|
|
|
|
|
Poesie in dialetto Siculo del prof.Giuseppe Galati Mosella |
 |
|
Animi nnammurati Tutti li siri a mari, a la stiss'ura quannu spunta sta luna chiara chiara, nunn sacciu zoccu cc'è chi mi 'nnmura, mi fa pinzari a tia, biddizza rara...
Pi st'aria profumata e senza ventu cu tia , spasimu miu, vurria vulari... cc'è tantu, ma cc'è tantu sintimentu sutta sta luna e 'ncostu di stu mari !
Oh, quantu stiddi 'ncelu, animi 'nnamurati ! La sira è com'un velu, chi ammuccia li vasati !
Ah st'occhi beddi e chini di malia parinu fatti apposta pi 'ncantari; strinciti tutta, strinciti cu mia, fammi lu to respiru arrispirari...
Guarda: In mari è tuttu comu argentu., sona 'nu mannulinu un sunaturi... cc'è tantu, ma cc'è tantu sentimentu, sti siri sunnu fatti pi l'amuri !
Oh, quantu stiddi 'ncelu, animi 'nnamurati ! La sira è com'un velu, chi ammuccia li vasati !
----------------------------------------------- Premiata con menzione onorevole nel concorso dell'Arte melodrammatica dell'anno 1913 |
Li siri di la stati Lu mari è calmu e pari tuttu argentu, l'oduri di zagar si spanni, e 'nta lu bordu di lui firmamentu nesci 'na luna bianca e granni granni-
Palermu 'nta sti siri senza ventu è com'un sonnu di du 'nnammurati, è tutta comu fussi un sintimentu Palermu 'nta sti siri di la stati.
Di la marina a Muntipidirrinu nu sacciu zoccu cc'è chi scinni 'ncori, cc'è comu n'armunia di mannulinu, chi va murennu sempri e mai nun mori.
Palermu 'nta sti siri senza ventu è com'un sonnu di du 'nnammurati, è tutta comu fussi un sintimentu Palermu 'nta sti siri di la stati.
|
|
Cusà... Cusà Rusidda cu l'ucchiuzzi a pampinedda, quann'è ca ti la levi sta funcidda ? Nun ti mm'addumnio ca sta facci bedda pi causa di sta funcia 'un'è cchiù chidda ?
Un tempu mi parevi n'anciledda: l'ucchiuzzi ti lucianu comu stidda... cci penzi ? io sempri 'ncoddu la cartedda, tu cu dda gistra sutta di la scidda... Rusidda, tu sì zuccaru Rusidda tu sì meli, ma lu mè cori è felì, cusà... cusà... cusà... * * * Cci penzi a dda jurnata di Natali ? Chiuvìa, chiuvìa lu celu 'mmalidittu... io t'accattavi un beddu ghiritali e morsi 'na jurnata di pitittu...
La sira poi versu l'Avimmaria Rusidda, cu cui è ca ti 'ncuntravi ? Apertu lu paracqua iddu tinìa, e tu ddassutta ti cci arriparavi...
Rusidda, tu sì zuccaru Rusidda tu sì meli, ma lu mè cori è felì, cusà... cusà... cusà...
----------------------------------------------------- Premiata con menzione onorevole nel concorso dell'Arte melodrammatica dell'anno 1912
|
Biunnulidda, Biunnulì S'era dittu ca stasira, cu la luna pi li strati, a cantari sirinati s'avia a ghiri cca e ddà...
Or, bianca comu cira, cc'è 'nna luna chi nni 'ncanta, e si nuddu ancora canta, e si nenti cchiù si fa,
e pirchì tu nun ci sì, Biunnulidda, Biunnulì.
* ** S'era dittu ca cu tanti beddi fimmini vinuti di vasati e di strinciuti cci avia ad esseri... ma chi!
Ora sunnu tutti quanti li picciotti a la me' casa, e si nuddu ancora vasa si strinciuti nun ci 'nn'è,
e pirchì tu nun ci sì, Biunnulidda, Biunnulì...
--------------------------------------------- Premiata con diploma nel concorso dell'arte Melodrammatica dell'anno 1914.
|
|
Lavannaricchia
Lavannaricchia biunna, chi a la funti tutta pinzusa e risulenti vai, cu l'occhi 'nterra e cu lu suli 'nfrunti, lavannaricchia mia, sì bedda assai !
Nun ti l'à dittu mai lu murmurìu di st'acqua pura e inargintata, unni, lavannaricchia di lu cori miu, talì li to' biddizzi e ti cunfunni?...
Lavannaricchia, ti lu dicu iu ! * * * Lavannaricchia biunna, chi a la casa torni cantannu a lu miriu di maggiu, furtunata dda vucca chi ti vasa e, a tia vasannu, 'un perdi lu curaggiu!
Nun ti l'à dittu mai lu ciunciuliu di l'acidduzzi, 'mmenzu la trazzera, unni, vucidda di lu cori miu, tu passi, e ridi 'ntornu primavera ? ...
Lavannaricchia, ti lu dicu iu ! ------------------------------------------------------------------- Premiata con diploma nel concorso dell'Arte melodrammatica dell'anno 1913.
|
Lu sonnu di lu mari
Bedda, la senti tu sta sinfunia ? 'Ncantata è sta varcuzza, unni durmemu .. Lu ventu adaciu adaciu ciunciulìa e pari ca dicissi: Tremu... tremu. Dda 'nfunnu a pocu a pocu la banchina di lumi ora comincia a scintillari, si grapi lu passiggiu a la marina... cca sulu cc'è lu sonnu di lu mari. * * * A st'ura dda cci su' picciotti ziti, signurineddi vispi e aggraziati, picciridduzzi russi e sapuriti, chi scippirianu a tutti li vasati.
E sona dda 'na musica assai fina, li noji di la vita a cunzulari, ma 'nna cosa cchiù granni e cchiù divina, bedda, è lu sonnu eternu di stu mari. * * * Cu li so' aranci tutti sempri 'nciuri, profumi di magnolii dilicati, Palermu è la citati di l'amuri, Palermu è In suspiru di la stati...
E cca, sutta sta luna tutta risu, 'na vasatedda tu mi la po' dari, cca semu 'nta lu nostru paraddisu, cca sulu cc'è lu sonnu di lu mari.
--------------------------------------------------------- Premiata con menzione onorevole nel concorso dell'Arte melodrammatica dell'anno 1912
|
|
|
