20-8-2006

CIONCO...

COSTAUTA - Anche un atrözo da laoro dla vita dn ota com al cionco pö gni un elemöinto artistico e btu zna mostra de scultura.
A Costauta par duto al möis d agosto, ilò dla Ceda dal Comitato, s pö spié la mostra btuda su da Romeo Candido, un artista nasù a Costlisögn, ch à giró par meda Europa e ades iné incedó a Bologna. Li prova a ese creativo zun dute el forme dl arte, da la pitura a la scultura al video, a la poesia. Da nasché ane a sta banda inà fato diverse mostre con tance materiai, cölie ch vögn ciamade "istallazioni", a Berlino, Parigi, Londra e zun nasché zites taliane.
L idea da espone a Costauta se ciama aped al laoro ch zu sto pöis vögn fato da ane par valorisé l arte. Basta pensà a la manifestazion de scultura su lögn, ch iné riveda a la setima edizion e inà insioró el vece cede d lögn con 21 sculture d artiste d valor.
Diverse mostre iné stade fate zi ane pasade zal tabié dla Ceda di Sai, gno ch la Regola inà verto un spazio d esposizion. Ilò st ota iné stade fate dói mostre, una d pitura d Elena Di Stefano e un autra de scultura su lögn de Gianangelo Longhini.
Ma un autro spazio con tanta lus e bögn rifinù iné stó conpletó zal möis d luio zal piön tarögn dla calonga, gno ch inà la sede al Comitato e al Grupo musical d Costauta e ilò Romeo Candido inà btu fora la so mostra intitoleda "Cionco, estetica ed utilizzo".
La sagoma dal cionco iné stada lorada con diverse materiai: plexiglas, lögn, fero, azal, ceramica, töla d lin e disigneda su carta.
L artista inà btu fora zal spazio dla sala d esposizion ste diverse forme e iné riusù a creà la sensazion dal canbiamöinto de sto atrözo, da roba desmantieda zun calche tabié o zna cianua a protagonista dla sena dl arte. Romeo Candido dà al cionco tance signicate, ch fa parte dal so mödo da pensà e da considré la vita di omin, ma lo fa anche somié a na forma primaria de cal strumöinto ch inà invaso al Cadore dopo la fin dla vita contadina: l ucial. Infate li fa somié ch al cionco se trasforme in ucial, come ch fosa la continuazion o l evoluzion dla stösa sozieté gno ch vive i omin dle nostre valade. E la forma ch mostra con pi evidenza sta continuazion tra cionches e uciai iné cöla d na spezie de biestra d uciai, lieda da na fun de plastica con cionco d azal.
Na mostra, cöla d Romeo Candido, ch inà incuriosù e fato discute tanta dente, come ch sozede spöso pl arte moderna, ch pö piadì o non piadì, ma siguro fa pensà.

Lucio Eicher Clere