A Bernardino Belotti

Regorde ol segrestà del me paìs

ün omasset d'ü meter e sinquanta

issé baloss che l's'era facc amis

di contadì che i gh'ess öna quac pianta

per trà col sciop, perchè per du o tri mis,

a l' bandunaa ol sidel de l'acqua santa

per vèss ü cassadur e diertis

a fa passà la zona töta quanta.

A l'gh'era per tabiòt ün ombrelù

co' 'n gir ü tòc de tila pitürada

e in mèss, piantat in tera, ol so bastù:

e l'se metia denacc a ön'önissada

o sota öna filena de morù

'ndo gh'era öna quac sèta pastürada.

I quater gabbie de oselecc de nì

ciapacc de nocc a scür söl campanil,

l'era 'l riciam de töcc i passerì

che lé denturen i pödia sentil:

se ü de chesce pò l'la faa matì

col pondes fò de tir del so fösil,

con töt ol so tabiòt l'indaa visì

adase, adase, per pödì colpil.

Ü dé - com'ela stacia? - in mess a ü prat

in de spostas inacc col so tabiòt

per trà a ün osel, a l' s'è desmentegat

che gh'era 'l foss con l'acqua del melgott,

e... pùnfete, povr'om!... A l'à gregnat,

pondit sö chela pianta, ol passerott.

Versetti dialettali di Piero Terzi (Bergamo)

homepage