13-8-2002

Bon sögno: istede viva par i ladins

Da SanVido a l Agordin iné duto un fiorì d feste e ativites
culturai e .. zenza sode. Fin ades nsuna union ne n à ciapò nente

SAN VIDO. Na istede viva par i ladins dla provinzia de Blun. A lede e sintì el notizie di varie pöide, da San Vido al Comelgo a l Agordin, iné duto un fiorì d feste e ativites culturai. Bon sögno.

Anche zenza sode, parcheche fin ades nsuna Union ne n à ciapó nente ne da la Region, ne da la lege 482 ple minoranze, el parsone tacade a la so tradizion e a la cultura dla so valada se dà da föì e publicöia libre, promöve feste e sagre, organisöia conferenze e spetacui.

Eco alora la grön festa di grupes da bal dl Agordin, tgnida zi dis pasade a Falciade zla Val dal Biois; eco la festa di mistiöres d n ota; btuda in pes con sodisfazion de duce a Mareson de Zoldo; eco la presentazion d libre a Selva d Cadore e Costauta d Comelgo, gno ch' s é parló da na banda dla publicazion "No sté fastidiá de mi" dal pre Paolino Rossini, e da clautra dal libruto 'Pinochio ladin" de Giovanni De Bettin Linc'.

Ma sti dis i apuntamöinte intorno la mité d agosto aumöinta e sarà difizil ciapai duce, anche par i apasionade d cultura ladina.
Dmönia iné stada fata a Loze la festa ladina di Molins. S al tempo avös lasó saraa stó bel, compagn d l an pasó, cetase ze cal bel lögo, su in Prou, gno ch'é sto fato un valente laoro par böte aposto na piezola intrà nascuance vece mulins, iné stada btuda su na roda l lögn e na röia porta l aga e la fà giré compagn di ane cuön ch'ne n era la corente eletrica.

Ze sta festa, ch'íné stada organiseda pla sagra d San Lorenz, patrono d Loze, à baló i Legar, grupo ladin da Sciamazen, à sonó la banda d Auronze e inà fato al so ultmo spetacul 'Tiziano" al grupo musical d Costauta.

In Oltreciusa continua intanto i incontres par föi conose la cultura ladina. Dinze d la sala nova dal comun se ceta, paesane e foreste, par spiè video, sintì descorse e sintì ciantà su pla vita di ladins de sti pöide.

Dute ste ativites iné la dimostrazion pi bela e pi vöra dl atacamöinto a la so cultura e se duce avös da considré al grön laoro fato de sti ane, n vanzaraa da cetà da dì su par cual ch'é l pi brau o l primo dla famöia.

Spron che d otono anche ste bele iniziative döia al so contributo par fòi dì inante i ladins dla provinzia de Blun duce a una.

Lucio Eicher Clere