Indici:

 

Primissa.
Carattiristichi funuloggici e sintattici.
Sustantivi.
Articuli.
Pripusizzioni.
Aggittivi e prunomi.
Particeddi prunuminali.
Altirazzioni di l'aggittivi e sustantivi.
Avverbi, cungiunzioni e sclamazzioni.
Verbi.
Curritturi urtugraficu.

 

Primissa.

'U sicilianu havi migghiara 'i variazzioni funetichi, murfuloggici e sintattici. Nta 'sta nota cunsidiravi sulu chiddi tipici palirmitani e chiddi ca sunnu ancora nta l'usu currenti. Nta l'avutri parrati cci ponnu essiri puru, ma ponnu essiri diversi o mancari.

'I libbra ca cunsultavi sunno: Grammatica siciliana 'i Giuseppi Pitrè (c'arripigghiò n travagghiu di Wentrup) e, pi quantu arriguarda 'a parti linguisticu-atimuloggica, 'i noti linguistichi ntô dizziunariu atimuloggicu 'i Salvaturi Giarrizzu.

'A raggiuni 'i 'stu travagghiu è chidda d'aviri na basi certa (pi mia) pî reguli dû curritturi urtugraficu ca stè facennu.

Indici'

Carattiristichi funuloggici e sintattici.

Sandhi: È n finominu ca nni veni dû sancritu e voli diri "culligamentu, junciuta".

'U sandhi po essiri:

• Esternu. È sempri funeticu. Quannu s'incontranu du' vucali, una atuna â fini 'i na palora e l'avutra, tonica, 'i na furma curta di n'articulu/aggittivu/prunomi, 'u sonu addiventa unicu e si signa cu l'accentu circunflessu: a-a > â, a-i > ê, a-u > ô, i-i > î, u-a > â, u-i > î, u-u > û. 'A primissa è mpurtanti picchì "na u (vucali)" nun fa nô picchì 'a "u" è atuna. Si po truvari puru nternu e nun è obbligatoriu signallu picchì nun c'è cunfusioni: automobbili > otomobbili. Succedi puru cu "ua" ca po addivintari (pi metatesi?) ô: quacchi > cocchi.

• Nternu. Funeticu. Quanno si juncinu du' palori, a consunanti nizziali dâ sicunna radduppia: supra tuttu > suprattuttu, a pedi > appedi, a divintari > addivintari.

• Nternu. Morfusintatticu. Quannu 'a pripusizzioni 'n (in) si jiunci cu na palora c'accumincia pi "b" o "p" addiventa 'm e perdi l'apostrufu (nun cc'è cchiù cunfusioni): 'n pedi > mpedi, 'n bagnu > mbagnu; ma 'n trenu > ntrenu. 'A stissa cosa succedi quanno 'a prima palora ca si funni finisci câ "n" picchì è n truncamentu: 'a squadra 'i calciu 'i San Binidittu è 'a sambinidittisi.

'U sandhi si po usari puru (ma è na sufisticazzioni):

• ntô plurali dâ palori ca finiscinu cu "iu" e "ia" (câ "i" atuna) pi significari ca 'i "i" sunnu dui, ma si nni prununzia una sula: gràzzia > gràzzii > gràzzî. S'iddu nun s'usa 'u circunflessu è megghiu scriviri na sula "i" (gràzzi) picchì è accussì ca si prununzia;

• quannu cc'è n'apocopi: avemu > amu > âmu. Ma è n'usu littariariu.

Crasi: 'Na parola si funni cû sò articulu: 'a lapa e 'u lapuni (l'apa e l'apuni), 'u loppiu (l'oppiu). Si manteni puru ntê palori cumposti: allappari, alluppiari.

Metafunesi e dittongazzioni dî vucali debbuli: 'I vucali debbuli "e" e "o" nun esistinu s'iddu nun hannu l'accentu (sulu nta cocchi casu particulari e a principiu 'i palora) e si trasformanu ntê vucali forti "i" e "u": còrna > curnùtu, Palèrmu > palirmitanu. Quannu sunnu accintati ponnu addivintari dittonghi (dittongazzioni metafunetica) câ vucali forti rilativa: còrna > cuòrna, Palèrmu > Palièrmu. Nta cocchi parrata si "strascica" agghiuncennu 'na "i": cuòirna, Palièirmu...

