Gh'è l Giósep che l' se vanta a cicerà,

e il dis «la me tenuta» a ü toc de bröl,

«ol me palas» a la so bröta cà:

e che l'pöl viv de rendita se l'völ:

del so negosse, pò, fel mia parlà,

a l'ghe guadagna i solcc col pelaröl:

insoma per fa cred che lü l'ghe n'à,

a l' cönta sö di bale fin che l'pöl.

E gh'è la zet che la ghè gregna dré:

e a forsa de sentin de töte i rasse,

i la töl vià per mat o zo de lé.

Ma finalment ü tal (che l'è di basse)

a l'gh'à credit söl serio, e l'oter dé

gh'l'à fina screcc; firmat: l'Agent di tasse.

Versetti dialettali di Piero Terzi (Bergamo)

homepage