Collegamento alla pagina "Cadore-Comelico" de "Il Gazzettino"

26-2-2006

Al ciodön di 40 ane dl aluvion ch à fru tance pöide

I desastre dla montana dal 1966
btude pardante ai canai

Cuaranta ane iné pasade da l aluvion dal 1966 e par ricordà sto ciodön i profesores dle sorascole d San Piöro e Sa Stefin inà pensó da dediché un bocon dal studio di canai dle medie proprio a conose cla desgrazia ch inà signó la vita d tante famöi e la tera de sta valada gno ch pasa la Piai. I desastre dla montana d novenbre dal '66 da calch banda s pö ncamò vöde, ma par podöi capì pi polito che ch à fato chi cuatro dis de piova zi pöide su la riva dla Piai e zun chietre su ple coste, gno ch movee el bói, i canai del medie d Sa Stefin cetarà fora zi scrins dle cede el fotografii de chi ane e farà na mostra zla so scola. Apede el fotografii löre tlarà su anche i ricorde di nones e provarà a böti du par scrito zla lönga ladina dal Comelgo. E par continué zla esperienza dle storie de chietre ane, st ota al teatro par ladin avrà come argomöinto la desgrazia dl aluvion, come ch l é stada vivuda da nascuance personage che recitarà in sena el vicende de chi dis.
Anche i canai dle medie d Pardnöi se vizinarà al argomöinto dl aluvion col teatro. Co l aiuto dl ator e regista Claudio Michelazzi, gnarà btuda in pes na rapresentazion scrita da Grupo musical d Costauta e publicheda zal libro
"Racconti ladini", intitoleda "L'aluvion", con zinche atores protagoniste e un coro che comöinta la vicenda a cianta nasché canzogn scrite e musichede propio in ricordo dla desgrazia d inclota. Par la sorascola d San Piöro saraa stada l intenzion da föi na roba pi granda co l ocasion dal ciodön di 40 ane dl aluvion. Era stó btu in cantiör un progeto, insieme al Comun, al Regole e a li asociaziogn dal teritorio, par na mostra, un spetacul, un convegno, da föise intrà dugn e agosto. Sto progeto iné stó mandó a Venezia par otgnì un contributo dla Region dal Veneto, ma ne n é pasó. Alora par volontà di profesores almanco un bocon dal progeto gnarà fato aped i canai. E par föi sintì l argomöinto ncamò pi so, iné stó pensó polito da inbastilo par ladin.

Lucio Eicher Clere


Pagina
"ACCADE A COSTALTA..."

 Pagina
"GRUPPO MUSICALE"

HOME PAGE DEL SITO