Pietro LAVRA

Pizzinnos Linnadores

Unu manzanu, da intro sa ventana,
bid'happo duos pizzinnos in sa ia,
passende isculzos in sa ghilighìa,
impilurzidos e mortos de gana.

Una soghitt'armugoddu issos hana,
che puzzoneddos sun senza pinnia,
camminan ambos a conca vrittia
pro incher s'azza de sa tramontana.

Su mundu los ha' postos in camminu
attinde dae minores linn'a palas
peri sos montes andende a fainu.

Sa sorte issoro si, ch'es sorte mala,
Si Deus no' lis cambiat su destinu
E si los ponet issu sutta s'ala.

Pietro Lavra

PIETRO LAVRA (1897-1968) 'udi a sa primma unu mastru 'e iscola, pois unu vuntzionariu de s'ENAL et po' custu tribballu est essìu a Romma, emmigradu mancari istande vene. In Romma s'est 'attu connoschere po' chi hat tentu cuntattos chin sos atteros emmigrados, ispessie sos gaboesos - et in mesu a issos chin Micheli Cugusi - sighinde a iscriere et a chistionare in limba.

Custa innoghe assuppra este una de sas obbras suas prus bellas, inuve vi suni s'ammentu 'e su tempus coladu pero puru atteros sentidos. Su collire sa linna commente si faghiada primma, Lavra lu deppiada ischire vene sende, 'ummis nande, unu mastru 'e iscola, et custu fit unu 'e sos tribballos de sos piloccos.

Mesteris de una 'orta, 'attos, chei una 'orta, dae meda minores, vidos dae sos occros diliccados et sensibiles de Mastru Lavra. Sa vida mischina de custos pizzinnos leat s'auttore a che pregare Deus de lis ponner una manu assuppra, de los vardare.

Cust'obbra est in sa collida "Cantos de Barbagia" inuve "cantos" este paragula chi muttit ideas de canthone, de parte de unu tottu, de cantidade, et medas atteros. Puru, Sebastiano Satta avìat lummenadu unu fammosu libbru "Canti Barbaricini".
Non tottus sas collidas de vessos poten vantare una colletzione de paragulas leppias et diliccadas, però 'ortes a su coro, chei custa.