Micheli CUGUSI

A Loisu e Cadone
Gavoi, 1985

Iscurtande sa missa ch'hapo 'idu
a Loisu e Cadone a cost'appare,
a s'ora 'e s'ostia de che sullevare
su celebrante che fidi arrividu,

ma, Cadone fit foras de sentidu
pro cumbincher a Loisu a imbenujare,
ma custu non l'hat cherfidu iscurtare
li nat: - mi' ch'hapo s'uste, o rimbambidu!...

Quindi pro nde fagher sos concruos
mancadu est pagu a che finire in rissa
a su moment'e s'elevazione.

Pro non si fagher sos affares suos
(a parte s'haer perdidu sa missa)
a curzu a la buscare fit Cadone.

Micheli Cugusi de Gavoi - sa Valasa, 7.7.1985

---

Custu sonette alligru cherede una paragula pro faghere ischire chi "Cadone" este su biade Frantzisku Cadone, un'ommineddu mischinu a su cale sa vida non l'hat dadu meda in sentidu.
Sempere l'ammus connottu commente su "sagrista", chi 'udi una paragula chi nde cumpensavat atteras meda chi l'arribbaini dae sa vidda sua, et pariada chi una grandu cosa esseret s'ommine a sutta de custu lummene, "tribballadore de cosas saccras".

Non fidi communcas una pessone de che poder concruire commente unu tontathu ebbia; sa cara de sufferentzia de cando vattiada sa Rughe, po' nde narrer' una, fid'abberu sa cara de unu Cristu chi si dolet de su male de su mundu, et nemmos che podiad'abbarrare frimmu, chene ispantare e pessare, addaennantis a cussa gherza lanza de mala chenappura. Sa vida sua fit sa cresia, sas missas, tottu su chi v'este a furriu de sa religione. Et fit su tribballu suo puru.
Atteru, sos chi in Gaboi no' istana, no' nd'ischiana; gai pariada chi cust'ommine esseret naschidu dae su nudda, chene parentes, chene dommo, chene vida. Ma, paret machighine abberu, non pariada chene pessamentu: lis si podiat legher sempere in cara su pessamentu de che fagher a su menzus su dovere suo po' chi sa missa, s'interru, sa via crucis, sa collida 'e sas ofertas: tottu deppiat esser 'attu perfettu, commente lu cheret Deus. Sempere chin cussa cara trista, unu mamuthone de sufferentzia.

Et donzia tantu, canch'una nde faghiada isse puru, commente in su sonette.

Nos paret chi tiu Micheli Cugusi, ammentande Cadone in custa pelea, nd'happat cherfidu sinzare un'aspettu chi jughet a si l'ammentare in d'unu "sketch", menzus meda chi non in tristesa.

S'efettu commicu naschit dae su contrastu cun d'un'atteru gavoesu "'e gabbale": "Loisu", chi, nammus, fit grassu abberu. Antzis: cantu fit grassu Loisu, gai fit lanzu Cadone. Et Loisu non podiat s'imbenuccrare, et po' custu teniat su baccheddu (s'uste). Ma Cadone non podiat atzettare su mattessi chi Loisu no esseret vattidu respettu a sos Cummandamentos.

A sicommente Cugusi est fintzas ommine alligru, in su narrer chin grandu sensibbilidade chi su mischinu fid' accurtzu a la buscare, che li ponet primma chi si s'hat vintzas perdidu sa missa!