Poesie in dialetto

Domìe ani

Preghiera

Domìe ani che Te nasse,
domìe ani che Te va a morir;
e par cossa po', Signor!

'Sto omo ingrato, no' l'à mai capì
quel che l'è el To' patir.

E ancora Erode co' e soò straje
de inozhenti sacrificài,
e quante guere e ingiustizhie
consumàe ogni dì.

Cossa còntee, o Signor,
le promesse par Nadal
se po', suìto el dì drio
le se và a desmentegar?

Banbin Caro, mi Te preghe,
fa' che Erode el se chiete,
e fa' anca che Pilato,
co'l so far indiferente,
no'l se lave pì le man...

(Ester Zanatta Sosero)

Forse no' la xe par Ti
la me zornada:
la xe par le me man
che le tocia nel lavoro
el corajo a la vita.
Forse no' la xe par Ti
la me parola:
la regalo ai tanti sogni
che i se perde via par via
come foje desmentegae.
Ma no' Te lasso par la strada
strassando i passi
che me porta a la rason.

Te sento e so
che la To man me xe vissina
anca se 'l me pensar
se perde
in tuto quelo che me fà cornise.
Te çerco nel suòr de le me ore
e ne la sôpa che me dona 'l pan.
Te vedo nei oceti de un putel
che no' i conosse cativerie
e nel silensio
de la me preghiera
me querse la To luce,
sensa 'ver confin.

(Alberto Albanese Jr.)

A la Madona

Al me Angelo

Credo che no ghe sia Santa più bela
de Ti, Maria, in tuto l'universo:
no ghe xe sol e no ghe xe 'na stela
che staga a paragon; no ghe xe verso
de gran poeti e gnanca melodia
più alta e bela de l'Ave Maria.

El Creator voêa 'na creatura
Inmacolata par vegnér in tera:
el te gà scelto Ti, la Tuta-Pura,
più santa de cussì no ghe ne jera:
pujta, neta s-cieta, trasparente,
nessùn pecà Te gà tocà par gnente.

"Ave" - gà dito l'Angelo, vegnendo
da Ti - "o Mama Santa Inmacolata
del to Signor"..."Cossa te va dizendo?"
te sospiravi, un poco frastornada.
Lu te gà dito: "Vùstu èssar Ti?"
Te gà risposto sùbito de sì.

(Gigi Furlanetto)

Forse no jero gnanca un miliardesimo
de creatura, apena concepìa,
ch'el Padreterno stesso, Lu medesimo,
te gà ordinà de farme conpagnia.
El te gà dito: "Va' co questo qua
e staghe 'tento fin ch'el vivarà".

'Na roba cussì granda xea possibile?
tuto par mi un Angelo Custode...
Nissùn te vede ti, te si invisibile,
ma 'l cuor gà i òci, e l'ànema la gode
cantando mile volte gràssie al Çiel
che un Angelo 'l me dona par fradel.

Custode Santo, sù, coràjo, inségneme
la strada streta, dura, malegnàsa,
e co scapùsso, alora, saldo tégneme,
parché vorìa 'rivar fin ne la casa
del Pare, par godèr l'eredità
che fà beati par l'eternità.

(Gigi Furlanetto)

Preghiera dei putei in guera

Beato Erico

O Mama bea, movi el to veo
in sima al nostro cieo
che mova el vento e caresse
tuti i putei del mondo che i Te vol ben.

Faghe a nina nana ai putei che non ga pì mama
e co assaremo sta Tera e rivaremo in Paradiso
fane a tuti un soriso
e dal pì grandeto al picenin
zogaremo insieme co Gesu Bambin.

(Francesco Smeazzetto)

Te sento viçin
che te scolti,
suppliche sussurrae
da cuori che te prega,
che te domanda
'na grassia.

Col to gran amor,
pusa 'ste orassion,
nel cuor de Gesù.

