 |
| IL NEWSGROUP |
|
|
| LA CITTA' |
|
|
| LE
ISTITUZIONI |
|
|
|
|
|
| Ubaldo
Mazzini |
a cura di Sciac |
|
Dunca
na vota la gh' ea en re. E sto re chì i aveva mogee e
na figia. Cos' a voré 'n veità, en beo giorno a
mogee la se cacia 'n leto moota, e la va 'n fin de
morte. Ma prima de moie la ciama sé maì e la ghe
diza:
- Mia che me a mèo; e se te te voreè sposae n' autra
dona, mia de no sposae fintanto che te ne 'n trevi üna
ch' agia en dente d'oo.
Morta a regina, o re i se meta sübito en serca de na
dona che l' avesse o dente d'oo, per fare come gh'
aeva dito a sé prima mogee 'n pünto de morte. E i
manda en zio tüti i sé servitoi pe' er mondo cor
pato ch' i zio enfin ch' i ghe la trevo. Ma zia che t'
arezia, dopo avee zià 'r mondo per tüti i versi, aa
fin i torno 'ndaré dai re coe bale en man, perché
zovene con en dente d'oo pe' er mondo ne ghe n' ea,
autro, mié 'n po' o destin! che proprio a figia d' o
re!
E o re ch' i ne voreva negae a volontà dea sé prima
mogee morta, i ciama sé figia, i ghe conta a cosa
come la sta, e i ghe diza che mia ch' i se sposo.
A ve lasso die sta povea fante sentindo sta cosa, la
se cacia 'nte 'n cianto, e 'nte na despeassion, che
che cianzeva e che se despeava l' ea sta povea fantela.
E no savendo come méteghe remedio, na bela matin la
se issa fito fito de 'n leto e la va 'nte 'r
camposanto sorve aa tomba de sé mae, e lì tüta
cianzente la comensa a lamentasseghe:
Caa mamà, caa mamà!
Che testamento t' è mai lassà
Che a figia la deve sposae 'r papà!
E sübito la senta na voze a partie de 'n fondo aa
tomba, che la ghe diza:
- Se ne te vè sposae té pae, dighe che te n' o sposi
s' i ne te cata 'n vestido con tüti i campanin d'oo.
E a figia la va da sé pae e la ghe meta 'r pato. E o
re i gh' emprometa de contentala. Ven a note, e 'n
mentre che o re i è 'n leto ch' i ne pè dormìe, i
senta zü' pea strade na voze de n' omo ch' i grida:
- A chi voresse catae na roba con tüti i campanin d'
oo?!
I ea o diao stravestì da omo.
O re i manda sübito de fèa 'n servitoe, i se fa
catae 'r vestido, e tüto contento a l' indoman i o
regala aa figia, che quando la 'r veda la se meta
torna a cianze e a despeasse. E la retorna daa tomba
de sé mae, e la ghe torna a die:
Caa mamà, caa mamà!
Che testamento t' è mai lassà
Che a figia la deve sposae 'r papà!
E a voze dea mae la se fa ressentie de 'n fondo aa
tomba e la diza:
- Se ne te vè sposalo, dighe ch' i te cata n' autra
roba con o so, a lüna e e stele.
E a figia la va da sé pae, e la ghe diza torna de l'autro
vestido, e sé pae i ghe emprometa de sercarghelo.
E aa note torna o diao zü' pea strade i se senta a
gridae:
- A che vè catae 'n beo vestido con o so, con a lüna
e con tüte e stele?!
E o re i remanda d'asbrivo a catalo, e i o redà a sé
figia speando che sta vota la sia contenta. Ma le
tant' è la recianza e la se redespea, e la retorna
daa tomba de sé mae a lamentasse:
Caa mamà, caa mamà!
Che testamento t' è mai lassà
Che a figia la deve sposae 'r papà!
E a sé mama dar fondo dea tomba la ghe rediza:
- Caa figia, agi tanta passensia, e dighe a té pae
che s' i vè che t' o sposi ch' i te cata n' autra
roba con tüto o cielo, e 'r mae e i pescadoi ch' i
pesco da loo.
E a figia d' o re òa va dar pae e la gh' o diza: e o
re e torna a remprométeghe de trovaghe 'r vestido. E
aa note la repassa o diao vestì da omo, e i sbragia
soto ae fenestre d' o re:
- A che vè na roba coo cielo, e 'r mae, e i pescadoi
ch' i pesco da loo?
E o re i cata anca sta roba, e a l' indoman i torna
daa figia speando d' avela contentà. Ma come ao
solito a figia d' o re la ne se pè decide, e la revà
'nte 'r camposanto a pregae davanti aa tomba dea sé
mamà:
- Caa mamà, ma dunca che sia propio 'ito ch' a devo
sposae 'r papà?