'A dittongazzioni metafunetica è 'na carattiristica mpurtanti ntô sicilianu; 'i parrati vennu classificati supra a idda (parrati ca cci l'hannu e parrati ca nun cci l'hannu). Palermu cittati è zona metafunetica, ma 'a pruvincia no.

Metatesi: Spissu si scancianu 'i sillabbi o 'i cunsunanti vicini ntra d'iddi: parola > palora, fucularu > cufularu.

Epìtisi o paragòggi: È na cosa ca s'agghiunci 'a fini di palora. Nta diversi parrati s'usa agghiunciri 'a paragòggi "-ni" ntê monusillabbi ca nun sunnu atuni: èni, ccàni, hàni, sìni, nòni, vàni, fàni... e ntê palori accintati: purtòni, circòni... Ntê palori ca finiscinu cu "tà" e "tù" s'agghiunci "-ti": caritàti, viritàti, libbirtàti, juvintùti, virtùti...

Radduppiu dâ prima cunsunanti: Quannu na palora accumincia ppi cunsunanti e davanzi cc'è 'a pripusizzioni atuna "a" o na sillabba forti, 'a cunsunanti si radduppia: vitti lu mari, vaju a mmari; dui (o quattru...) mutura, tri mmutura. Quannu 'na palora accumincia câ "j" si radduppia cu "gghi": haju a gghiri (hè gghiri). 'Stu finominu (ca è puru talianu) è sulu funeticu e fussi giustu usallu sulu s'iddu 'a scrittura è funetica: hè jiri (leggi è gghiri).

Assimilazzioni: Quannu na cunsunanti s'incontra cu n'avutra cunsunanti diversa spissu si perdi e l'avutra radduppia:

Palèrmu > Palèmmu, furmaggiu > fummaggiu, mbasciata > mmasciata...

Rutacismu: 'U rutacismu è n finominu ca fa prununziari "r" avutri cunsunanti. Nsicilia, ma no nta tutti 'i zoni, 'u rutacismu l'attruvamu ntâ "d": vidiri veni prununziatu (ma fussi megghiu nun scrivillu) viriri, càdiri > càriri...

Cocchi vota 'u rotacismu s'afferma e si funni câ metatesi: 'i manu mi dolinu > rolinu > lorinu.

N'avutra cosa mpurtanti è l'ordini sintagmaticu, vali a diri l'ordini di comu vennu scritti i cumpunenti di na frasi. Ntô talianu l'ordini nurmali e chiddu dittu SVO (suggettu, verbu, uggettu): Giuvanni è bravu. Ntô sicialianu si prifirisci usari chiddu latinu SOV (suggettu, uggettu, verbu): Giuvanni bravu è.

Indici

Sustantivi.

Gèniri e nummaru: Nsicilianu 'i nomi singulari ponnu essiri maschili e fimminili, ntô plurali cc'è 'n geniri sulu. S'iddu s'havi a fari diffirenza, s'havi a spicificari: 'u figghiu, 'a figghia, 'i figghi (masculi o fimmini).

'A disinenza nurmali dû maschili è -u, chidda dû fimminili è -a e chidda dû plurali è -i.

Ccizzioni e particularità:

• sustantivi maschili ca finiscinu cu -u cû plurali -a (com'u neutru latinu): 'u piru > 'i pira, 'u jiditu > 'i jidita...;

• sustantivi maschili ca finiscinu cu -a (sucasi(m)mula...) e sustantivi maschili e fimminili ca finiscinu ca -i (custureri, muggheri...) c'arrestanu 'i stissi ntô plurali. S'iddu hannu 'u fimminili 'u fannu nurmali cu -a ('u custureri, 'a custurera);

• sustantivi fimminili ca finiscinu cu -u (manu) c'arrestanu 'i stissi ntô plurali.

