Come calar la panza caminando...
Alora! chi de voi, dopo la cinquantina, no se ga vardà la panza e
no ga avudo un atimo de panico? Alora se ga zercado de rimediar
calando drasticamene l'introito de cibarie con la conseguenza che
dopo una setimana se ga molado tuto. Chi inveze ga rivà a resister
comunque ga dovu' tenir conto de le feste, cussi' per Nadal,
Capodano e Pasqua se ga fato fora quel che magnassi in una
setimana.
Dopo tanti sacrifici la balanza se ga spostà de un bic' e la panza
xé restada quela de prima, alora cossa se pol far?
Vardando su internet prova a zercar la parola "fitwalking" che no
stago qua a spiegar, tanto xé za tanto in rete che basta anca pel
mus. In pratica se deve caminar, a passo alegro (come quando se va
verso un'osmiza, per capirse), ma senza sforzar e tuto questo per
almeno mezoreta senza interomperse, senò no funzia, per saver se l'andatura xé quela giusta, bisogna sentir la gambe, no le deve esser stanche ma legermente 'ovatade'.
Ma stè atenti a no fermarve in qualche chiosco a farse el tost e
la bireta, senò xé come niente. Mi se go fame magno un per de
carote, che te sodisfa la voia de sgranochiar e te da una
sensazion de pien per un bel mucio de tempo, quel che basta per
rivàr a pranzo o a zena.
In ogni caso se pol anca trovarse de qualche parte e cominciar la
caminada asieme, cosi' ciacolando se fa piu' strada senza acorgerse
e se aumenta i benefici. Se fa caldo porteve una fiascheta de acqua
anche con un poco de limon strucado opur come se fazeva in campagna
co el sol scotava, se meteva un fià de asedo nela botiglia de acqua
e la sede spariva.
Fin 'desso go trovado due percorsi che se pol far abastanza agevolmente in due parti de mezoreta l'una, mezoreta andar un quarto de ora pausa e mezoreta tornar.
El primo xé da l'inizio de la pineta a Barcola fin el bivio per Mìramar e ritorno, el secondo va da la stazion dei treni, su per le rive fin a pedocin e ritorno.
Bon, me par de aver dito tuto, se volé podemo organizar una
caminada asieme, cossì se se conossi e se camina più volentieri.
se ve par ben posso meterve una lista dele giornade che vado.
Saludo tuti, bona caminada!