(Bruna Brazzalotto)

Preghiera del zampognaro

Nadal sensa croxe

O Signor, che da l'alto te si drio vardar
nojaltri pastori qua in montagna a pascoear,
fa che semo sempre contenti
in tei pascoei coi nostri armenti
e che e nostre nenie nataine
e sia de veudo come e stee alpine.

E tii, dolcissima Maria,
varda coi oci de mama 'a nostra pastoria,
daghe ae nostre ance lugoea de l'usignol
par sonarghe e nine nane a to fiol;
manda via daea nostra strada tute e scarogne,
che a Nadal poemo sonar pifari e zampogne,
che a musica che sonemo quassù
a rive a ti e al Bambin Gesù
e che a porte in tuti i cuori pase e alegria.
E così sia.

(Francesco Smeazzetto)

No Te si nassuo
sto Nadal
nessun Te vol,
Bambin Gesù.
Parole, parabole al vento.
Ma parchè su la croxe
a soffrir umilià?
ma chi Te a mandà?
No i vol più vedarTe,
desmentegarse, desmentegarse,
scancear, scancear.
Te si morto
par amor de 'a libertà,
che i barbari
no sa cossa che a sia.
Torna a nassar,
me Picolo Eroe,
torna a nassar
i omeni in croxe.

(Adriano Gionco)

La me zornada

Co' l'é prima matina
m'enzenoce e preghe,
zercando
de farme capir.

Co' 'l sol va zo
m'enzenoce e preghe,
disendo istess
grazie.

(Domenico Della Coletta)

San Liberal

Vecio amigo,
de quando, toseta
in orassion,
Te vardavo splendar
de arzento.

'Desso Te prego,
ancora, a man zonte.
Juta 'sto mondo
sensa pi' fren.

Doname la to forsa
de anima santa,
el to corajo
de gran cavalier.
Slarga i to brassi
su 'sta çità.

Un cuò
te porti, come,
un profumo de fiori,
de vita nova
e mi Te sento vissin.

(Bruna Brazzalotto)

San Liberal, patrono de Treviso

Quando jero cea,
col vestitin novo, vegneo da Ti,
passando par la sagreta
de fianco al campanil.

Ancora 'desso,
Te me speti, a brassi verti.
Pregando, vardo,
'sto cavalier zovane,
tuto d'arzento, e le man.
Quele man:
"Che fermava le bombe",
disea el nono.
Ma chissà de che guera?

S. Liberal, Patrono de la çità,
'desso son qua,
par ricordarTe
ch'el mondo, un cuò,
de tosati come Ti
gavaria bisogno.
Te savarissi parlarghe
a tanti fioi,
che ga perso la fameja,
çità e anema.

Protegili. A xe questa
la me preghiera,
scoltea, parché
Te la domanda
el cuor de 'na mama.

(Bruna Brazzalotto)

Preghiera a San Liberal

Inzenocià ai piè
del to altar,
san Liberal,
Te preghemo
de liberarne
da ogni mal.
Ti che te si stà
un santo guerièro
difèndene
co 'l to scudo
dal demonio
e dal pecà.
Fa' che semo forti
contro le tentassion.

E co' la corassa
de la to fede
fa' che sventolemo
la bandiera
co' la Crose del Signor
e de... Treviso,
che Te ga elèto
so protetor.

E vèrzene
co 'l to amor
le porte del Paradiso.

(Giorgio Garatti)

Note de Nadal in Paradiso

El presepio

La note de Nadal fa fredo anca là,
su un canton del Paradiso
un anzoleto pianse disparà,
le lagrime ghe riga el viso.
Par caso passa Dio par de là,
mettendoghe 'na man sui rissi d'oro
el ghe domanda cossa che el gà
par piansar a sto tesoro?...
"Tutti i Angioleti xe andai presto
a cantar la gloria al bon Gesù;
mi no i me gà volesto
parché so stonà che mai più".
El Padre Eterno fa prestin,
ghe se intenerisse el cuor,
el ghe dise a sto bambin
proprio co' tanto amor:
"Varda, lori xe andai a cantar
e, solo par 'na note,
la gloria de Dio acclamar
co' tante bele note.
Ma el tuo xe un altro destin,
no ti conossi tante bele robe,
parché ti de Gesù Bambin
ti sarà l'Angelo custode".

