Antoni Rumba ti mando un'intima
no abbarro cun tegus dibbi dabba
a sa sabatta l'est intrande s'abba
in totta sa giredda e s'intima
l'as gai fricassada pius de prima
sa clientella gosi non s'ingabba
ti cito ca bi cherzo resescidu
cantu po cuss'acconzu app'ispendidu
De cuss'issoladura fatta male
chi pariat su cusinzu 'e Massarru
deo mi ch'appo tentu unu catarru
ch'azzumai ch'andavo a s'ispidale
si non cosis Antoni puntuale
t'ispibillo e t'allugo su zigarru
si no ascurtas custu narre meu
o cras o pustis mando Paddeu.
T'imparo a fagher Antoni sabatteri
cosiduras sinzillasa e sinzeras
si nono tue puru in sas lameras
faghes che Micheleddu s'istanzeri
chi appenas saldados si ch'apperi(n)
tottu imbudeddos cun zicculateras
...
...
A sorre mia una paza nde as fattu
ma non de pones puntu attera orta
as fattu una sabatta punti torta
che dentale 'e aradu 'e duggumattu
sos taccones a fundu e piattu
sas punzas mannas che craos de porta
e sos taccones sun falsos ancora
unu es bestidu a intros, unu a fora.
Giovanni Zurru de Gavoi -
"Brundihone"
