13-9-2002

PLATA DI LADINS

L òra dal "desmontié"

Da San Dvane a Santa Cros el vace lasaa...

Sta stmana d setembre se ripete da secui su ple monte ladine dla provinzia de Blun lòra dal "desmontié".
Da San Dvane a Santa Cros d setembre, col feste dal lunario dla Gedia a signé al tempo e la vita di omin e di animai, el vace lasaa el stale arente al pöis o zi tabies fora via e dee su ple monte stablide a pason. E co l erba se smagrii e l saroio tacaa a sbasase era el vace stöse a sintì che s vizinee l ora da tornà zi tabies e zle pasogn pi arente al pöis.
Zla val d Visdende in Comelgo sto vecio sistema dla tradizion contadina continua ncamò anch'al dì d incöi e nascuante vace pasonöia cadù zi ciampés di piane, etre inveze va su zi stalogn d Antola, Londo, Ciambon, Dignas, i cuatro löghe gno che ncamò vögn montiede el bestie de sti ane. Dute e cuatro ste monte inà anche la casera, gno che stà i pastores e l mistro e gno che s fa ncamò onto e formai, sempro pi caride e aprezade da la dente di pöide e pi ncamò dai foreste. A sintì al parsonal de ste monte somiaraa ch'la stagion söia stada bona e ch'abia bició polito par cuintal d late, ma picsöia ch'la roba iné gnuda möio dl an pasó. Visdende mantögn al nome e la so blöza d valada intrà bosches e prades in grazia de cal tin de alevamöinto d bestie che sti ane é du inante zenza scotà masa al riciamo dle fabriche di uciai. Saraa polito ch'gnösa fato un sauto in pì, con famöi done ch'tol su la tradizion di veces e la adata al dì d incöi. Co la produzion d roba nostrana o magare col föi damangé e dà da dormì ai tance foreste ch'va in Visdende e zun etre monte, siguramöinte sauta fora sode dapì e con pi sodisfazione sno ch'zun etre mistiöre. El legi taliane e europee pö iuté anche a slargé li ativites bel inviede e saraa polito par duce ch'al turismo lió a l agricoltura ciape pi strada. Iné la strada ch'à ciapó etre valade ladine e i mades dla Pustra.

Lucio Eicher Clere


Pagina
"LINGUA"

 Pagina
"ACCADE A COSTALTA"

 Pagina
"ECONOMIA"

HOME PAGE DEL SITO