1998 - 2007 |
Bosck De Le Castagne 1989 Nèole negre de sora Belùn joze de piova che riva dal S-ciara lagreme ai òci che no ferma nesun de 'na màma in denòcio che dis 'na preghiera. Tant fa 'na stràza che sgorla col vent cussi l'é so fiol 'là t'en bosck de castegne éla lo ciama , ma lù pi nol sent la vita orami pì no scór te le vene. Al cor che se spàca, 'na rabia inpotente l'é tùta an tremar, an zigar de dolor parché no la pol, no la pol pi far gnente a vinti anni cussi, no se deve morir, no se deve cavar 'na pianta apena inpiantada no se spàca i so ran par marzirli par tèra oh òmi bastardi che ogni giornada zerchè dei motivi par farve la guèra. Tùti i di ghe né màme al mondo che piande, tùti i di ghe né fioi a vinti ani che mór, ma l'òn l'é inbezil e mai no se rende, parché masa l'é l'odio, masa poc l'é l'amór. |
I fonghi L'é n sàbo de matina an dì de piena istà giornàde bèle e sane par ndar a caminar Co la me bagolina ai pié doi bèi scarpói vàe verso la montagna par sora de Tisoi camine sû par i còi me infile te i buscàt varde se càte fonghi un solo, e anca màt Ah! No l'é pì come na olta al temp a l'ê cambià bosck ndàti in sciopero e fonghi, pì no dà. Me pense le capèle de quei de castegnèr i fonghi paonàzi che gusto, che piazer i fonghi dài de lares e quei de San Giovàni i finferlét gustosi e profumàdi e sani che mesi te na tecia con cin de òio e ài na feta de polenta e n tòc de bon formai te te sentèa in tòla in pace co sto mondo al profumo te la stanza mandéa in svenimento se vede che l profumo cusì intenso e forte girando par la stanza e avendo vèrt le porte, al ciàpa quela strada girando pian pianin al vent an cin lo pende e l passa al Visentin I snàsa i Veneziani ste ròbe prelibate i carga spósa e fiói la suocera in zavàte sporte sportéte e zest i carga ten furgon e i parte tuti fieri a conquistar Belùn i raspa, i sfrugna, i sfraza ciò sù 'nca la semenza cusi noi poregrami, noi, sion restadi senza. Gino Tramontin |