sot (dje) me Dinamon kemi zhvilluar një nga lojërat tona më të bukura që kur unë jam në krye të skuadrës. Hymë në fushë me egon për ta fituar këtë derbi dhe ia arritëm qëllimit. Në këtë ballafaqim preferova të luaja me dy sulmues të deklaruar, kjo edhe si rrjedhojë e presionit të shtypit. Penalltitë e fituara dhe dalja me karton të kuq e Pishës na i lehtësuan detyrat tona. Gjithsesi, mund të them se fitorja ishte e merituar dhe nuk me intereson shumë nëse dalim kampion dimri, sepse rëndësi ka që të kurorëzohesh në fund. Që nga ky moment Dinamo është kapitull i mbyllur dhe duhet të mendojmë për Elbasanin të mërkurën."
Sulejman Demollari, trajner i Dinamos:"Nuk më takon të flas për gjykimin, por më vjen më shumë keq për publikun, që doli i zhgënjyer nga stadiumi. Penalltitë patën pjesën e vet në këtë rezultat, duke qenë se përballë kishim dhe një kundërshtar shumë të fortë siç është Tirana."

Të veçanta

- Të dyja tifozeritë si rrallë ndonjëherë ishin mbledhur së bashku në tribunën kryesore dhe festuan me fishekzjarrë përpara fillimit të ndeshjes.
- Devi Muka ka lënë fushën i dëmtuar në rrëzë të kofshëve dhe me shumë mundësi do të qëndrojë pushim për ndeshjen e së mërkurës ndaj Elbasanit. Dita e nesërme, kur do të konsultohet me mjekun Gjika, do të vendosë më shumë në lidhje me shkallën e dëmtimit.
- Në tribunën VIP ishin të dy presidentët respektivë El Sajed dhe Delijorgji. I pari menjëherë pas përfundimit të ndeshjes është larguar i gëzuar drejt aeroportit e ka udhëtuar për në vendlindje.
- Gjatë ndeshjes dy parashutistë kanë parakaluar të gjithë pasqyrën përpara stadiumit dhe më pas janë ulur në kodrat e liqenit artificial.
- Në mbështetje të Tiranës ishin dhe dy deputetë Bamir Topi dhe Dashamir Shehi.
- Përveç shumë reklamave anës fushës, binte në sy ajo e KESH-it, ku dhe drejtori i saj Andis Harasani ishte i pranishëm në tribunën VIP.
- Tifozët e Dinamos pas golit të pestë janë larguar të mërzitur nga stadiumi, ndërkohë që ata të Tiranës kanë gëzuar gjatë në shkallët e "Qemal Stafës".

Korrieri, 21 dhjetor

Kampionati: Tirana derrmon Dinamon

Kampionet forcuan pozitat ne kryesim, duke fituar 5-1 derbin me blute, ne "Qemal Stafa" per javen e 17-te, fale edhe dy penalltive dhe kartonit te kuq ndaj kapitenit dinamovit, Pisha. Partizani, rikap vendin e dyte, pas 3-2 me Besen ne Kavaje. Teuta, jo me shume se 0-0 ne Vlore, afrohet Vllaznia: 3-1 ne Peqin, ku shkelqen Salihi

Bledar KUKA

TIRANE - Tirana kampione, forcoi me tej pozitat e saj ne kryesim te Grupit A1 te kampionatit kombetar te futbollit, pas javes se 17-te, me nje fitore te madhe 5-1 ndaj Dinamos ne Stadiumin Kombetar "Qemal Stafa". Ne kete fitore ndikuan dy penalltite e dhena ne favor te tiranasve, nga ana e gjyqtarit Pashaj dhe nxjerrja me karton te kuq (2 te verdha) e kapitenit dinamovit, Arian Pisha. Ne takimet e tjera, Partizani arriti nje fitore shume te rendesishme ne Kavaje, ndaj Beses, me rezultatin 3-2, Vllaznia kaperceu "ferrin" e Peqinit, ndaj Shkumbinit 3-1, Lushnja mundi Elbasanin ne Kucove, 2-0, ndersa Flamurtari i Ferkos, nuk shkoi dot me shume se 0-0 ndaj Teutes ne Vlore.