• sustantivi ca finiscinu cu na cunsunanti o sunnu trunchi (finali accintata) sunnu nvariabbili: 'u rais > 'i rais, 'a virità > 'i virità
• catiguria a parti sunni 'i sustantivi ca finiscinu cu -cu/ca/gu/ga. S'havi a taliari 'a pinultima sillabba:
• s'iddu è accintata ô plurali fannu -chi/ghi: ciàncu > ciànchi, pìsca > pìschi... ; ma amìcu, nnimìcu, grècu, pòrcu... fannu amìci, nnimìci, grèci, pòrci... Pi quanto arriguarda 'i fimminili amìca e nnimìca ju prifirisciu amìchi e nnimìchi accussì evitu 'i spicificari s'iddu sunnu masculi o fimmini.
• s'iddu è atuna ô plurali fannu -ci/gi: pàrrucu > pàrruci, spàragu > spàra(g)gi; ma càrricu, stràscicu... fannu càrrichi, stràscichi...

Pi 'sti palori, s'iddu cc'è n dubbiu, è megghiu circalli ntôn vucabbulariu.

• òmu addiventa òmini.   

Indici

Articuli.

L'articulu po essiri:

 Ditirminativu.

Nota: Davanzi a na palora c'accumincia pi vucali s'hav'a usari a furma nurmali apustrufata: l'amicu, l'uva. Ntâ furma abbriviata l'apostrufu si putissi livari s'iddu nun si putissi fari cunfusioni ntra 'a (articulu) e a (pripusizzioni).

Nditirminativu.

Nota: Davanzi a na palora c'accumincia pi vucali s'usa 'a furma nurmali apustrufata (o sicutari 'a regula taliana ca dici ca s'hav'a usari "un, n"  s'iddu è n sustantivu maschili: un/n amicu; e "un', n' " s'iddu è fimminili: un'/n'amica). Davanzi 'i palori c'accumincianu pi "z", "s mpura" e "x" s'usa sulu "nu/na"

Indici

Pripusizzioni.

Attinzioni: Davanzi 'i palori c'accumincianu pi vucali nun s'usanu 'i formi abbriviati dî pripusizzioni articulati, ma chiddi nurmali apostrufannu l'articulu: ntê jammi, nta l'occhi. Quannu si vidi na palora c'accumincia pi vucali s'havi a stari accura s'iddu è veru vucali; (')amma e (')urpi pari c'accumincianu pi vucali, ma accumincianu "funeticamenti" pi cunsunanti: (j/g)amma e (v)urpi fannu  ntê 'ammi e â 'urpi.

(*) 'A pripusizzioni "a" veni usata davanzi n cumplementu uggettu quannu chistu s'arrifirisci a na pirsuna (usu spagnolu): vasu a la mè zita, ma vasu la tò manu; ammuttu a mè figghiu, ma ammuttu 'u carrettu.

(**) 'A pripusizzioni semplici "in" è quasi sempri "prostetica"; voli diri ca si funni câ palora pirdennu 'a "i" arrispittannu 'a funetica: in chiesa > nchiesa, ma in Palermu > Mpalermu, in bagnu > mbagnu

Indici

Aggittivi.

L'aggittivu servi pi spicificari 'i carattistichi dî sustantivi. Ponnu essiri "difiniti" s'iddu spicificanu na carattiristica pricisa o "ndefiniti" s'iddu nun spicificanu nenti (n'omu qualunqui). Chiddi difiniti si classificanu secunnu 'i zoccu spicificanu. Avemu accussì ('i cchiù mpurtanti:

qualificativi: pisanti, beddu, russu...
cumparativi: megghiu, peggiu, minuri, maggiuri...
dimustrativi: chistu, chiddu...
pussissivi: miu, nostru...
ntirrugativi: quali?...
nummarali: tri mazzi, centu passi...

 L'aggittivu po aviri diversi gradi sprissivi e po essiri:

maggiurativu o diminutivu: beddu > cchiù beddu, menu beddu...
cumparativu: ci vonnu sempri dui termini e po essiri:
• di maggiuranza: cchiù beddu 'i ...
• di 'guaglianza: tantu beddu quantu bonu...
• di minuranza: menu beddu 'i...
supirlativu rilativu: è n cumparativu 'i maggiuranza/minuranza cu lu/la/li: lu cchiù/menu beddu 'i tutti...
supirlativu assuluto: 'a furma cchù cumuni è chidda d'agghiunciri l'aggittivi veru, assai, granni...: veru beddu, beddu assai, cuntenu granni; si po fari puru radduppiannu l'aggittivu: duci duci, nicu nicu. 'A furma taliana cû suffissu -issimu/a/i è picca usata, ma s'iddu si voli aviri n supirlativu "esaggiratu" s'usa 'u prifissu -issimissimu/a/i: 'stu picciriddu è bellissimissumu.

