A gh'è pensae l'otrer ai depötacc

ch'iè 'ndacc a Roma a i ölteme elessiù,

quase in sessento, come delegacc

di so particc e de la so regiù:

e progetae - sicome a iè obligacc

a vess töcc guancc ai ùrdegn d'ü padrù

se s' pödia risparmià, a la fì di facc,

tep, energie e, magare... di miliù.

Disie: se 'n di elessiù i rièss in vòt,

metém, democristià per Berghem-Bressa,

de òt mandemen vü (che l' vale ergót)

al Parlament, e a chel la sées concessa

la part di sèt, cioè s'ghe daghe in lòt

oneri e onur dei sèt che i se 'ndefessa.

Töcc i particc, íssé, i ridúseress

l'elemento «om» salvando chel «moral»

perchè sto depótat a l' voteress per vòt,

o mei con voto «colegial».

Pensé che bel risparmio che l' saress

per lur... e per la cassa nassional

e quante meno bale i cönteress

sura ön articol, prima de votal!

Ma pò ó scartat de bòt ol me proget

per ol pericol grave che l' prospeta:

se l'se sentess in forsa a per chei sèt,

ol depötat, quando a vergü ghe i pèta,

a l' pöderess copal con d'ü diret!?

E gh'ó pensat ai pögn... di du Paieta!

Versetti dialettali di Piero Terzi (Bergamo)

homepage