Ne "Qemal Stafa" nuk munguan golat, por as polemikat, ne derbin e 110-te mes Tiranes dhe Dinamos. Bardheblute, me perjashtim te minutave te para, ishin me te qarte taktikisht dhe me te vendosur ne dyluftimet per topin e pare, duke rrezikuar disa here porten e Likes. Ne minuten e 18-te, pas nje aksioni te rrjedhshem te Tiranes, Sina harkon ne zone nga e djathta, Pisha nderpret topin me dore dhe gjyqtari Pashaj jep penallti, per Tiranen dhe karton te verdhe per kapitenin dinamovit. Nga pika e bardhe gjuajti Fortuzi dhe shenoi. 1-0 per ekipin kryesues. Rreth 12 minuta me pas, per Fortuzin u dha nje top ne zone dhe sulmuesi bardheblu pasi i shpetoi pozicionit jashte loje (e mbajti ne loje Gallo), doli perballe Likes. Portieri dinamovit e nderpreu topin, por nuk e zoteroi dot, Fortuzi gjuajti drejt portes dhe Pisha serish e preku topin me dore. Serish Pashaj dha penallti dhe kartonin e dyte te verdhe per dinamovitin qe doli me karton te kuq. Por, ne te dy rastet e penalltive, kryesori Pashaj dhe anesori i tij nuk u moren vesh, duke dhene vendime te kunderta, gje qe shkaktoi jo pak tension e polemika. Edhe kartoni i dyte i verdhe per Pishen u dha shume vone. Penalltine per Tiranen e gjuajti Mukaj qe serish shenoi, 2-0. Vetem 3 minuta me pas, Dabulla shenoi golin e trete fare prane portes, pas nje kombinimi shume te bukur te Tiranes (Mukaj-Sina-Dabulla) nga nje goditje denimi. Edhe ketu pati polemika, sepse Mukaj kishte shkaktuar faull ndaj Ziambos (padhene nga Pashaj), para se te jepej goditja e lire per Tiranen. Ne pjesen e dyte, Dinamo arriti te shenonte nje gol te bukur me ane te Bakallit, por Tirana duke perfituar nga epersia numerike dhe hapja e Dinamos ne prapavije, goditi dy here me ane te Fjodor Xhafes, te futur me ne fund ne loje nga trajneri Josa.

Ne Kavaje, Besa kaloi ne epersi qe ne 10' me kapitenin Ypi (350 ndeshje me ekipin kavajas), me nje gjuajtje prirtaz. Braziliani Rocha barazoi nje minute me pas, me ane te nje gjuajtje nga 25 metra larg dhe Abilio i kaloi miqte ne epersi ne 23'. Serish Ypi barazoi me ane te nje goditje me koke, pas ekzekutimit nga e djathta e nje gjuajtjeje te lire. Por ne pjesen e dyte, Partizani qe ishte me kerkues, shenoi edhe golin e fitores me ane te Muzakes nga 16 metra larg, qe mori nje top te paster prej Dorian Bylykbashit.

Ne Peqin, ne nje atmosfere te acaruar, Vllaznia fitoi nje 3-pikesh shume te vlefshem. Kapiteni Sinani ktheu fillimisht ne gol penalltine e fituar nga Salihi. Kjo ne 30'. Me nisjen e pjeses se dyte, Xhahysa perfitoi nga gabimet e mbrojtesve vendas duke shenuar golin e dyte, por peqinasit shume shpejt shenuan me ane te Roland Dervishit. Nje harkim nga e djathta gjeti koken e sulmuesit, qe nuk gaboi. Shkumbini beri shume presion, pa arritur te shenonte dhe ne minutat e fundit, nje kundersulm i dyshes Sinani-Salihi gjeti te papergatitur mbrojtjen vendase. Salihi shenoi fare lehte per 3-1 perfundimtar.

Ne Vlore, Flamurtari nuk shkoi dot me shume se 0-0 ndaj Teutes, ndonese trajneri i ri Ferko u perpoq te ndryshonte dicka. Durrsaket ishin me te rrezikshem, duke goditur edhe shtyllen dhe portieri Dine shpetoi disa here porten e tij nga goli i miqve.

Josa: Tirana, nje nga ndeshjet me te mira
"Kjo ndaj Dinamos, se bashku me ndeshjen ndaj Partizanit, eshte takimi me i mire qe Tirana ka zhvilluar nen drejtimin tim. Jam i kenaqur sidomos nga mesi i fushes, qe i zbatoi te gjitha detyrat dhe luajti shume sakte dhe fort. Kuptohet, dy penalltite dhe dalja e kapitenit te Dinamos, Pisha, me kartonin e kuq, na e lehtesuan detyren, por une them se penalltite jane pjese e lojes. Provuam te luanim me 3 sulmues, skeme qe e dobeson pak mesin e fushes, por lojtaret qe ishin ne kete repart mbuluan gjithcka mire. Persa i perket synimit per te dale kampione te dimrit, me shume rendesi ka te dalim kampion ne fund te kampionatit".

