2-12-2003

A Costauta la prima mösa
par ladin dal Comelgo
Portà inante la domanda
par l'aprovazion da Roma

COMELGO. Na mösa intiöra par ladin dal Comelgo gnarà fata a Costauta al dì 13 de dizembre, zla gedia d Sant'Ana, ale siö dadsöra. L ocasion iné al ringraziamöinto par i vinte ane dal grupo musical de sto pöis, ch'inà otgnu l acordo aped al pree d Ciamplongo, ch'iné un comeliön nasù Danta, par lede, ciantà e sintì la predga par ladin.
Iné la prima ota ch'vögn fata na mösa par ladin zna parochia dla diocesi de Blun e l intenzion dal grupo d Costauta iné cöla da portà inante la domanda da avöi l aprovazion da Roma, compagn ch'inà avù i furlane e i ladins badiote e gardeneres, par podöi dì mösa zun dute el valade ladine dla provinzia de Blun, ogni ota che calche pree se sente o cuön ch'la dente vö parié al Signor zla so parlata.
La mösa ladina d Costauta sarà ciantada dal coro zun duce i momöinte dla liturgia, con canzogn scrite e musichede aposta par podöi avöi un repertorio d musica sacra ladina. A sta mösa iné stade invitede dute li uniogn ladine dla provinzia e gnarà a Costauta nascuance par valada, vistide coi vistis da festa dla tradizion di so pöide, par mostrà dasögn la partecipazion a sta festa di vinte ane dal grupo musical e ringrazié al Signor par cuanto ch'è stó fato zun sti ane par mantgnì la cultura ladina. La nezesité sa avöi el aprole dla liturgia par ladin se fa sempro pi presante e saraa bel che caldun se btösa d puntilio par scrive la traduzion par ladin di lezionaries e di msai, ma picsöia dla Bibia, dal novo e dal vecio testamöinto.
Zl ultma sentada dl Istitut cultural ladin s'è parló propio d cösto e duce inà sostgnù al dovèr da tacà a scrive na liturgia par ladin, zle varietes dla valade dla Ladinia blunata. Sarà un di prime programes d laoro de sta nova istituzion, ch'inà tacó i so laore sabo pasó col novo diretor Ernesto Majoni e i espertes d cultura ladina.
(lec)