(Elia De Tuoni)

Sona carillon.
Senti che paçe.
Gira i pastori
torno la capana.

Tuto, risplende!
Xe nato Gesù.

Che tempi,
quando i me cei
te vardava.
Le manine curiose
tocava el presepio.
Pregando co' ti
i cresseva.

(Bruna Brazzalotto)

La Setimana Santa

A man de me nona

Messa cantada, udòr de incenso, palme benedete
e pò, quaranta ore tute adorazhiòn.
Santissimo Esposto,
tosete vestìe de bianco, indenociàe al'Altar,
orazhion 'pena un sussuro, qualche colpet de toss,
la Cesa in penombra,
caminàr pianin, squasi in ponta de piè.
Preti co' la tònega che rasentèa tera,
tanta zent al confessionàl par farse perdonar.
E pò, tàser de canpane,
e la sera dentro aea Cesa, stusàe tute le candèe
el cantar dèe racoète come quando nel'Orto Santo
Giuda 'l traditor l'à basà Nostro Signor.
E la predica dea Passion, la Via Crucis
e la procession del Vènare Santo,
i luminèt inpizhài e baeòn picài ei balcon,
le boteghe tute verte par mostrar la marcanzhìa,
le bacarìe pareciàe
co' i agnèet infiochetài che pì bèi ni i podea èsser,
la zent che se fermèa tuta incuriosìa,
e intanto la procession a 'ndèa,
quel co la Crose là davanti
co' i piè nudi a ricordo de Gesù.
E pò dopo el Sepolcro
e tuti in visita a pregar.
Ma al sàbo de matina, i cuori tuti in gran atesa,
èco sona le canpane, le ne par desligàe,
la è gloria, la è ressuression,
dai, cèi bagnève i oci, l'è risuscità 'l Signor.
La fede se rinova, el sol intiepidisse,
se risveja la natura, fiori da par tut
e zoghi de tosatèi, e sesìe che zòea,
vovi incòeorìi lessài co' erbe nove,
e pò, Messa Granda coi vestir dea festa
e infin tuti insieme
a magnar le fugazhe fate dae mame.
'Ste quà le è le Pasque che ò ancora in testa mì
che le me fa sognar, e no' sò desmentegar...

(Ester Zanatta Sosero)

Che splendor
de stee,
l’aria savea
da mus-cio.
A man
de me nona
caminavo
come sora
‘na nuvola
bianca de neve.
Da la ciesa
me vegnea
incontro
‘na luce,
un calor
che me impeniva
de gioia.
Jera Nadal.

(Bruna Brazzalotto)

El capitel del borgo dea Barisèa

Al sonar dea vecia canpanèa
ogni sera de maio el borgo dea Barisèa
se insenocia davanti al capitel
coa a so Madona infiorada e iluminada.

Un bisbigliar, un sussurar de preghiere,
tose che canta lodi mariane,
un mormorar de aqua de fontana la vissina,
rosari, compagnai da canti de racoete,
i primi incontri, i primi amoreti,
i primi fiori de na gioventù
che sbocia come un giglio e non torna più.

Litanie e vecie filastroche,
par ciapar scarpanse e luciole,
co lumini sui balconi inpissai
e de fiori profumai.

N'altro modo de vivar e sognar,
n'atro modo de amar e zogar;
un mondo de pase e senplicità,
che el progresso de unquò ne ga robà.

(Diego Crosato)

Ringraziamenti a "EL SIL" - Periodico del circolo "AMISSI DE LA POESIA" di Treviso

SCEGLI
PADRE NOSTRO	ASCOLTA, MIO DIO	BENEDICTUS	MAGNIFICAT
CANTICO DELLE CREATURE	ESORTAZIONE di S. Bernardo	VIENI, SANTO SPIRITO	HOME PAGE