Demollari: Penalltite na prishen krej lojen
"Kur jepen dy penallti kunder, qe ne minutat e para te lojes, eshte shume e veshtire te reagosh. Kjo ndodh edhe kur luan me nje skuader te dobet, jo me ndaj Tiranes. Une nuk dua te flas per gjyqtarin sepse ka njerez qe merren me kete pune. Le te shikojne ndeshjen dhe te dalin ne perfundimet e tyre. Me pas, dalja e Pishes me karton te kuq na la ne inferioritet numerim dhe gjithcka u be thuajse e pamundur. E kishim menduar krejt ndryshe rrjedhen e kesaj ndeshjeje".

Shekulli, 21 dhjetor

Derbi: Tirana shkatërron Dinamon

Bardheblutë (39 pikë) e çojnë në 3 distancën e pikëve nga ndjekësi më i afërt, Partizani (36 pikë)

Altin MANALLARI

Tirana e mban larg Dinamon pas asaj fitoreje shkatërruese 5-1 dje në stadiumin "Qemal Stafa". Kjo ka qenë dhe fitorja në derbin e dytë për Tiranën në dy javët e fundit. Kjo fitore shton edhe bilancin pozitiv të trajnerit të bardhebluve Mirel Josa, në dy përballjet me rivalët kryeqytetas, Partizanin dhe Dinamo. Gjithashtu bardheblutë kanë përmirësuar dhe rekordin e tyre më këtë fitore: 7 fitore radhazi në 7 ndeshjet e fundit. Por, kjo ndeshje nuk ka pasur vetëm vlerat e një derbi, por gjithashtu ajo ka qenë dhe ndeshja më e rëndësishme e kësaj jave të kampionatit shqiptar të futbollit, pasi ishin vënë ballë për ballë dy skuadrat që kryesonin kampionatin. Pas këtyre 90 minutave emocionuese, Tirana udhëheq e vetme kampionatin shqiptar pas javës së 17-të në kuotën e 39 pikëve. Më këtë humbje Dinamo ka zbritur në vendin e tretë në kuotën e 34 pikëve, ndërkohë që tashmë është afruar Partizani (36 pikë) pas fitores 3-2 në Kavajë ndaj Besës. Distanca mes të kuqve dhe bardhebluve kryesues është tri pikë. Të dy trajnerët në këtë derb të radhës kishin hedhur në fushë formacionet e tyre më të mira, ku Josa i kishte bashkangjitur Fortuzit dhe Mukës në sulm Halilin. Përsa u takon dinamovitëve, tekniku Demollari me skemën e tij klasike 3-4-1-2 pretendonte që ta zinte në befasi Tiranën. Nuk ka ndodhur kështu dhe janë kampionët në fuqi që marrin njëri pas tjetrit iniciativën për gol. Momente delikate që vendosën fatin e takimit kanë qenë dy penalltitë që janë dhënë në favor të Tiranës pas prekjeve me dorë të topit nga mbrojtësi Pisha, i cili më pas ka dalë me karton të kuq. Kaq u ka mjaftuar djemve të Josës për të kontrolluar situatën dhe për ta mbyllur pjesën e parë 3-0, ku Dabulla konkretizon me gol një skemë të mrekullueshme nga goditje standarde. Pjesa e dytë ka nisur sërish e vrullshme, ku dinamovitët hidhen në sulm sepse nuk kishin çfarë të humbisnin dhe gjejnë golin e ngushëllimit me anë të Bakallit. Ndërsa i sapofuturi në fushë, ish-dinamoviti Fjodor Xhafa ka shuar shpresat e bluve për një rezultat pozitiv falë dy golave të mrekullueshëm. Duhet përmendur se ndeshja u përshkua nga shumë episode të dyshimta dhe gjyqtarit Bardhyl Pashaj pothuajse i doli nga kontrolli takimi në pjesën më të madhe të lojës. Kur ka mbetur edhe një ndeshje nga mbyllja e fazës së dytë, bardheblutë e shohin veten më të sigurt drejt luftës për titullin kampion pas dy fitoreve radhazi në derbi me të kuqtë dhe blutë. Fitore të rëndësishme kanë arritur dje dhe Partizani e Vllaznia, të dy skuadrat e vetme, të cilat kanë mundur të fitojnë në transfertë. Të kuqtë kanë fituar 3-2 në shtëpinë e Besës, ndërsa kuqeblutë kanë mundur 1-3 Shkumbinin në Peqin. Lushnja është rikthyer te fitorja këtë javë, pasi ka mundur në shtëpi Elbasanin. Ndërsa Teuta është ndalur vetëm te një barazim pa gola në Vlorë.

