PORTALE DE UNA DOMMO DE GAVOI

 

Hustu portale tancat sa horte de sa dommo Buttu Cadoni,
in su Vico Casteddu, in su tzentru de Gavoi.
Sa Dommo 'e sos Buttos.

Sa dommo, meda honnotta vintzas horas de vidda, serrat
un'artiada de una barantena 'e metros et s'istrada finidi a nohe.

A sehus de su portale ('hi est artu mancari duos metros et mesu)
v'este sa horte antiha, a sa manera de s'Ispanna,
inuve si che apperini tottu sas ventanas ei sar zennas.

Sa horte hudi honnotta po' sas tres sorres Buttu Cadoni, vahadivas,
'hi hurin semper incue 'ilande s'orbatze a sa manera antiha et prehande.

Si muttiana Zuvanna, Vissenta et Anzela Maria et, vintzas si innoghe
las vidies in su costummene gavoesu antihu, dae su 1958 hinghiana
in nigheddu po' more 'e su luttu de unu frade, Micheli, mortu zovanu
de una rara maladia 'e sos renes.

Innoghe bi sun sas battor sorres
(b'est puru Caterina, cozhuvaa, hun su 'izziheddu Ceccio "melaruvia")
sa fotografia est'istaa sehaa po' non si che diat viere s'apposenteddu 'e
sa linna a manca ei sas puddas a sa dresta; sa zenna este sa chi si viede
a 'undu in s'attera foto. Semmus ammaniande una fotto prus manna.

Su biade Micheli Buttu Hadone
hu honnottu et lummenadu po' unu poeta valorosu
in s'arte de s'improvisada.

Fintzas a una trintena de annos hahe, in sa horte bi fidi una happritta,
(sa "mannalitha") hommente s'usaiada in sas viddas, 'hi a manzanu
'hu vattia a pashere dae unu pitzinnu de vidda, et a su sero murta et aggorrada.

A sos tempos usavat puru de che tenner puddas in dommo, et innohe
bi 'nd'haiana, et bi suni abbarradas fintzas a hando sa lezze che
l'hada proibbiu non medas annos hahe.

Sa dommo Buttu Hadone
este antiha meda, et podiat puru esser posta a monumentu,
ammostrande tottu sas tecnicas antihas de fravihu.