"San Nicola da Crissa" = le più belle storie popolari.
La storia del dragone con sette teste Quando arrivau alli primi casi, vitte fenestre e porte tutti chiusi a luttu; camina 'n'atru poco, arrivau alla chiazza de lu paisi e vitte la porta de 'na cantina 'nu poco aperta. Como nu furmini si 'mbuttau jadintra, allora l'oste 'nci disse: "Chi fai 'ngiru, ca si ti vide ti mangia puru a tia!". Lu giuveni 'nci disse all'oste: "Cu mangia cui?". E l'oste 'nci rispundiu: "O giuveni meo, a mu sapiti ca 'nc'è 'nu nimaliu cu sette teste chi oie a menzuiorno ha mu si mangia la figghia de lu re! Si lu re no 'nci fa trovare la figghia pe' chij'ura 'ntra la chiesi matre, si mangia tuttu lu paisi!". Lu giuveni 'ntise tuttu cu attenzione. A 'nu certo puntu 'nci domandau duv'ere la chiese. L'oste, tuttu appaguratu, 'nci dicìa: "Non jire, ca lu dragoni mangia puru a tia!". No 'nci fu verzo: appena seppe duv'ere la chiese, si partìu viatu, ca menzuiorno ere vicinu. Quando arrivau davanti la chiese, no 'nc'ere nuju e li porte e fenestre de li casi erenu tutti chiusi. Aperìu la porta de la chiese e vitte la figghia de lu re chi ciangìa; appena s'accorgìu ca 'nc'ere puru lu giuvenotto 'ntra la chiese si mise mu grida: "Vavattinde, ca sinnò mangia puru a tia!". Iju 'nci rispundìu: "Non ti preoccupare! Eo mo' mi stendo nu poco ca su stancu morto; quando lu sente arrivare mi chiami.". E accussì fice. Quandu sonàu lu menzuiorno, lu dragoni aperìu la porta de la chiese,vitte puru lu giuveni e disse: "Ah, chi bello buccuni! 'Mbece de unu mi 'nde mangiu dui!". Lu giuvenotto 'nci rispundìu: "Mu ti li mangi ti li poe mangiare, ma prima hai de lottare!". Lu dragoni cu sette teste si mise a ridire e jia avanti mu si li mangia; lu giuveni, allora, aperìu lu porta-zecchinu e disse: "O porta-zecchinu meo, dunami 'na spata 'mpatata mu tagghiu li teste a 'stu draguni!". 'Nci comparìu la spata e 'ncignàu a tagghiare; ma, prima mu arriva a cincu teste, lu dragoni si li tornava a gungìre. Allora lu giuvenotto si rivolgìu ancora allu porta-zecchinu e 'nci disse: "O porta-zecchinu meo, dunami du nimali, leuni e spaccamuntagna, mu m'arrassanu li teste como eo li tagghiu!". Accussì ammazzàu lu draguni. Quando lu re seppe ca 'nu giuveni avia salvatu de lu draguni la figghia e lu paisi, lu voze portatu alla corte e 'nci disse ca, si bolia mu si marita alla figghia, 'nci dunava puru ricchezze e castelle. Lu giuveni accettau, tornau mu si pigghia alla mamma cu 'na carrozza tutta d'oro e si la portau allu castello. Sticeru 'nzemia pe' sempe.  Indietro Indice Avanti