Sporti Shqiptar, 20 dhjetor

El Sajed: "Luftë" Dinamos dhe Partizanit!

Presidenti takon futbollistët një ditë para derbit dhe shpall haptas synimet ndaj dy kryeqytetasve

Aurel CELIBASHI

Ka qenë ora 13:30, kur presidenti i Tiranës, Metuali El Sajed, ka zbritur nga benzi i tij i zi përpara stadiumit "Selman Stërmasi", ku lojtarët bardheblu kishin gjysmë ore që kishin përfunduar stërvitjen e tyre të fundit para derbit. Arsyeja e ardhjes së egjiptianit kishte të bënte me një analizë të detajuar, të cilin njëshi i klubit kampion në fuqi e kishte merak ta realizonte një ditë para derbit me Dinamon. Faktikisht ashtu ka ndodhur dhe të gjithë futbollistët, së bashku me trajnerët Josa-Zengla-Tafaj, janë grumbulluar në zyrën e sekretarit Shkëlqim Muça.

Analiza fillon me anët pozitive dhe negative
Sapo është ulur në karrige dhe kur të gjithë e kishin rrethuar, presidenti El Sajed nuk e harron zakonin e tij, kur i është falur zotit dhe i ka bekuar të tijtë. Më pas, egjiptiani ka nisur të analizojë atë se çfarë Tirana e tij e zemrës ka dhënë në këtë gjysmë sezoni. Sipas egjiptianit, skuadra ka pasur oshilacione, kur fillimisht e nisi mirë kampionatin me fitore tenistike gjatë kohës që skuadrën e drejtonte Sulejman Mema dhe më pas arriti deri në atë gjendje, sa në katër javët e fundit të fazës së parë të vuante, duke lëshuar kryesimin dhe duke "humbur" Memën. Ardhja në krye e Mirel Josës më pas, për presidentin solli dhe ndryshimin e mentalitetit të lojtarëve dhe rimarrjen e kreut të klasifikimit.

"Sulejman Mema mbetet i respektuar"
Për presidentin bardheblu, ish-trajneri i Tiranës, Sulejman Mema, mbetet një figurë e respektueshme, pavarësisht se ky i fundit tanimë drejton rivalin e përjetshëm të Tiranës, Partizanin. "Siç jemi të gjithë në dijeni, Mema e dha vetë dorëheqjen nga skuadra dhe nuk ishim ne që e përzumë. Asokohe unë ndodhesha në Egjipt dhe më njoftuan vetëm me telefon. Kështu që kur mbërrita në kryeqytet, fola me të dhe më pas u detyrova ta pranoja kërkesën e tij. Megjithatë, për klubin "Tirana", Sulejman Mema mbetet një njeri i respektuar për kontributin që ka dhënë për fanellën bardheblu si lojtar, por edhe si trajner. Sa për vajtjen e tij te Partizani, nëse e mbajmë veten si profesionistë, kurrsesi nuk duhet ta paragjykojmë."

"E dua Shqipërinë më shumë se shqiptarët"
Duke folur për skuadrën e Tiranës, egjiptiani ka theksuar që askush nuk ka të drejtë të nëpërkëmbë emrin e këtij klubit të madh. Ai shprehet se do të "godasë" ashtu siç mund ta meritojë ai që "fut hundët" në punët e skuadrës, duke qenë se ka një dashuri ta pashtershme, jo vetëm për Tiranën si skuadër, por edhe për Shqipërinë. "Nuk do të lejoj askënd që të ndërhyjë në punën dhe planet e skuadrës së Tiranës. Unë, edhe pse nuk jam shqiptar, e dua Shqipërinë më shumë se shqiptarët dhe do të bëj çmos që këtë klub ta drejtoj në majat e futbollit shqiptar dhe atë evropian. Për këtë ekip, në këto katër vjet kam sakrifikuar më shumë se çdo njeri tjetër, për të vetmen arsye sepse e dua këtë klub."