Nota: Comu aggittivu si po usari 'a furma nurmali o chidda abbriviata. Comu prunomi s'usa sulu 'a forma nurmali: cu è chistu? (prunomi); 'stu/ssu (chistu/chissu)) scimunitu (aggittivu).

'I prunomi sunno spissu accumpagnati 'i l'avverbi ccà, ddocu e ddà pi spicificari 'a vicinanza: chistu ccà, chistu ddocu, chiddu ddà.

Aggittivi e prunomi ndefiniti

Àvutru, àutru e âtru (atru). 'I primi du' furmi s'usanu comu aggittivi e comu prunomi, âtru (atru) s'usa sulu pi aggittivu.

Aggittivi e prunomi rilativi

Sunnu:

- lu/la/li quali o 'u/'a/'i quali;

- chi, ca e cui sunnu ndiclinabbili;

- chi (o cu') e cui sunnu puru ntirrugativi Cu' fu? Chi dici?

Indici

Prunomi.

Nota: "Nui" s'usa picca o nenti. "Vui" s'usa comu furma 'i rispettu nnâ sicunna pirsuna singulari.

Indici

 Particeddi prunuminali.

'I particeddi prunuminali sunno atuni e ponnu essiri nclitichi (si mettinu staccati davanzi 'u verbu) o pruclitichi (si mettunu sempri attaccati doppo 'u verbu (sulu mpirativu, nfinitu, participio passatu e girundiu): mi lu dici (nclitichi), dicimillu o dimmillu (pruclitichi).

(*) 'A furma mpirsunali o riflissiva pruclitica si fa sempri cû nfinitu.

Indici

Altirazzioni di l'aggittivi e sustantivi.

L'altirazzioni ponnu essiri:

- diminutivi: -icchiu/a/i, -inu/a/i; lentu > lintulicchiu, pani > paninu;

- accriscitivi: -uni/a/i; mazzu > mazzuni

- spriggiativi: -azzu/a/i, -astru/a/i; cani > canazzu, figghiu > figghiastru

- vizziggiativi: -uzzu/a/i, -olu/a/i; cani > canuzzu, figghiu > figghiolu

Chisti sunnu sulu asempi. A sicunna dî zoni cci nni ponnu essiri avutri.

Indici

   Avverbi, cungiunzioni e sclamazzioni.  

 Avverbi:

• Di locu: ccà, ddocu, ddà, supra, ncapu, sutta, suttancapu, addabbanna, a 'sta banna, a tutti banni, addavia, a 'sta via, a jiri ccà/ddà (agghiriccà/ddà), jusu, susu, ccà/ddà jusu (cca/ddagghiusu), ccà/ddà susu (cca/ddassusu), unni, ci, cci...
• Di tempu: ora, antura, poi, po', dipoi, dipò, ddoppu, aèri, ajèri, avanteri, oj, oggi, dumani, stamatina, stasira, assira/arsira, avanterisira, ddoppudumani, tannu, quannu, mmersu/nversu...
• Di modu: beni, mali, megghiu, peggiu, comu, ammucciuni, prestu, accussì (ccussì, cussì), accuddì, nutili, ntôn¹ fiat, ntôn¹ vidiri e svidiri, ntôn¹ fallanti, a la sdossa, a la bona di Diu, illicu illicu, manu manu, a manu a manu.
• Di quantità: cchiù, cchiui, menu, assai, picca, tanticchia, anticchia, tantu...
• Vari: sì, no, nunmai, s'iddu, siccomu, dunqui, addunca, ncà, mprimisi, sparti, macari, ntomentri, gnursì, gnornò...

 (¹) si po' scriviri puru nt'ôn.