E a voze de sé mae la ghe responda:
- Sta alegra, che sta vota l' è l' ürtima. Dighe a té
pae che te vè anca er vestido tüto de legno, e cen
de cantoe. E quando e te l'aveà trovà, aloa métetelo
'n dosso, lègheghe drento dee cantoe i trei vestidi,
méteghe enseme tüte e mé gioie e e memoie ch' a t'
ho lassà, e poi scapa de 'n ca de té pae, e vatene a
ziae pe' er mondo, che te vedeè che t' aveè sempre
ben.
Tüta contenta a figia d' o re la torna a ca e la fa
come gh' ha 'ito a regina morta. E aa note torna o
diao, e i grida soto aa fenestra d' o re:
- A che vè catae na roba tüta de legno? a che vè
catae na roba tüta de legno!?
E o re i cata anca st' autra gonela, e i la regala a sé
figia, che sta vota la fa mostra d' esse contenta, e
la 'mprumeta a sé pae de sposalo. E aa note envece,
en mentre che tüti i en anca dormì, sito me sito te
la ciapa 'r portante e la scapa de 'n ca. E camina
camina, finarmente la veda da lüntan en lümetin
picenin picenin. E camina camina, finarmente l' ariva
dao lümeto, e la se treva davanti a 'n gran palassio
ch' i ea er palassio d' o re de quei posti. E la veda
fèa dea porte da na stala 'n staleo ch' i neteza 'n
cavalo, e la ghe domanda s' i podesse per quela note
lassala dormie ente a stala.
- Andeò a dilo a o re, - i ghe fa o staleo, - e voi
come aé nome?
- Maieta.
E o staleo i va e i domanda ao re er permesso. Er
figio de sto re, ch' i ea presente, anca lü i prega sé
pae de miae de contentae sta povera fante. E Maieta tüta
contenta la rengrassia o staleo, e la se meta a daghe
na man a polie i cavali, e ghe toca giüsto quelo der
figio d' o re, che a l' indoman quand' i 'r veda cossì
beo lüstro e polito i resta 'ncantà, e i diza ao
staleo:
- Mia che stanote a devo andae a na festa da balo, e
ch' a revoi 'r cavalo lüstro e polito come aoa.
E o staleo i torna ente a stala, e i diza a Maieta de
repolie ben er cavalo der figio d' o re. Ma Maieta la
ghe fa:
- Si, ar poliò me, ma basta che 'r figio d' o re me
porta con lü aa festa da balo.
O staleo i se dà 'nte sc-ciopon d' aride, e i va da
'r figio d' o re e per falo aride i gh' o diza. E 'r
figio d' o re i ghe diza che per tüta risposta i ghe
daga na stafilà.
Come de fati l' antraven. E Maieta la pia la stafilà
e la sta sita. Ma quando l' è verso a mezanote, che tüti
i en adormì, cosa la fa? la se vesta con a roba dai
campanin d'oo, la sauta a cavalo a 'n cavalo, e via aa
festa da balo. Er figio d' o re quando i la veda cossì
bela e cossì ben vestì, che la paeva na figia de 'n
re, sübito i se n' en-namoa e i comensa a faghe l'
ase. E le apena che la se n' ascorza la serca de
andassene. E 'r figio d' o re i ghe diza che prima de
lassalo la ghe diga armeno de che paese l'è.
E la ghe responda:
- De Stafilà! - e la scapa via come 'r vento, e la
lassa lì avilì come 'n strasson.
A l'indoman ècheve che pe' andae a n' autra festa er
figio d' o re i ha de besogno der cavalo dato arecato,
e o staleo i ordina torna a Maieta de strügiaghelo. E
le la ghe diza:
- Sì, ma con pati ch' i me ghe porta anca me.
E o staleo i l' arediza ar figio d' o re, ch' i ghe
diza che per tüta resposta i ghe daga en sc-ciafo.
E cossì l'antraven. E Maieta sito. Ma ècheve che
verso a mezanote la se meta er vestido con o so, a lüna
e e stele, la remonta 'n cavalo, e via aa festa da
balo. E er figio d' o re quand' i la reveda i se n'arennamoa
torna come 'n mato, e i se gh'aretaca ai carcagni a
faghe a corte. E le dopo 'n po' la o salüta e la ghe
diza che la deve partie; e lü i ghe redomanda onde l'
è che la va. E le la ghe responda:
- A Sc-ciafo! - e via come 'r vento, e la o lassa lì
muco e avilì come na pessa leda.
A l'indoman gh' è l'ürtima festa, e 'r figio d' o re
i se meta ente a testa de voree scrovie assolütamente
che l' è sta zovena che la fa 'r fa tanto patie.