"Kush flet keq për Tiranën, ka punë me babën"
I informuar nga njerëzit e tij më të afërt, se nga drejtuesit e klubit "Partizani" ditët e fundit ka pasur deklarata ngacmuese në media në drejtim të lojtarëve të Tiranës (ishte presidenti Xhani, i cili te TV ALSAT pati deklaruar se do të blej të gjithë lojtarët dhe stafin bardheblu, me përjashtim të presidentit që e ka koleg), Metuali El Sajed egërsisht i është përgjigjur: "Me sa më kanë informuar kohët e fundit, drejtuesit e Partizanit kanë bërë deklarata për shtyp se gjoja do të blejnë çdo lojtar të Tiranës. Me këtë rast, dua t'u kundërpërgjigjem, se secili duhet të mbajë rolin që i takon dhe të mos krijoj panik në skuadrën time, se ndryshe do të ketë punë me babën. Asnjë prej futbollistëve të Tiranës nuk shitet dhe nuk blihet, sepse janë të gjithë janë burra të vërtetë dhe kanë gjak Tirane, duke e dashur fanellën që mbajnë mbi shpatulla. Nuk do të lejoj asnjeri të largohet nga ekipi, për sa kohë të jem president. Për këtë të jeni të sigurt."

"Ne jemi profesionistë dhe jo lypësa"
Sipas El Sajedit, të gjithë lojtarët e Tiranës janë njerëzit më të sinqertë dhe të ndershëm dhe këtë duhet ta tregojnë në këtë sezon. "Të gjithë në skuadër jemi një familje dhe dua t'ju falënderoj të gjithëve për kontributin që jepni, sepse jeni heronj. Qëllimi ynë i vetëm është ta ngremë sa më lart klubin dhe t'u tregojmë të tjerëve se kush jemi. Ndërkohë, për sa u takon fjalëve të njerëzve me qëllime dashakeqe, unë do të mjaftohesha me shprehjen e vjetër, "qentë le të lehin, karvani të ecë përpara". Ne jemi profesionistë dhe jo lypës, që do të thotë se do të punojmë akoma më mirë nga ç'kemi bërë deri tani, pa i marrë për bazë diskutimet boshe të atyre që kemi pas."

Egjiptiani këshillon...
Sikur të mos mjaftonin këshillat që trajneri Josa u kishte dhënë lojtarëve në stërvitje, dje presidenti El Sajed, nga ana e vet, si një njohës i vjetër i lojës së futbollit, u deklaroi futbollistëve: "Këshilla ime për lojën do të ishte që ta godisni portën nga çdo pozicion, pasi jam i sigurt që, në katër gjuajtje, njëra do të jetë gol."

Presidenti "prek" në sedër sulmuesit
Analiza e presidentit El Sajed arriti deri aty, sa ai të fliste një për një me katër sulmuesit e Tiranës, Fortuzin, Xhafën, Halilin dhe Merkoçin, duke u kërkuar atyre sa më shumë gola. "Më vjen çudi sesi në ndeshjet e fundit nuk keni shënuar ju, sulmuesit, por një gjë të tillë e kanë bërë mesfushorët, si Muka, Bulku dhe Lici. Ju jeni katër sulmuesit më të mirë të kampionatit shqiptar dhe unë i pres golat prej jush, sepse jeni goleadorë klasi."

"Qan" edhe dy pikët e lëna ndaj Teutës
Dëshpërimi i egjiptianit ka qenë i madh për barazimin e fundit të Tiranës ndaj Teutës, sa që deklaron: "Nuk e mora vesh se çfarë ndodhi me ju ndaj durrsakëve, me aq sa pashë dhe mora vesh. Teuta ishte në nivel të dobët karshi nesh dhe ju nuk mundët dot të rrëmbenit fitoren dhe lëshuat dy pikë të çmuara në rrugën drejt titullit kampion. Gjynah! Gjynah! Gjynah!"

Nuk harron të lyejë "rrotën" para derbit
Edhe pse i mërzitur për dy pikët e lëna në Durrës, presidenti bardheblu nuk ka harruar të firmosë listën e lojtarëve që do të përfitojnë shpërblimin prej 30 mijë lekësh të reja për fitoren 1-0 ndaj Partizanit. Ndërkohë, pas stërvitjes së djeshme, kampionët në fuqi kanë marrë edhe rrogat e prapambetura që klubi u detyrohej. Secili prej lojtarëve dhe stafi ka mbushur xhepat me një shumë prej afro 90 mijë lekësh të reja.

