Pesadi alenu ‘e sa
terra
bentu, prenda galana e areste.
No bides chi no t’intenden sas fozzas,
ammacchiadi si no t’ascurtan sas frunzas.
Chi t’azzuen sas aeras nieddas dae su fele
e iscudan su ludu chin ispidos uddidos.
E deo, bruere fattu omine,
no t’intendo.
Abboghina a boghe manna.
Si no t’ascurto, ammacchiadi.
Chi s’abberzan sas nues de rocca nieddas
e proat abba fritta issubra a mie
chi soe ludu, fozzas e temporada.
Ispinas de ruu, ungras
accuttas,
fraschiademi sa pedde chin s’arestia de sa temporada.
Ferimi, chin s’astrau intentu,
chin mizzas de ballas solas,
cusatas manos tremulas de fozzas.
Mossigami, chin arbos dentes de randine,
custas laras rujas;
Rujas dae sa gana de ti
asare.
Prenami sas nastulas chin
su fragu de su ludu feridu.
Cuberimi sos ogros chin fozzas istratzadas.
Chi m’iscudan sos arvores chin sas frunzas surdas.
Prenami sa ucca chin su sabore de sambene iffustu.
E brusiami sas feridas
chin guttias de attunzu.
Gianfranco
Unali
Tandho,
deo soe de Benetutti (SS) ma vivo in Inghilterra dae
prus de otto annos.
Como soe accabbendhe unu dottorato in chimica in
s'universidade de Sussex, e mi mancat pagu tempus a
finire in tottu (soe iscriendhe sa tesi). Luego
nocch'andhamus dae innoghe ca appo a incomintzare unu
triballu nou in atter'uve: prus a susu, accurtzu a
Chester (tzittade Romana).
Sa
poesia chi bos appo imbiadu si muttit "Guttias
de Attunzu" e dest s'istoria de unu amore, unu
sentimentu issubra de sas temporadas fortes
attunzinas, candho s'abba si mischiat a su ludu e lu
faghet torrare a biu, candho s'abba e-i sa randhine
t'iffundhen e t'istroppian chena peroe ti dare iffadu
perunu; antzis appustis de un istiu siccu las desizas.
Allegoricamente est unu omazzu a muzzere mia.
Deo
fatto parte de sa lista de distributzione limbistica
de s'Universidade de Colonia. Si tenides gana e
tempus visitade su zassu nostru, e si nd'azis
gana, iscri'idebos a sa lista. http://www.spinfo.uni-koeln.de/mensch/sa-Limba.html
Ispero
chi azzis a contribuire a sa lista "Sa Limba",
b'hat sempres prus bisonzu de zente chi ispargat su
Sardu.
Gianfranco Unali
.
