Menu principale:
Letture
Li Viecchi Mistera.
di “Ferant” Alia.03.07.2003.
Ricuordu sempri cu nustargia
li tiempi passati di la vita mia
mi viennu ‘mmenti tanti pinzera
senza scurdarimi li viecchi mistera.
Lu Carrittieri, era un bellu mistieri
girava li paisi, purtannusi appriessu pissinu li suttisi
ma la sira quannu riturnava
stancu muortu s’agghiazzava.
Lu Cantararu, mistieri tantu stranu
iava a ghittari la fitinzia di lu cristianu
na lu luntanu fumazzaru
cu lu cantaru ammucciatu sutta lu pastranu.
Lu Cravunaru, mistieri di poviru diavulu
mittia ligna na lu fussuni
ci dava fuocu e facia cravuni
pi pua vinnilu cu lu pisuni.
Lu Lampiunaru, mistieri disumanu
furriava cu na lanna d’arsoliu ‘nmanu
acchianava cu la scala ‘nta lu lampiuni
pi dari a lu paisi tanticchia di chiaruri.
Lu Sanzali, mistieri magistrali
difficili di fari
picchì si nun sapia cuntrattari
l’affari era facili satari.
Lu Stagnataru, mistieri tantu caru
‘nvintatu pi sbarcari ‘u lunariu
stagnava pareddi,pignati e quarari di cucina
faciennuli turnari miegghi di prima.
Lu Spazzacaminu, mistieri pocu finu
sempri chinu di fumu cinnirinu
puliziava la canna di lu caminu
usannu un diavulu d’attrezzu chiamatu scuvulinu.
Lu Spiziali, mistieri di miedicu spiciali
ricurria a li midicinali sulu ‘ncasi ecciziunali
curava li malati
cu decuotti e picati.
Lu Vanniaturi, mistieri d’infurmaturi
era pruvettu cantaturi
e ricitava lu cupiuni
pariennu un veru atturi.
Ormai é ‘nnutili pinzari ssi tiempi finieru
e sti mistera pi sempri murieru
e sugnu sicuru ca ‘un tornanu ‘cchiù
iennusinni ‘nzemmula a la me giuvintù.
questa poesia, ha ricevuto il secondo premio al
“1° concorso di poesia dialettale, città di Alia” il 17 agosto 2003