"Ndaj Dinamos dua 11 luanë"
Në fund të deklarimit të tij të gjatë, njëshi bardheblu ka folur edhe për derbin e sotëm me Dinamon, ku u ka kërkuar lojtarëve të tij vetëm fitore. "Ndaj Dinamos dua që në fushë të shoh 11 luanë dhe që nga minuta e parë deri te e fundit dhe t'i luftoni dinamovitët me çdo mënyrë. Kërkoj gjithashtu që të dëgjoni këshillat e trajnerit dhe sot të nxirrni në pah shpirtin luftarak tiranas. Te secili prej jush kam shumë besim dhe jam i bindur se keni për të nxjerrë një ndeshje të madhe, që të më nderoni mua dhe tifozët që do të mbushin shkallët e stadiumit."

Blic kampionësh: Port-Said ose Kairo, vendi i fazës përgatitore
Kur kanë mbetur edhe dy ndeshje për t'u zhvilluar nga mbyllja e fazës së dytë të kampionatit, drejtuesit bardheblu po mendojnë si gjithmonë se ku do ta kryejë Tirana fazën përgatitore dimërore. Duket se edhe këtë vit kampionët në fuqi nuk do ta prishin zakonin e tyre të stërvitjes në vendin e piramidave. Është pikërisht presidenti Metuali El Sajed, i cili dje, me "ok"-in e sekretarit të klubit, Shkëlqim Muça, deklaroi se faza përgatitore do të kryhet në Port-Said ose Kairo. Sipas drejtuesve, këto dy qytete i kanë të gjitha kushtet që futbollistët të zhvillojnë një fazë përgatitore moderne, sepse edhe kushtet klimaterike janë stimuluese. Për sa i takon datës se kur do të nisen, çdo gjë do të zbardhet pas festave të fundvitit.

Bardheblutë në stërvitjen e fundit para derbit
Tirana, dje paradite ka zhvilluar seancën e fundit stërvitore në pragderbin e sotëm në stadiumin kombëtar "Qemal Stafa" ndaj bluve. Në orën 11:00, i gjithë stafi dhe lojtarët kryen një stërvitje të lehtë të karakterit taktik. Josa u dha djemve detyrat e fundit, megjithëse nuk e përcaktoi 11-shin. Ndërkohë, dje pasdite, në orën 18:00, bardheblutë udhëtuan në drejtim të Durrësit, ku kaluan natën në hotelin "Tirana Park". Sot, dy orë përpara fillimit të takimit, bardheblutë do të "zbarkojnë" në stadium.

Sporti Shqiptar, 8 dhjetor

Muka: Goli ndaj Partizanit, basti i fituar

Vlonjati e kishte parandier se do të shënonte ndaj të kuqve dhe shprehet se kryesimi nuk do të lëshohet