Cungiunzzioni:

Chi, ca, puru, ancora, midemma, vidè, ma, pirchì/picchì, però/parò, sparti, puru, mancu...

Sclamazzioni:

Diu nni guarda!, Diu nni scanza!, macari Diu, mischinu (ju)!, caspita!, caspitina!, cazzica!, cabbasisi!...

Indici

 Verbi.

Ausiliari: 'U ausiliariu è sulu 'u verbu "aviri" e 'i tempi cumposti si fannu sulu cû chistu. 'U verbu "èssiri" s'usa sulu ntê pridicati numinali e 'i tempi cumposti si fannu cu "aviri".

Passatu prossimu: S'usa picca; ô sò postu s'usa 'u passatu rimotu.

Futuru:  S'usa veru picca; ô sò postu s'usa 'u prisenti: dumani vaju a Roma; si po' usari puru 'u futuru 'i nicissità (aviri+"a" + verbu ô 'nfinitu: dumani haju a jiri (gghiri) a Roma.

Cungiuntivo prisenti: È 'u stissu dû 'ndicativu prisenti.

Cundizziunali: S'usa sulu pi nicissatà littirari o pi parrari acculturatu.

 prima diclinazzioni appartennu 'i verbi ca finiscinu cu -àri, â sicunna chiddi ca finiscinu cu -ire longu (accentu ntâ tirzultima sillabba) e â terza chiddi ca finiscinu cu -ìre curtu (accentu ntâ pinultima sillabba).

'U verbu sirvili talianu "dovere" addiventa "aviri+a+nfinitu": "devo cogliere" > haju a cogghiri

Diversi verbi ('a sicunna diclinazzioni debbuli latina) appartennu â sicunna diclinazzioni e puru â terza (ma sulu a l'infinitu): mòriri e murìri, gòdiri e gudìri; s'acchiamanu "furmi 'nfantili" picchì l'usanu 'i picciriddi pâ prununzia cchiù "liscia", ma poi ntâ diclinazzioni sunnu nurmali .

Attinzioni: 'i verbi dâ prima diclinazzioni chi hannu una vucali debbuli ntô tema (radici) ca nta l'originali era forti 'a cancianu quanno pigghianu 'na disinenza atuna (purt-àri > pòrt-u). Pi verbi dâ sicunna diclinazzioni succeri 'u riversu: chiddi chi hannu 'na vucali forti 'a perdinu quannu pigghianu 'na disinenza accinntata (ripèt-iri > ripit-èmu).

'Sti diclinazzioni sunnu pigghiati di la "Grammatica siciliana" di Giuseppi Pitrè cu cocchi currizzioni e simplificazzioni picchì sunnu sulu chiddi dâ parrata palirmitana).

'I tempi cumposti nun sunnu signati picchì si fannu cû verbo aviri + participiu passatu ca, nta 'stu casu è assulutamenti ndiclinabbili.

Indici

Pruggettu 'i nu curritturi urtugraficu pâ lingua siciliana.

'Stu pruggettu nasci pi circari 'i "standardizzari" 'a lingua siciliana sutta l'aspettu urtugraficu e grammaticali, picchì sutta l'aspettu semanticu 'a situazzioni è troppu ngravugghiata.

'U curritturi, quannu 'u finisciu, havi a funziunari sutta "Open Office" virsioni minima 1.1.0

'U curritturi havi comu dizziunariu 'i basi:

palori sulu siciliani (es. ammatula);
palori chi hannu 'a stissa dirivazzioni di palori taliani (es. amicu);
palori taliani sicilianizzati (es. mutucicletta).

Tutti 'i palori ca cci sunnu nta 'stu dizziunariu 'i basi hannu un "codici" pi sapiri comu hann'a essiri cuniugati/diclinati). 'I reguli 'i truvati ddocu: cudifica.pdf. Liggitivilli e dicitimi si cci sunnu erruri.

Accamadora 'i punta 1 e 2 sunno fermi 'a la cunsunanti "q" e 'u puntu 3 s'havi a "pulizziari".

'Ssennu ca 'i dati cci sunnu fici puru un vucabbulario nterattivo ca si pò arrichiamari mentri si scrivi.

Indici