Abate Antonio Martino (1818-1884)
Nasce a Galatro l'8 giugno 1818 da Domenico e Francesca Sorrentino, terzogenito di una famiglia in buone condizioni economiche. Nel settembre 1842 viene ordinato sacerdote nella cattedrale di Mileto.
Nel 1849 viene condannato in contumacia a quattro anni di reclusione per aver "cospirato" contro il regime borbonico. Dal 1850 viene arrestato ed evade ripetutamente. Nel 1851 scrive "La Pasquinata" per il canonicato di Cinquefrondi. Nel 1860 compone "La Calabria a sua madre Italia". Nel 1866 compone "Il Paternoster dei liberali". E' amministratore presso la casa del marchese Nunziante a San Ferdinando, donde in seguito viene licenziato per aver satireggiato con la poesia "La gonnella" contro la marchesa. Nel 1867 compone "L'agonia d'Italia" e "Il testamento di nostra madre".
Nel 1873 viene nominato arciprete di Caridà e sovrintendente scolastico. L'anno dopo scrive "La preghiera del calabrese al Padrenostro". Nel 1879 compone le poesie sacre. 17 marzo 1884: muore a Galatro.
Le sue poesie sono di carattere politico e religioso in lingua dialettale.

DIALOGO TRA IL POETA CALABRESE E IL RE D'ITALIA

Saluti, Majistà... Vegnu tremanti:
non sacciu si su sarvu o su perdutu:
"perdutu" alcuni, e "bravu" dinnu tanti,
"vai carceratu, zìmmaru furnutu".

Lu Paternostru? Eu non vi fici nenti,
nu sulu Paternostru,lu Signuri
ntra l'Ortu fici, santu ed innocenti:
tu lu tradisti senz'affettaturi.

Ma li judei, li perfidi invidiusi,
non tolleraru, e Cristu fu nchiovatu:
e li impiegati notri murrittusi
mi vannu ncaccia, mi vonnu arristatu.

Giustizia, o Maistà, s'aju ragiuni!
"Ragiuni nd'hai per leggi di lu Statu:
cui scrivi verità è vilacchiuni
si temi di qualunqui magistratu.
Tè stu mandatu, e fatti cunsegnari
tricentu liri pe su puetari".

Viva lu re d'Italia e patri caru!
Evviva la sua leggi e lu soi nomu!
Addunca lu sù poeta parla chiaru:
vui siti re daveru galantomu.
finna chi campu scrivu e no la cedu:
scrivu Pregheri, Misereri e Credu!

*********

IL PATERNOSTER DEI LIBERALI CALABRESI SOTTO
LA PRESSIONE DEGLI INGENTI TRIBUTI (dicembre 1866)

O patri nostru, ch'a Firenzi stati,
lodatu sempi sia lu nomi vostru,
però li mali nostri rimirati,
sentiti cu pietà lu dolu nostru,
ca si cu carità vui ndi sentiti
certu non fati cchiù ciò chi faciti.

Patri Vittoriu, re d'Italia tutta,
apriti ss'occhi, ss'aricchi annettati:
lu regnu vostru è tuttu suprasutta,
e vui, patri e patruni, l'ignorati.
Li sudditi su' tutti ammiseriti:
vui jiti a caccia, fumati e dormiti.

Ministri, senaturi e deputati
fannu camurra e sugnu ntisi uniti,
prefetti, cummessari e magistrati
sucandu a nui lu sangu su' arricchiti.
E vui patri Vittoriu non guardati:
vui jiti a caccia, dormiti e fumati.

Cummessi e cancelleri di preturi,
prùbbica sicurezza e abbocati
e speciarmenti li ricivituri
a tutti ndi spogghiaru e su' ngrassati.
E vui patri Vittoriu li viditi:
vui jiti a caccia fumati e dormiti.

Sindaci, segretari e salariati
e cunsigghieri tutti e assessuri,
su latri cittadini patentati:
su idhi li judei, nui lu Signuri!
E vui patri Vittoriu li viditi,
e jiti a caccia fumati e dormiti.

A l'esatturi, poi, lupi affamati,
uh, lampu mu li mina e mu li cogghi,
li roli mu li strazza a mudhicati,
ca quantu furti, frodi, quantu mbrogghi!
E vui patri Vittoriu vi scialati,
e jiti a caccia, dormiti e fumati.

L'agenti di li tassi su' na piaga
cancarenusa supa a lu vidhicu,
sempi la pinna loru scrivi 'paga',
e di li murti loru nenti dicu...
E vui patri Vittoriu non spijati...
Dormìstivu? Mò jiti e cacciati!

E di li sù notara chi cuntamu?
La pinna loru è lanza di langinu,
uh, povaredhi nui si stipulamu:
notaru oji dinota 'latru finu',
tariffa loru è sulu lu capricciu.
Patri, pacenzia, ca mò vi la spicciu,

posati ssu ddubbotti e rifrettiti,
jettati chissu sìcaru e sputati,
guardati chisti piaghi ca ciangiti,
e canusciti tutti li mpiegati.
Certu, si vui guardati, aviti a diri:
mannajia lu fumari e lu dormiri!

E vi accorgiti ca regnati in guerra,
odiatu di lu celu e di la terra.

*********