Aurel CELIBASHI

Kishte kohë qe e priste këtë gol dhe tanimë që e ka arritur nuk gjen fjalë të përshkruajë kënaqësinë që ka përjetuar kur e pa topin në rrjetë. Devi Muka, autori i golit të vetëm të fitores ndaj Partizanit në derbin e së shtunës, ishte "këmba e artë" për bardheblutë, sepse shpagoi më së miri humbjen 3-1 të fazës së parë. Hëpërhë, ai është golashënuesi më i mirë i kampionatit, me 9 gola të shënuar në 15 javë, dhe njëkohësisht idhulli i tifozëve të Tiranës. Madje këta të fundit ka arritur t'i "magjepsë" me lojën e tij, saqë një fotografi të madhe mbështetësit ia mbanin në duar gjatë gjithë lojës. Në një deklarim për "Sportin shqiptar", mesfushori i natyralizuar si sulmues rrëfen se e kishte parandier përpara fillimit të ndeshjes se do të shënonte. "E parandieja që do të shënoja ndaj Partizanit, saqë me të gjithë që diskutoja thosha se, nëse më jepet sikur një mundësi e vetme, nuk do ta fal. Faktikisht kështu ndodhi dhe, me rastin e parë që m'u krijua, nuk u mendova dy herë dhe godita në drejtim të portës. Në fillim nuk m'u besua se topi mbërriti në rrjetë, pasi përballë Nallbanit ishte një grumbull i madh mbrojtësish, por oshëtima e tifozerisë më bindi plotësisht. Për mua, gol ndaj Partizanit është një bast imi i fituar që nga humbja e parë që kemi pësuar prej tij, sepse kisha premtuar që do të shënoja që atëherë. Gjithsesi, sipas një fjale të urtë, më mirë vonë se kurrë, prandaj tani dua ta shijoj sa më shumë këtë moment të bukur që po përjetoj së bashku me tifozerinë bardheblu,"- thotë numri 10 i kampionëve. Ky tripikësh i radhës në 6 ndeshjet e fundit, përveçse i ka dhënë Tiranës kryesimin, ka favorin e shkëputjes prej pesë pikësh në renditjen e përgjithshme. Në "erën" Josa, bardheblutë kanë bërë kthesën e madhe, duke treguar supremacinë karshi çdo skuadre tjetër. Edhe pse kampionët në disa momente u tërhoqën mbrapa në mbrojtje të rezultatit, me kundërsulmet e tyre e goditën mbi 5 herë portën e Nallbanit. Por "gardiani" i Partizanit konfirmoi se është një nga portierët më të zotë të kampionatit shqiptar. Për sa i takon një përmbledhjeje të gjithë atij 90-minutëshi, Devi Muka shprehet: "Fitorja ndaj të kuqve ishte e merituar për ne nga të gjitha pikëpamjet dhe askush nuk mund ta vërë në dyshim. Kemi qenë superiorë karshi kundërshtarit, pavarësisht se në disa momente u tërhoqëm në mbrojtje, duke luajtur me kundërsulm. Partizani vetëm dy herë e goditi portën me goditje dënimi, ndërkohë që ne e bëmë një gjë të tillë mbi gjashtë herë dhe shënuam një gol. Nallbani ishte vërtet i pakalueshëm. Me këtë fitore, ne tashmë kemi dhënë leksionin më të mirë se Tirana është një "uragan", të cilin nuk duhet ta ngacmosh, se përndryshe të merr përpara,"- bën të ditur sulmuesi bardheblu. Në dy ndeshjet e fundit ndaj Vllaznisë dhe Partizanit, Muka ka luajtur sulmues i dytë, pas Fortuzit, duke lënë rolin e "regjisorit" në mesfushë. Edhe pse në një rol të ri, "labi" është ambientuar më së miri dhe e sheh veten si kryegolashënues. Në fund të deklarimit të tij, 26-vjeçari shprehet se Tirana nuk do ta lëshojë më kreun dhe ndeshja e radhës me Teutën duhet fituar medoemos. "Gabimin që bëmë në fazën e parë, që lëshuam kreun, besoj se nuk do ta përsëritim më në fazat e tjera. Ndërkohë, për sa i takon takimit të radhës me Teutën, që sot duhet të marrim të gjitha masat që të rregullojmë ato gabime që kemi shfaqur dhe më pas, në "Niko Dovana", të shfaqim një futboll vërtet të bukur,"- përfundon deklarimin e tij mesfushori virtuoz.

Korrieri, 7 dhjetor

Kampionati: Tirana mund Partizanin, arratiset

Kampionet fitojne derbin e madh te kryeqytetit, me gol te Devis Mukajt ne 53', per javen e 15-te dhe largohen 5 pike nga vendi i dyte. Te kuqte goditen shtyllen me Dorian Bylykbashin. Teuta ndalet ne Elbasan, 1-1, Dinamo merr 3-piket ne minuten e fundit me Lushnjen, Vllaznia fiton ne Vlore, ndersa Besa mund Shkumbinin. Vetem 7 gola te shenuar

