.gif) |
|
|
|
La storia del dragone
con sette teste |
'Nc'ere na vota, signuri mei, na mamma e nu figghiu poveri de lu tuttu. Non avianu mancu mu mangianu, allora nu iorno lu figghiu, chi ere ormai 'nu giuvanotto, decidiu mu parte mu trova fortuna.
La mamma tutta appagurata 'nci disse:
"Non partire, figghiu, ca ancora si' giuveni e viali viali ti po' succedire 'ncuna cosa e sulu mu 'nci penzo mi sentu male!".
Nci rispundìu lu figghiu:
"No, ma', aiu mu partu! Armeno lu morzo de pane chi hai ti basta pe' tia e eo cerco mu mi 'nde trovo!".
La matina doppo, lu figghiu partìu; caminau e caminau, iorno e notte, ma no' riuscìu mu trova nente: no lavoro né perzuni mu 'nci fannu la carità. Sfinitu e senza forze, quando ere lumi scuru si curcau supa 'na petra; appena pigghjau sonno, si 'ntise toccare la spaja e disse: "Chi boliti, o cummare? Dassatimi stare, ca su' stancu e morto de fami e aiu a mama alla casa chi non ave mu mangia!".
La cummare 'nci rispundìu: "Non ti disperare, tene 'stu porta-zecchinu: quandu hai bisogno cercanci chi boe!".
Lu giuvanotto si lu pigghjau, chiù mu fade mu si 'nde va la cummare ca pe' interesse de lu porta-zecchinu, e si tornau a curcare supa la petra. Quando su rivigghjau la matina, morto de la fami, disse 'ntra de iju: "Dassa mu guardu megghjo 'ntra lu porta-zecchinu si 'nc'è 'ncunu sordo…" ma non trovau nente.
Allora lu guardau fissu e 'nci disse: "O porta-zecchinu meu, staiu morendo de fami! Vorrìa corcosa mu mangiu!".
Tuttu a 'nu mentre, 'nci cumparìu lu bene de' Deo: pani, vinu,suppressati, formaggi. 'M principiu non cridìa, ma poe si mise a mangiare; quandu fude vurdu, penzàu viatu alla mamma e 'mu trova a cija signora chi 'nci avìa rigalatu lu porta-zecchinu fatatu.
Dopo tantu caminu, de luntanu abbista 'nu paisi e penza: "Ja aiu mu vaiu!".
| |
|
|
|
.gif){kind=spacer}
.gif){kind=spacer}