Vai al brano corrispondente in Italiano

Hostes, urbis direptione perterriti, inermes cum infulis se foras portis universi proripiunt ad legatos atque exercitum supplices manus tendunt. Qua re oblata, omnis administratio belli consistit militesque, aversi a proelio ad studium audiendi et cognoscendi feruntur. Ubi hostes ad legatos exercitumque pervenerunt, universi se ad pedes proiciunt, orant ut adventus Caesaris exspectetur. Clamant se captam suam urbem videre, turrim subrutam, itaque ab defensione desistere; nullam exoriri moram posse, quominus, cum venisset Caesar, si imperata non facerent ad nutum, e vestigio diriperentur. Docent, si omnino turris concidisset, non posse victores contineri quin, spe praedae, in urbem irrumperent urbemque delerent. Haec atque eiusdem generis complura magno cum misericordia fletuque pronuntiantur. Quibus rebus commoti legati milites ex opere deducunt eosque impediunt ne in urbem irrumpant.