Bledar KUKA

TIRANE - Tirana fitoi dje ne "Qemal Stafa", derbin e madh te kryeqytetit, duke mundur 1-0 Partizanin ne javen e 15-te te kampionatit kombetar te futbollit. Nje gol i vetem i Devis Mukajt, ne 53' ishte i mjaftueshem per kampionet qe te merrnin revanshin e humbjes ne fazen e pare (1-3) dhe te distancoheshin 5 pike nga vendi i dyte (pikerisht Partizani) ne tabelen e klasifikimit. Madje kjo eshte diferenca me e madhe qe eshte krijuar nga nje kryesues deri tani, ne Grupin A1 te kampionatit. Ne "Ruzhdi Bizhuta", Teuta u ndal ne nje barazim 1-1 nga Elbasani vendas, ne Berat, Dinamo fitoi ndaj Lushnjes, zonje shtepie, 1-0, Vllaznia fitoi ne Vlore, ndaj FlamurtaritBesa mundi Shkumbinin, po 1-0. Ne "Qemal Stafa", ne prani te rreth 12.000 shikuesve, u zhvillua nje ndeshje e ndezur mes dy ekipeve me rivale te kampionatit. Pjesa e pare, me e qete nga nervat, u karakterizua nga loje me sulmuese e Partizanit, por me raste me te pastra te Tiranes, qe u humben perballe Nallbanit nga Ervin Bulku e Lici. Ne te dyja rastet portieri i te kuqve grushtoi. Ne pjesen e dyte, Tirana nisi te luante me fort dhe shenoi me Mukajn, pas ekzekutimit te nje goditje nga kendi, ne krahun e majte te sulmit. Me pas Duro doli nga loja per demtim, por Dorian Bylykbashi thuajse e imitoi ne nje goditje denimi, nga 25 metra larg, por topi i gjuajtur prej tij goditi traversen e Egbos. Serish Partizani rrezikoi me dy goditje denimi dhe me nje kundersulm te shpejte, por qe Abilio e perfundoi keq. Trajneri tiranas Josa freskoi sulmin (Halili per Fortuzin) dhe mesin e fushes (Sokol Bulku per Patushin), ndersa perforcoi edhe mbrojtjen (Pinari per Mukajn). Si rezultat, Tirana u be me e rrezikshme ne kundersulm, duke humbur raste shume te pastra me Halilin e Pinarin. Nervozizmi erdhi duke u rritur derisa gjyqtari Jareci dha dy kartona te kuq: Nje per Dabullen e Tiranes dhe nje per Rocha-n e Partizanit. Gjithcka nisi nga nje faull i Rocha-s ndaj Alban Tafajt, pastaj ky reagoi duke e goditur brazilianin, qe ia ktheu "reston" dhe pasoi me zenken Rocha-Dabulla. Sidoqofte, asgje nuk ndryshoi ne rezultat dhe Tirana fitoi 1-0. Ne "Ruzhdi Bizhuta", Elbasani zhvilloi nje takim shume te mire ndaj Teutes, duke ushtruar vazhdimisht presion dhe duke goditur me shume drejt portes se Shehit. Por pas dy penalltive te realizuara nga Oltion Osmani per vendasit dhe Mancaku per miqte, gjithcka perfundoi ne barazim 1-1. Elbasanasit humben disa mundesi, ndersa durrsaket pretenduan per nje penallti, kur rezultati ishte 1-1, por gjyqtari Janku nuk ishte i atij mendimi. Ne Berat, Dinamo mori 3 pike shume te vlefshme, duke shenuar ne minuten e 91-te me ane te Ligor Tikos. Ne nje fushe jo shume te mire per te luajtur futboll, "vendasit" kerkuan me shume golin, por Dinamo i perballoi mjaft mire. Si pasoje e pervojes dhe e lojtareve me cilesore, skuadra e Demollarit arriti te shenoje pikerisht ne fund. Ne Vlore, Vllaznia ishte e vendosur per te fituar dhe realizoi ne pjesen e pare nje gol shume te bukur me autor Martinin. Ky depertoi ne zone dhe mposhti portierin Dine me nje gjuajtje nga 15 metra, paksa diagonal. Serjani gezoi vendasit me barazimin pas 6-minutash, por talenti i ri, Hamdi Salihi ishte vendimtar per skuadren e Dervish Haxhiosmanovicit. Ne Kavaje, Besa arriti nje fitore shume te veshtire ndaj Shkumbinit, madje thuajse humbi gjithcka, kur nuk realizoi penalltine e dhene ne pjesen e dyte, por sulmuesi Kapllani nderhyri shpejt dhe shenoi golin e vetem te takimit. Kjo ishte fitorja e pare ne fushen e rikonstruktuar te Kavajes, nga ana e ekipit vendas.

Thane pas ndeshjes

Josa: Tirana, nje fitore e shpirtit
"Jam shume i kenaqur nga shpirti i gares qe skuadra tregoi ne kete ndeshje shume t eveshtire. Ne e dinim se do te luhej futboll shume i forte. Ne pjesen e pare jam i kenaqur me lojen e ekipit, ndersa ne pjesen e dyte pas shenimit te golit, nuk me pelqeu nje terheqje prapa me shume sesa duhej e ekipit. Mendoj se e merituam fitoren. Ishim ne qe gjuajtem me shume drejt portes se Nallbanit, ndonese edhe Partizani pati rastet e tij. Nuk mund te behen parashikime per titullin kampion, sepse kampionati eshte shume i gjate".

Tomori: Nuk jam i kenaqur me gjyqtarin Janku
"Ishte nje ndeshje shume e forte, ku skuadra jone beri disa gabime te vogla, te cilat na kushtuan humbjen. Me pelqeu reagimi i ekipit pas golit te pesuar, por nuk realizuam rastet qe patem. U perpoqem te fitonim. Kam pretendimet e mia ndaj gjykimit te Jarecit, i cili duhej te na kishte dhene nje penallti".