E' scurnuso 'stu dulore!...
Annascuso va criscènno.
Io già sento dint' 'o core
ca 'st'ammore va murenno!...

E te guardo e nun mme dice
chello ca vulisse dì !
E mme diceno ll'amice:
"Ma pecché nun vvuò capì?"

'Sta faccella 'e madunnella...
è, pe me, na passione!...
Te cantavo 'a canzuncella...
"Mme vo' bene... 'sta guagliona".

Parla, chiaro, meh!, dimmello
ca' stu bbene mo è ffernuto...
Tu nun si' na santarella...
Accussì t'aggio perduto!...

Vo' vulà 'sta rundinella!
E' turnata 'a primmavera...
mm' 'o ddicette 'a zengarella:
"Te cuffèa: nun è sincera!"

E rummane na ferita
dint' 'o core addulurato!...
Penzaraggio tutt' 'a vita
a st'ammore sfurtunato!!