Maieta la resseva l'ordine de dae torna arecato ar
cavalo e la rediza ao staleo ch' i faga 'r piazee de
redie ar figio d' o re se armeno per l' ürtima vota i
la porta a 'r velion. Er figio d' o rech' i aveva
autro pea testa, i gh' aresponda de mandala via de 'n
ca sua adritüa. E i parta pea festa.
E Maieta, ao solito, verso a mezanote la se vesta ben
e la se meta a gonela coo cielo, cor mae e con i
pescadoi ch' i pesco da loo, la se gimbra ben con tüti
i oi e e gioie de sé mae, la monta a cavalo a n'
autro cavalo, e via aa festa da balo.
E apena che la compaissa ente a sala, ao solito 'r
figio d' o re i se ghe meta d' entorno a faghe mile
galantaie e mile squèsimi, en-namoà come 'n gato ch'
i ne 'n pè ciü'. E le aa solita oa la ghe fa tanti
salüti pe' andassene, e quando l' è lì che la monta
a cavalo, 'r figio d' o re i gh' anfia 'n dido 'n bel'
aneo d' oo con en diamante grosso cossì. E le via
come 'r vento.
Ma 'r figio d' o re ch' i aveva 'n za misso a sé
poste, i gh' asbriva da daré 'n servitoe a cavalo per
miae donde la va. E sto servitoe dai e dai e tapèla
dadaré a sta fantela che la cora come 'r vento, ma i
ne pè mai aciapala. E camina camina camina, aa fin ècheve
ch' o gh' è squasi daa rente. E le la se vorta, e la
'r veda; e aloa la se leva de 'n sentüa na borsa
recamà tüta cena de monee d' oo e la ghe la cacia.
Aloa lü i s' aferma, e i china per coila, e le
'ntanto torna via, e la ghe spaissa davanti.
A ve lasso pensae com' i aresta 'r figio d' o re
quando i ariva a ca sua e i senta che ne s' è possü'
aguantala! I cianza e i se despea e i comensa a
sentisse mao, a ne mangiae, a ne dormie, e a deventae
magro come 'n ciodo. Tanto che 'n beo giorno i se meta
'n leto e sc-ciao, dizendo che per lü oamai l' è
fornì, che i veda ben ch' i ne pè ciü düala 'n
pesso, s' i n' areveda armeno anca na vota quela bela
fante dee trei feste da balo. Ma sì, vatela a sercae!
A regina, trista com' a podé capie, la serca de
consolalo per tüti i versi, ma tant' è l' è come
dae l'incensso ai morti! Sto poveo zove a poghetin per
poghetin i se 'n va cativa salüte.
Ma ècheve che na bela matin en mentre che 'n cosina i
prepao na süpeta de brodo consümà pe' er figio d' o
re, ècheve che capita Maieta, che la domanda ar chègo
er permesso de faghela propio le coe sé man, ch' i
vedean che 'r figio d' o re i 'n resteà contento.
Come de fati Maieta la se meta d' entorno aa süpa, e
'nte daghe arecato, senssa fassene ascorze la bèta
drento aa zata l' aneo che 'r figio d' o re i gh' avea
dato a sea de l'ürtima festa da balo. E poi la scapa
sübito ente a stala, e la se vesta ben con a roba coo
cielo, cor mae e con i pescadoi ch' i pesco da loo, e
la se meta d' entorno tüte e gioie che gh' aveva lassà
a sé mamà.
Quando 'r figio d' o re i veda en fondo aa zata o sé
aneo, a ne ve digo gnente com' i aresta! I ciama sübito
a regina e i vè savee per forssa chi è ch' ha fato a
süpa. Serca de sà, serca de là, finarmente
compaissa davanti ar mooto Maieta tüta lüzente, e
bela come na stela, e la diza ar figio d' o re:
- Eco chi ha fato a süpa!
Er figio d' o re, védela, sentila e passaghe tüto i
è n' atimo. I se bèta zü dao leto, i ghe va
'ncontro, i se la baza e i se l' abrassa, e i ghe diza
se la vè esse sé mogee.
Le la ghe conta tüta la sé stoia de 'n sima enfina
'n fondo, e poi la ghe disa de sì. E a l' indoman con
gran feste e con gran siali i fan o sposalissio.
E i fan en beo pranso grande e grosso,
E a me a sono soto aa tòa e i me cacio n' osso
Ch' i m' aresta zü' per er canoosso...
Toca 'n po chì com' a gh' ho grosso! |
|
Da Saggio di folklore spezzino |
|
|
|
|
|
I NOSTRI FORUM
|
|
|
|
METEO LIGURIA |
|
|
|
RICERCA
|
|
|
|
OPEN SOURCE
|
|
|
|
LINKS UTILI
|
|
|
|
SERVIZI UTILI |
|
|
|
|
SITI GEMELLATI |
|
|
|
|
