 1998 - 2007
 |
| 'Na vecêta Na casa vècia in fondo a na strada na porta scrostada da pióva o da vent an rosèr co na rosa apena spuntàda en scalìn fat de piera fruada dal tenp. 'Na tendina sbiadida, an viero che sgórla barlumi de fogo in zima al larin na tòla, doi banche, na gramola e 'n córlo na vecèta sentàda con gat da visin, le man sui denòci, la testa sbasàda pensieri che pesa ma che s-ola lontan sora paesi forésti, sora strane contràde viste solo te'n sogno te'n momenti de sòn. Tanti dì i é pasadi senza dir 'na parola tanti dì i é pasadi senza veder nesun senza méter an piàto o 'n bicer su la tòla in compagnia del fógo e i pensieri del fùn. Pensieri par i fioi che ramenghi pal mondo e a casa orami no i tornarà pì, solo an scanpon par le ferie d'agosto fùrsi a Nadàl, ma solo tre dì. Quei pochi momenti par ela l'é l sol dopo di frédi e scuri che'l torna a scaldar e quando che i scampa l'é come se 'l ziel de nèole negre se torne a quatar. E resta solo i ricordi del tempo pasà resta solo i ricordi co i éra tosàt che girando descolzi par camp e par prà i era sempre contenti, i ridèa come màt, Resta solo i ricordi de tante fadìghe de tante speranze ma presto finìde resta solo al pregàr e 'n gat da visin i pensieri, e 'l fogo che và sù pal camin. |
La polènta 'Na strada stréta in mèdo a na val fresca l'é l'acqua t'en rui che la canta se te la béi no la pol farte mal la parte lassù te la montagna pì alta; fresche le ombrie de zento e pì piante zento colori tel prà pien de fior zento usèi che sola e che canta zento canson che parla d'amor. An prà co 'na casa coi cóp ormai vécia al fùn tremolante che gnen dal camìn na femena anziana che missia na tecia al fógo che canta t'en vecio larìn. Co l'acqua che bóie pianin come pegra n'antica calgierà l'é sora al larìn l'é negra de fùn, de ani l'é negra quanta gente l'ha vista segnarse al destìn, quanta gente l'ha vist intorno ela sentarse con cuciàri, forchéte e anca le man le storie del dì fra de lori contarse e intant i fèa taser cusì la so fan. Bàt na canpana le ùndese e mèda tel canpanil là in fondo a la val te la calgiera và do come pióva farina dàla colore del sól, brontola l'acqua come fuse contenta s-cisola i s-chiz su la piastra e fa fùn ecco s-cuminza a formarse polènta na roba bona che avón a Beùn gira 'l profumo intorno a la stanza da la finestra se spande là in tóndo an buligón te sent te la panza, un déi profumi, pi sani del mondo, profumo de tèra, de ani pasàdi de sana miseria, autùni de sól, formài te la caneva, salami picàdi de pìche de ùa de quela clintón. àl mescol remèna con vecia pasienza le cróste se stàca ormai man a man i piàti gnen fòra da la vécia credenza e a ogni menàda te crese la fan. brusa te'l fogo i ultimi stéck sbùf de fiadùn profumàdi gnen fòra ti té i respira e te resta la séck e de magnàrla no te vede pì l'ora La polènta l'é pronta, calda e la fùma la gnen revesàda t'en tondo taièr l'é bèla, l'é dàla, l'é come la lùna su gente a magnàrla, con sak de piazer. Gino Tramontin |
website by nònobepi 1998-2007 - Tutto "fai da me" o quasi